ខេត្តកំពង់ស្ពឺ ៖ យ៉ាងហោចណាស់មនុស្សប្រុស ស្រី២នាក់បានរងរបួសធ្ងន់ និងម្នាក់ទៀតរបួសស្រាលក្នុងហេតុការណ៍គ្រោះថ្នាក់ចរាចរណ៍រវាងរថយន្តកាមរីឆ្លាមបើកបុកម៉ូតូធុនC125 ។ ក្រោយកើតហេតុជនរងគ្រោះត្រូវប្រជាពលរដ្ឋនៅក្បែរកន្លែងកើតហេតុបញ្ជូនទៅសង្គ្រោះនៅមន្ទីរពេទ្យបង្អែកខេត្តភ្លាមៗដែរ។
ហេតុការណ៍នេះបានកើតឡើងកាលពីវេលាម៉ោង១០ និង១៥នាទីព្រឹក ថ្ងៃទី១ មីនា ២០១៥ នៅតាមបណ្តោយផ្លូវជាតិលេខ៤ ចន្លោះគីឡូម៉ែត្រ៤៣-៤៤ ស្ថិតក្នុងភូមិរលាំងសង្កែ សង្កាត់សុពណ៌ទេព ក្រុងច្បារមន។
ជនរងគ្រោះត្រូវបានស្គាល់ឈ្មោះឃុន សុផល ភេទប្រុស អាយុ២១ឆ្នាំ និងប្រពន្ធឈ្មោះហួន ចិន្តា អាយុ២៣ឆ្នាំ ចំណែកប្អូនស្រីឈ្មោះឃុន ស្រីណាន អាយុ១៧ឆ្នាំ ។ អ្នកទាំង៣ ស់នៅក្រុងភ្នំពេញ ជាកម្មកររោងចក្រកាត់ដេរ និងមានស្រុកកំណើតនៅភូមិក្អែកពង ឃុំតាំងស្យា ស្រុកភ្នំស្រួច ចំណែកអ្នកបើកបររថយន្តឆ្លាមឈ្មោះសៅតុង ភេទប្រុស អាយុ៥៧ឆ្នាំ មានទីលំនៅភូមិអន្ទង់ខ្លឹន ឃុំមហាសាំង ស្រុកភ្នំស្រួច។
ប្រភពពីពលរដ្ឋនៅក្បែរកន្លែងកើតហេតុបានឱ្យដឹងថា មុនពេលកើតហេតុគេឃើញមនុស្សប្រុសស្រី៣នាក់ជិះម៉ូតូមួយគ្រឿងម៉ាកឌ្រីមC125 ពណ៌ខ្មៅ ធ្វើដំណើរពីលិចទៅកើត ខណៈមកដល់ចំណុចកើតហេតុស្រាប់តែមានរថយន្តឆ្លាមមួយគ្រឿងធ្វើដំណើរឆ្លងផ្លូវពីជើងទៅត្បូងបានបុកម៉ូតូពេញទំហឹងបណ្តាលឱ្យដួលរងរបួសរដូករណែលពេញផ្លូវត្រូវប្រជាពលរដ្ឋនៅក្បែរកន្លែងកើតហេតុបញ្ជូនតាមម៉ូតូឌុបទៅសង្គ្រោះនៅមន្ទីរពេទ្យបង្អែកខេត្តភ្លាមៗដែរ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ