ខេត្តរតនគិរី ៖ លំនៅឋានគ្រូបង្រៀនម្នាក់ត្រូវក្រុមហ៊ុនស្វ៊ីស រ៉ាប់ប៊ើរ លីមីធី ចំការកៅស៊ូ ប្រុងរុះរើផ្ទះទាំងព្រឹក ដែលហេតុការណ៍នេះកើតឡើងកាលពីវេលាម៉ោង០៨ និង៣០នាទីព្រឹកថ្ងៃទី០២ មីនា ២០១៥ ស្ថិតក្នុងភូមិ៤ សង្កាត់កាចាញ ក្រុងបានលុង ។
ប្រភពបានឱ្យដឹងថា ម្ចាស់ផ្ទះត្រូវបានស្គាល់ឈ្មោះចាន់ ដុង ភេទប្រុស អាយុ៣២ឆ្នាំ ជាគ្រូបង្រៀន និងប្រពន្ធឈ្មោះសុខ ថាវរី មានកូនស្រី២នាក់ក្នុងបន្ទុក ។
ប្រភពបន្តថា ក្រុមហ៊ុនស្វីសរ៉ាប៊ើរលីមីធី ដែលមានថៅកែធំម្នាក់ឈ្មោះយាយចិន ដែលជាប្រធានក្រុមហ៊ុន បានបញ្ជាឱ្យកម្លាំងរបស់ខ្លួនមករុះរើផ្ទះគ្រូបង្រៀនខាងលើ ចំណែកគ្រូបង្រៀន និងប្រជាពលរដ្ឋដែលរស់នៅភូមិ៤ទាំងអស់នោះ បានមករស់នៅតាំងពីឆ្នាំ១៩៩៨ ហើយប្រជាពលរដ្ឋសរុបមានចំនួន៤៨៦គ្រួសារ ។
ដីខាងលើនេះ កាលពីមុនជាដីរបស់ក្រុមហ៊ុន តាយ សេង ហើយគាត់បាននិយាយជាមួយអាជ្ញាធរថា ដីសងខាងផ្លូវដែលប្រជាពលរដ្ឋរស់នៅសព្វថ្ងៃនេះឱ្យប្រជាពលរដ្ឋរស់នៅចុះ ក្រោយមកក្រុមហ៊ុនតាយ សេង បានផ្ទេរទៅឱ្យក្រុមហ៊ុនស្វ៊ីសរ៉ាប់ប៊ើរវិនិយោគបន្ត ហើយក៏ត្រូវក្រុមហ៊ុននេះ បានបញ្ជាកម្លាំងរបស់ខ្លួនធ្វើការរុះរើលំនៅឋានប្រជាពលរដ្ឋ ដើម្បីវាតយកដីក្រុមហ៊ុនទៅវិញ។
កាលពីវេលាព្រឹកថ្ងៃដដែលនោះ តំណាងក្រុមហ៊ុនបានមកបំរុងរុះរើផ្ទះប្រជាពលរដ្ឋខាងលើនោះ ពុំឃើញមានអាជ្ញាធរគ្រប់លំដាប់ថ្នាក់មកជួយអន្តរាគមន៍នោះទេ ហើយក៏ត្រូវប្រជាពលរដ្ឋក្នុងភូមិរារាំងធ្វើការតវ៉ាមិនឱ្យរុះរើ ដោយរង់ចាំការដោះស្រាយនៅពេលក្រោយ ៕
ចែករំលែកព័តមាននេះ