រាជធានីភ្នំពេញ ៖ រ៉ឺម៉កម៉ូតូមួយគ្រឿងដឹកប្រពន្ធមានផ្ទៃពោះ៦ខែ និងកូនមកពីហូបស៊ុបវិញត្រូវរ៉ឺម៉កម៉ូតូមួយគ្រឿងទៀតបើកបរក្នុងស្ថានភាពស្រវឹងបុកគូទពីក្រោយបណ្តាលឲ្យក្រឡាប់រ៉ឺម៉កម៉ូតូទាំង២គ្រឿងរងរបួសស្រាល ។ ហេតុការណ៍នេះបានកើតឡើងកាលពីវេលាម៉ោង៩ និង៤០នាទីយប់ ថ្ងៃទី២ មីនា តាមផ្លូវលេខ១០៥កែងមហាវិថីព្រះសីហនុ សង្កាត់បឹងព្រលិត ខណ្ឌ៧មករា។
សាក្សីឃើញហេតុការណ៍បានឲ្យដឹងថា មុនពេលកើតហេតុម៉ូតូវ៉េវអាល់ហ្វា ពណ៌ខ្មៅ ពាក់ស្លាកលេខភ្នំពេញ 1BK 0204 អូសរ៉ឺម៉កម៉ូតូដឹកប្រពន្ធមានផ្ទៃពោះ៦ខែ និងកូនតូចៗ ទើបនឹងមកពីហូបស៊ុបធ្វើដំណើរត្រឡប់ទៅផ្ទះវិញ បើកបរតាមផ្លូវលេខ១០៥ពីជើងទៅត្បូង ចំណែកម៉ូតូសង់កូរ៉េ ពណ៌ក្រហម ពាក់ស្លាកលេខ ម ៤០៤៤ ភព១ អូសរ៉ឺម៉កកញ្ចាស់មួយគ្រឿង បើកបរក្នុងស្ថានភាពស្រវឹងតាមផ្លូវព្រះសីហនុពីកើតទៅលិច មកដល់ចំណុចផ្លូវកែង អ្នកបើកស្រវឹងខ្លាំងពេកបានបើកទៅបុកគូទរ៉ឺម៉កម៉ូតូដែលដឹកប្រពន្ធកូនបណ្តាលឲ្យក្រឡាប់រ៉ឺម៉កទាំងពីរគ្រឿងធ្វើឲ្យប្រពន្ធកូននៅក្នុងរ៉ឺម៉ករងរបួសស្រាល ប៉ុន្តែស្ត្រីមានផ្ទៃពោះបានបញ្ជូនទៅពិនិត្យផ្ទៃពោះនៅមន្ទីរពេទ្យ ។
ក្រោយពេលកើតហេតុអ្នករងគ្រោះទាមទារសំណងពីខាងបង្កចំនួន៥០ដុល្លារ ប៉ុន្តែអ្នកបង្កប្រាប់ថាអត់មានលុយទេ សូម្បីតែមួយសេនក៏អត់មានដែរ ហើយបានសួររកលេខទូរស័ព្ទរបស់ប្រពន្ធ ក៏ត្រូវជនបង្កប្រាប់ថាទោះបីមានលេខប្រពន្ធក៏អត់មានលុយដែរ ដោយសារតែស្ថានភាពក្រីក្រសូម្បីតែរ៉ឺម៉កកញ្ចាស់មើលលែងយល់ទៅហើយនោះថែមទាំងក្រឡាប់ ធ្វើឲ្យបាក់សរសរទ្រដំបូលមួយដែរនោះ ទើបភាគីខាងរងគ្រោះសុខចិត្តមិនទាមទារសំណងទេ ៕
ចែករំលែកព័តមាននេះ