ស្ត្រីអ្នកការទូតជាន់ខ្ពស់អាមេរិកម្នាក់ ថ្លែងកាលពីថ្ងៃទី ២៧ កុម្ភៈ កន្លងមកនេះថា លោកស្រី សង្ឃឹមថា សហរដ្ឋអាមេរិកនិងគុយបា អាចបើកស្ថានទូត មុនកិច្ចប្រជុំកំពូលរបស់បណ្តារដ្ឋនៅទ្វីបអាមេរិក ដែលគ្រោងធ្វើនាថ្ងៃទី១០ និង១១ មេសា ខាងមុខនេះ ។
លោកស្រី Roberta Jacobson អនុរដ្ឋមន្ត្រីការបរទេសអាមេរិក ទទួលបន្ទុកកិច្ចការអឌ្ឍគោលខាងលិច អះអាងបែបនេះក្រោយការចរចាគ្នាលើកទី២ រវាងក្រុងវ៉ាស៊ីនតោន និងក្រុងឡាហាវ៉ាន សំដៅស្តារឡើងវិញនូវទំនាក់ទំនងការទូត ។
ចំណែកលោកស្រី Josefina Vidal ប្រមុខគណៈប្រតិភូគុយបា ចូលរួមក្នុងការចរចា ថ្លែងទៅកាន់ក្រុមអ្នកកាសែតថា យើងសម្រេចបានការរីកចម្រើននានាក្នុងការចរចា ក៏ប៉ុន្តែនៅមានការខ្វែងគំនិតគ្នានានាទៀត ។
ការចរចាគ្នាកាលពីថ្ងៃទី២៧ កុម្ភៈ នៅក្រុងវ៉ាស៊ីនតោន ក្រោយការចរចាវគ្គទីមួយ កាលពីថ្ងៃទី២២ មករា នៅរដ្ឋធានីគុយបា ក្រុងឡាហាវ៉ាន ហើយការចរចានេះ ស្ថិតក្នុងដំណាក់កាលមួយនៃការអនុវត្តនយោបាយថ្មីរបស់អាមេរិក ចំពោះគុយបា ប្រកាសដោយលោកប្រធានាធិបតី ប៉ារ៉ាក់ អូបាម៉ា កាលពីខែធ្នូ ឆ្នាំ២០១៤ ៕
ចែករំលែកព័តមាននេះ