រាជធានីភ្នំពេញ ៖ អាជ្ញាធរខណ្ឌពោធិ៍សែនជ័យដឹកនាំដោយលោកអភិបាលខណ្ឌហែម ដារិទ្ធិ ដោយមានការចូលរួមពីកងកម្លាំងប្រដាប់អាវុធ និងមន្ត្រីរាជការ ការិយាល័យជុំវិញខណ្ឌ និងក្រុមយុវជនខណ្ឌ បានដើររើសសំរាមនៅតាមបណ្តោយមហាវិថីសព័ន្ធរុស្ស៊ី និងជុំវិញសួនកុមារពោធិ៍ចិនតុង កាលពីព្រឹកថ្ងៃទី២៨ កុម្ភៈ ២០១៥ ។
ដើម្បីប្រារព្ធទិវានៃទីក្រុងស្អាត បន្ទាប់ពីទទួលបានជ័យលាភីទីក្រុងស្អាត ផ្ការំដួល១ទង ពីរាជរដ្ឋាភិបាលជូនសម្រាប់ខណ្ឌមួយនេះដែលជាប់ជាចំណាត់ថ្នាក់ខណ្ឌស្អាត ហើយសកម្មភាពខាងលើក៏ជាគំរូល្អមួយចង់ឲ្យប្រជាពលរដ្ឋទូទៅបានយល់ដឹងពីសារសំខាន់នៃទីក្រុងស្អាត និងបានចូលរួមចំណេកក្នុងការសម្អាតទាំងអស់គ្នា។
លោកហែម ដារិទ្ធិ បានមានប្រសាសន៍ថា ខណ្ឌពោធិ៍សែនជ័យមានមោទភាពមួយដែរ ដែលទទួលបានផ្ការំដួល១ទងដែលជាជ័យលាភីនៃទីក្រុងស្អាត បន្ទាប់ពីយើងទាំងអស់គ្នាខិតខំក្នុងថែរក្សាបរិស្ថានក្នុងពេលកន្លងមកអស់ពីកម្លាំងកាយចិត្តនោះ។ ខណ្ឌពោធិ៍សែនជ័យ មានវិសាលភាពធំធេងជាងបណ្ដាខណ្ឌនានានៅទូទាំងរាជធានីភ្នំពេញ ហើយរោងចក្រក៏ច្រើន និងមានប្រជាពលរដ្ឋមកពីតាមតំបន់ផ្សេងៗមករស់នៅច្រើនទៀត ដូច្នេះការសម្អាតសំរាមមានការស្មុគស្មាញបន្តិច ព្រោះពួកគាត់មួយចំនួនមិនទាន់មានការយល់ដឹងនៅឡើយ។
លោកអភិបាលខណ្ឌបានបន្តទៀតថា ខណ្ឌយើងមានអាកាសយានដ្ឋានអន្តរជាតិភ្នំពេញ ដែលមានភ្ញៀវជាតិ និងអន្តជាតិចេញចូលជាប់មិនដាច់ដែលត្រូវការសម្អាតជាប់ជាប្រចាំមិនអាចទុកឲ្យមានគំនរសំរាមនៅដូចភ្នំបានឡើយ។ ម្យ៉ាងទៀតទោះបីជានៅកន្លែងណា ក៏ត្រូវតែស្អាតជានិច្ចដែរ ដូច្នេះដើម្បីកម្ចាត់សំរាមឲ្យអស់ទាល់តែមានការចូលរួម យ៉ាងសកម្មពីសំណាក់បងប្អូនប្រជាពលរដ្ឋឲ្យបានគ្រប់គ្នាផងដែរ ទើបទៅរួចទីក្រុងស្អាត លំនៅឋានស្អាត និងសុខភាពល្អ ជាពិសេសមុខមាត់ប្រទេសជាតិយើងតែម្ដង៕
ចែករំលែកព័តមាននេះ