សង្កាត់សាក់សំពៅអនុវត្តបានល្អគោលនយោបាយភូមិ-សង្កាត់មានសុវត្ថិភាព
រាជធានីភ្នំពេញ ៖ លោកប៊ុន សេរី អភិបាលរងរាជធានីភ្នំពេញ និងជាប្រធានក្រុមការងារ លោកអ៊ុក សុផល អនុប្រធានក្រុមការងារគណបក្សប្រជាជនចុះជួយសង្កាត់សាក់
រាជធានីភ្នំពេញ ៖ លោកប៊ុន សេរី អភិបាលរងរាជធានីភ្នំពេញ និងជាប្រធានក្រុមការងារ លោកអ៊ុក សុផល អនុប្រធានក្រុមការងារគណបក្សប្រជាជនចុះជួយសង្កាត់សាក់សំពៅ ខណ្ឌដង្កោ និងសហការី រួមជាមួយអាជ្ញាធរខណ្ឌ កាលពីថ្ងៃទី២៨ កុម្ភៈ ២០១៥ បានធ្វើពិធីប្រកាសផ្សព្វផ្សាយសេចក្តីសំរេចចិត្តរបស់មហាសន្និបាតវិសាមញ្ញតំណាង
ទួទាំងប្រទេសរបស់គណបក្សប្រជាជនកម្ពុជាជូនដល់សមាជិក សមាជិកាគណបក្សប្រជាជនកម្ពុជានៅក្នុងសង្កាត់សាក់សំពៅ ។
មហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជនកម្ពុជាដែលទើបបានបញ្ចប់ទៅនាពេលថ្មីៗនេះបានដាក់ចេញសេចក្តីសំរេចចិត្ត៩ចំណុច ដែលបានឆ្លុះបញ្ចាំងពីជំហរដ៏ម៉ឹងម៉ាត់ និងច្បាស់លាស់របស់គណបក្សប្រជាជនកម្ពុជាក្នុងបុព្វហេតុការពារ និងអភិវឌ្ឍន៍ប្រទេសជាតិ និងផលប្រយោជន៏របស់ប្រជាពលរដ្ឋ។
លោកប៊ុន សេរី បានលើកឡើងថា អង្គសន្និបាតបានធ្វើការវាយតំលៃយ៉ាងល្អិតល្អន់ពីសភាពការណ៍ដែលបានកើតឡើងក្នុងរយៈពេល១ឆ្នាំកន្លងទៅ ក្រោយការបោះឆ្នោតសាកលអណត្តិទី៥នៃរដ្ឋសភា បើទោះបីមានការបង្កឲ្យមានភាពអនាធិបតេយ្យ, ការធ្វើកូដកម្ម, បាតុកម្មក្នុងគោលបំណងផ្តួលរំលំរាជរដ្ឋាភិបាលស្របច្បាប់ពីសំណាក់បក្សប្រឆាំង, សមាគម, សហគមន៍, សហជីពក៏ដូចអង្គការក្រៅរដ្ឋាភិបាលមួយចំនួនយ៉ាងណាក្តី ក៏គណបក្សប្រជាជនកម្ពុជាក៏ដូចរាជរដ្ឋាភិបាលបានខិតខំបញ្ចៀសបាននូវហេតុការណ៍អាក្រក់ផ្សេងៗរក្សាបានស្ថិរភាពនយោបាយ ស្ថិរភាពសេដ្ឋកិច្ចសង្គមនាំមកនូវភាពកក់ក្តៅជូនប្រជាពលរដ្ឋដោយប្រកាន់ខ្ជាប់នូវវិធានការច្បាប់ និងលទ្ធិប្រជាធិបតេយ្យ។
លោកបានផ្តាំផ្ញើដល់សមាជិក សមាជិកាគណបក្សក៏ដូចអាជ្ញាធរដែនដីត្រូវកែលំអនូវចំណុចខ្វះខាតមួយចំនួនដែលមានកន្លងមកក្នុងការងារដើម្បីបំរើសេវាសាធារណៈជូនប្រជាពលរដ្ឋឲ្យទាន់ពេលវេលាដោយតាំងខ្លួនជាអ្នកបំរើ។
លោកប៊ុន សេរី បានថ្លែងកោតសរសើរដល់អាជ្ញាធរសង្កាត់, ភូមិក្នុងសង្កាត់សាកសំពៅ ពិសេសការចូលរួមរបស់ប្រជាពលរដ្ឋក្នុងការធ្វើឲ្យប្រសើរឡើងនូវការអនុវត្តគោលនយោបាយភូមិ-សង្កាត់មានសុវត្ថិភាពដែលធ្វើឲ្យភូមិសាស្ត្រសង្កាត់កាត់បន្ថយយ៉ាងច្រើនបទល្មើសផ្សេងៗធ្វើឲ្យប្រជាពលរដ្ឋយើងរីករាយក្នុងការរស់នៅ និងផ្តល់ទំនុកចិត្តដល់អាជ្ញាធរ៕
ចែករំលែកព័តមាននេះ