ខេត្តមណ្ឌលគិរី ៖ លោកងិន សុវិមាន ប្រធានមន្ទីរទេសចរណ៍ខេត្តមណ្ឌលគិរីបានថ្លែងប្រាប់កោះសន្តិភាពក្នុងជំនួបផ្តាច់មុខថា «មន្ទីរជំនាញ និងអង្គភាពពាក់ព័ន្ឋនានា
ខេត្តមណ្ឌលគិរី ៖ លោកងិន សុវិមាន ប្រធានមន្ទីរទេសចរណ៍ខេត្តមណ្ឌលគិរីបានថ្លែងប្រាប់កោះសន្តិភាពក្នុងជំនួបផ្តាច់មុខថា «មន្ទីរជំនាញ និងអង្គភាពពាក់ព័ន្ឋនានា បានកំពុងប្រជុំសម្រេចរៀបចំកម្មវិធីអបអរសាទរទទួលទេវតាឆ្នាំថ្មី២០១៥ ដើម្បីជាភាពទាក់ទាញភ្ញៀវទេសចរឲ្យមានការចាប់អារម្មណ៍មកកម្សាន្តលេងនៅតាមទីរមណីយដ្ឋានក្នុងខេត្ត។
លោកប្រធានមន្ទីរទេសចរណ៍ឲ្យដឹងថា «ក្រុមការងារយើងបានបង្កើតកម្មវិធីបោសសម្អាតតាមរមណីយដ្ឋានទាំងអស់ក្នុងខេត្ត ដោយមានការចូលរួមពីប្រជាសហគមន៍ ជាពិសេស គឺទឹកជ្រោះប៊ូស្រា។ ក្នុងនោះដែរមន្ទីរទេសចរណ៍បានសហការជាមួយក្រុមហ៊ុនមួយឈ្មោះមណ្ឌលខេរីស៊ត ដែលបានវិនិយោគអភិវឌ្ឍន៏តំបន់ទឹកជ្រោះប៊ូស្រា សម្រេចបង្កើតកម្មវិធីចាប់ឆ្នោតផ្សងសំណាង ជិះខ្សែរ៉តឥតគិតថ្លៃ ក្នុងថ្ងៃបុណ្យប្រពៃណីជាតិខ្មែរ នាពេលខាងមុខ ដោយមានអញ្ជើញភ្ញៀវជាតិនិងអន្តរជាតិ ព្រមទាំងសិស្សសាលាប្រមាណជា២០០នាក់ចូលរួមផងដែរ។
ចំពោះបញ្ហាសណ្ឋាគារ ផ្ទះសំណាក់ និងភោជនីយដ្ឋាន លោកប្រធានមន្ទីរបានបញ្ជាក់ថា «បន្ទប់សណ្ឋាគារមានការកើនបន្តិចបន្តួច គឺតែ១០បន្ទប់ បូកជាមួយរបាយការណ៍ចាស់ចំនួន១០៩បន្ទប់ ដូច្នេះស្មើ១២៩បន្ទប់។ បន្ទប់ផ្ទះសំណាក់មានការកើនឡើងច្រើនជាងបន្ទប់សណ្ឋាគារ គឺបច្ចុប្បន្នកើន៩០បន្ទប់បន្ថែម បើបូកជាមួយរបាយការណ៍ចាស់ដែលមានចំនួន៤០៥បន្ទប់ បច្ចុប្បន្នមានចំនួន៤៩៥បន្ទប់។
ចំពោះភោជនីយដ្ឋាន និងអាហារដ្ឋានទាំងតូចទាំងធំដែលអាចបម្រើដល់ភ្ញៀវបានសរុបក្នុងខេត្តមានចំនួន៤១កន្លែង។ លោក ងិន សុវិមា បានបន្តថា បើទោះបីជាកំណើនសណ្ឋាគារ ផ្ទះសំណាក់និងភោជនីយដ្ឋាន ដុះដូចផ្សិតត្រូវទឹកភ្លៀងក៏ដោយ ពេលខ្លះក៏មិនអាចបំពេញនូវចំនួនភ្ញៀវទេសចរដែលមានការកើនឡើងយ៉ាងឆាប់រហ័សនាពេលបច្ចុប្បន្ននេះដែរ។
ចំណែកលោកញ៉ែម វ៉ាននី ស្នងការនគរបាលខេត្តក៏បានមានប្រសាសន៏ថា«ឆ្នាំ២០១៥នេះ ក៏ដូចបណ្តាឆ្នាំមុនៗដែរ ស្នងការដ្ឋាននគរបាលខេត្តបានយកចិត្តទុកដាក់បង្កើនការពារគ្រប់គោលដៅសំខាន់ៗ ដើម្បីរក្សាសុខសុវត្ថិភាពជូនអ្នកទេសចរ ដែលបានអញ្ជើញមកកម្សាន្តលេងនៅខេត្តនេះ។ ក្នុងនោះដែរលោកស្នងការក៏បានសំណូមពរដល់អ្នកទេសចរទាំងអស់ថា កុំចាំតែសមត្ថកិច្ចមកការពារសុវត្ថិភាពជូន គឺត្រូវចេះរក្សាសុវត្ថិភាពខ្លួនឯងផង ព្រោះរដូវចូលឆ្នាំមានមនុស្សច្រើន ដូច្នេះកងកម្លាំងមិនអាចមើលបានសព្វគ្រប់ជ្រុងជ្រោយឡើយ។
លោកស្នងការខេត្តក៏បានក្រើនរំលឹកដល់បងប្អូនប្រជាពលរដ្ឋដែលមានបំណងមកលេងកម្សាន្តនៅខេត្តមណ្ឌលគិរី មេត្តាយកចិត្តទុកដាក់ខ្ពស់ក្នុងការបើកបរ ព្រោះស្ថានភាពផ្លូវនៅខេត្តមណ្ឌលគិរីសម្បូរទៅដោយចំណោតខ្ពស់ៗ និងមានបត់កែងច្រើន ដែលអាចបណ្តាលឲ្យកើតមានគ្រោះគ្រប់ពេលវេលា។ ជាងនេះផងដែរក៏បានសុំឲ្យបងប្អូនភ្ញៀវជាតិ និងអន្តរជាតិទាំងអស់ ត្រូវប្រុងប្រយ័ត្នឲ្យបានច្រើននៅពេលកំពុងលេងតាមរមណីយដ្ឋានទឹកជ្រោះនានា ដើម្បីរក្សាអាយុជីវិតកុំឲ្យលង់ទឹក។
លោកចាន់ ទិត្យ នាយការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តមណ្ឌលគិរីបានឲ្យដឹងថា ទន្ទឹមនឹងការឈានចូលមកដល់នៅរដូវបុណ្យចូលឆ្នាំប្រពៃណីជាតិខ្មែរ ការិយាល័យចរាចរណ៍ខេត្តបានកំពុងបង្កើនសកម្មភាពរឹតបន្តឹងការបើកបររបស់ប្រជាពលរដ្ឋ និងធ្វើការផាកពិន័យចំពោះអ្នកមិនគោរពច្បាប់។ មន្ត្រីការិយាល័យជំនាញក៏កំពុងធ្វើសកម្មភាពផ្សព្វផ្សាយច្បាប់ចរាចរណ៍ដល់ពលរដ្ឋ ទាំងវិទ្យុ កាសែត និងប្រព័ន្ឋផ្សព្វផ្សាយជាច្រើនទៀត ដើម្បីធានាឲ្យសុវត្ថិភាពសាធារណៈ៕
ចែករំលែកព័តមាននេះ