សាលារាជធានីភ្នំពេញកំពុងដំណើរការស្តារប្រឡាយ៣ខ្សែក្នុងខណ្ឌពោធិ៍សែនជ័យ
រាជធានីភ្នំពេញ ៖ លោកសាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញ និងលោកហែម ដារិទ្ធ អភិបាលខណ្ឌពោធិសែនជ័យ បានចុះទៅពិនិត្យមើល
រាជធានីភ្នំពេញ ៖ លោកសាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញ និងលោកហែម ដារិទ្ធ អភិបាលខណ្ឌពោធិសែនជ័យ បានចុះទៅពិនិត្យមើលសកម្មភាពស្តារប្រឡាយចំនួន៣ខ្សែក្នុងភូមិសាស្ត្រខណ្ឌពោធិសែនជ័យ ដែលសាលារាជធានីភ្នំពេញបានចាប់ផ្តើមដំណើរការស្តារតាំងពីដើមសប្តាហ៏កន្លងមក ដើម្បីរំដោះទឹកចេញពីភូមិសាស្ត្ររបស់ខណ្ឌពោធិសែនជ័យ និង១ផ្នែកទៀតរបស់ខណ្ឌដង្កោនៅរដូវវស្សានេះ ។
លោកសាំ ពិសិដ្ឋ បានឲ្យដឹងថា ប្រឡាយទាំង៣ខ្សែដែលកំពុងស្តារនាពេលនេះមានប្រឡាយទួលពង្រមានប្រវែង៧គីឡូម៉ែត្រ ទទឹងពី៦ទៅ៨ម៉ែត្រ ជំរៅពី៣ទៅ៤ម៉ែត្រ រួមទាំងគំរោងស្ថាបនាផ្លូវតាមមាត់ប្រឡាយផងដែរ។ ទី២-ប្រឡាយភូមិព្រៃទា ក្នុងសង្កាត់ចោមចៅប្រវែង៥គីឡូម៉ែត្រ, ទទឹងពី៦ទៅ៨ម៉ែត្រ និងខ្សែទី៣ គឺប្រឡាយ៣០អ៊ឹម(៣០M)ចាប់ពីផ្លូវជាតិលេខ៣ ដល់វត្តឬស្សីសាញ់ មានប្រវែង៦គីឡូម៉ែត្រ, ទទឹង៦ម៉ែត្រ។
លោកនាយកមន្ទីរឲ្យដឹងទៀតថា ប្រឡាយទាំង៣ខ្សែនេះបានបើកដំណើរការស្តារព្រមគ្នា បន្ទាប់ពីប្រឡាយនេះ មានស្ថានភាពគោករាក់ទើបអភិបាលរាជធានីភ្នំពេញបានណែនាំឲ្យស្តារប្រឡាយនេះជាចាំបាច់ និងឲ្យបានរួចរាល់នៅមុនរដូវវស្សាមកដល់។ ប្រឡាយទាំង៣ខ្សែនេះ មានតួនាទីសំខាន់ក្នុងការរំដោះទឹកជំនន់ទឹកភ្លៀងចេញពី ភូមិសាស្ត្រ និងកាត់បន្ថយការលិចលង់ពីតំបន់ជាច្រើនក្នុងសង្កាត់ចោមចៅពីកំណាត់ផ្លូវជាតិលេខ៣ និងលេខ៤។
កាត់បន្ថយការលិចលង់នៅចំណុចភូមិត្រពាំងពោធិ, ភូមិព្រៃព្រីងខាងត្បូង ព្រៃព្រីងខាងជើង, ព្រៃជីសាក់ និងតំបន់ជម្ពូវ័នក៏ដូចតំបន់ជុំវិញផងដែរ ។ លោកសាំ ពិសិទ្ធ និងលោកហែម ដារិទ្ធ បានសំណូមពរ និងសុំការយោគយល់ពីប្រជាពលរដ្ឋចំពោះផលប៉ះពាល់ក្នុងពេលកំពុងដំណើរការស្តារប្រឡាយនេះ និងសុំឲ្យមានការចូលរួមថែរក្សា ប្រឡាយទាំង៣ខ្សែនេះឲ្យបានល្អសំរាប់ប្រើប្រាស់ជាប្រយោជន៏រួម ពិសេសបំពេញតួនាទី បញ្ចេញជំនន់ទឹកភ្លៀងចេញពីភូមិឋានរបស់ប្រជាពលរដ្ឋដែលធ្លាប់តែលិចលង់កន្លងមក៕
ចែករំលែកព័តមាននេះ