រាជធានីភ្នំពេញ ៖ ជ័យ វណ្ណៈ មកពីក្លិបឃ្លាំងមឿងកីឡា បានធ្វើឱ្យ ស្រិល ទ្រី មកពីក្លិបគជសារកីឡា ចាញ់ការប្រកួតដោយពិន្ទុយ៉ាងអស់ចិត្តបំផុតសម្រាប់ការជួបគ្នានៅលើ
រាជធានីភ្នំពេញ ៖ ជ័យ វណ្ណៈ មកពីក្លិបឃ្លាំងមឿងកីឡា បានធ្វើឱ្យ ស្រិល ទ្រី មកពីក្លិបគជសារកីឡា ចាញ់ការប្រកួតដោយពិន្ទុយ៉ាងអស់ចិត្តបំផុតសម្រាប់ការជួបគ្នានៅលើសង្វៀនស៊ីធីអិន កាលពីថ្ងៃអាទិត្យ ទី១ មីនា កន្លងមកនេះ ។ ចំណែក ចាន់ រតនៈ មកពីក្លិបខ្លារខិនមានរិទ្ធ ត្រូវបានគ្រូពេទ្យបញ្ឈប់លែងឱ្យប្រកួតនៅត្រឹមទឹកទី៤ ដោយសារតែត្រូវមួយកែងរបស់ ចាន់ គង់រាជ មកពីក្លិបតាព្រហ្មមានជ័យបង្ក្រាបគ្រឿងញៀនបណ្តាលឱ្យបែករយះនៅលើថ្ងាសយ៉ាងធំ និងមានឈាមហូរជោកមុខ ។
ជ័យ វណ្ណៈ ជួបប្រកួតជាមួយ ស្រិល ទ្រី លើកនេះគេហាក់បីដូចជាមានជំនឿចិត្តយ៉ាងខ្លាំង។ ចាប់តាំងពីទឹកទី១ រហូតទៅ ជ័យ វណ្ណៈ បានប្រើក្បាច់ពិសេសៗវាយសន្ធាប់ទៅលើ ស្រិល ទ្រី ស្ទើរតែមិនអាចតដៃរួចឡើយ ។ ទោះបីជាយ៉ាងណា ស្រិល ទ្រី នៅមានឱកាសតដៃវាយបកសងមកវិញបានម្តងម្កាលដែរ គ្រាន់តែមិនសូវទទួលបានផលល្អតែបុ៉ណ្ណោះ ។ ជ័យ វណ្ណៈ ធ្លាប់តែអស់កម្លាំងនៅក្នុងទឹកទី៣ និងទី៤ នោះលើកនេះមិនដូចពេលមុនឡើយ ដោយគេឃើញកីឡាកររូបនេះកាន់តែបង្កើនការវាយលុកយ៉ាងសាហាវលើសដើម ហាក់ដូចជាមើលឃើញ ស្រិល ទ្រី ជាកូនឈ្លូសអញ្ចឹង ។
ចាប់ពីទឹកទី៤ រហូតទៅ ស្រិល ទ្រី ស្ទើរតែលែងមានឱកាសវាយតបតជាមួយ ជ័យ វណ្ណៈ ម្តងៗទៅហើយ។ បុ៉ន្តែអ្នកប្រដាល់មកពីក្លិបគជសារកីឡារូបនេះចិត្តសឿងគ្រាន់បើ បើទោះជាមិនអាចធ្វើអ្វីគូប្រកួតកើតមែន តែយ៉ាងហោចណាស់ ក៏អាចទប់ទល់រហូតដល់ចប់ទឹកទី៥ដែរ គ្រាន់តែទ្រមខ្លួនបន្តិច និងចាញ់ពិន្ទុបុ៉ណ្ណោះ ។ ចាន់ គង់រាជ ជួប ចាន់ រតនៈ លើកនេះលេងរាងធ្ងន់ដៃបន្តិចហើយ ។ ចាប់ពីទឹកទី១ ដល់ទឹកទី៣ ការប្រកួតរបស់គូនេះមានភាពប្រដំប្រសងគ្នា ដោយមានឱកាសវាយបកគ្នាទៅវិញទៅមកបានយ៉ាងល្អទៀតផង ។ បុ៉ន្តែ ចាន់ រតនៈ ហាក់បីដូចជាមានការធ្វេសប្រហែសបន្តិចនៅក្នុងទឹកទី៤ ពេលគេបានព្យាយាមសម្រុកចូលកៀកដើម្បីម៉ាត់សំដៅមុខគូប្រកួតចៃដន្យ ចាន់ គង់រាជ បានពន្លះមួយកែងយ៉ាងធ្ងន់ចូលចំពីលើថ្ងាសបណ្តាលឱ្យមានស្នាមបែកយ៉ាងធំ ហូរឈាមជោកមុខ ហើយគ្រូពេទ្យក៏បញ្ឈប់លែងឱ្យប្រកួតតែម្តង ។
ដោយឡែកលទ្ធផលគូផ្សេង កីឡាករវ៉ែន សុវណ្ណ មកពីក្លិបកងកេងកីឡា បានយកឈ្នះពិន្ទុកីឡាករពុធ ឆាយរិទ្ធី មកពីក្លិបពុទ្ធសេរីវង្សព្រែកតាទែន ។ កីឡាករព្រឿង សុជាតិ មកពីមជ្ឈមណ្ឌលកីឡានៃកងយោធពលខេមរភូមិន្ទ បានយកឈ្នះពិន្ទុកីឡាករឡុង គឹមហៀង មកពីក្លិបសាលវ័ន្តកីឡា ។ កីឡាករប្រាក់ រស្មី មកពីក្លិបតាដំបងដែកមានរិទ្ធ បានយកឈ្នះកីឡាករសំ ពិសិដ្ឋ មកពីក្លិបកុមារកំព្រានៅត្រឹមទឹកទី២ និងកីឡាករនឹម ហែម បានផ្តួលកីឡាករជ័យ រ៉ាវុធ មកពីក្លិបឃ្លាំងមឿងកីឡាឱ្យសន្លប់នៅត្រឹមទឹកទី៤ ៕
ចែករំលែកព័តមាននេះ