ប្រធានាធិបតីរុស្ស៊ី លោក វ៉្លាឌីមៀរ ពូទីន កាលពីថ្ងៃទី២៨ កុម្ភៈ សន្យាថា នឹងធ្វើអ្វីគ្រប់យ៉ាងដើម្បីដាក់ទោសពួកឃាតករបា.ញ់សម្លា.ប់មេដឹកនាំប្រឆាំងលោក បូរីស ណេមសូវ ដែលការធ្វើឃាតនោះ
ប្រធានាធិបតីរុស្ស៊ី លោក វ៉្លាឌីមៀរ ពូទីន កាលពីថ្ងៃទី២៨ កុម្ភៈ សន្យាថា នឹងធ្វើអ្វីគ្រប់យ៉ាងដើម្បីដាក់ទោសពួកឃាតករបាញ់សម្លាប់មេដឹកនាំប្រឆាំងលោក បូរីស ណេមសូវ ដែលការធ្វើឃាតនោះនាំឱ្យបណ្តាមេដឹកនាំលោកខាងលិច និងពួកប្រឆាំងរុស្ស៊ី សម្តែងការក្តុកក្តួល ចំណែកបណ្តាសម្ព័ន្ធមិត្តរបស់វិមានត្រឹមច្បាំងបរិហារការធ្វើឃាតនេះថា ជាការបង្កហេតុមួយសំដៅធ្វើឱ្យប្រទេសមានអស្ថិរភាព ។
ក្នុងសារចូលរួមមរណទុក្ខមួយផ្ញើជូនម្តាយលោកណេមសូវ លោកពូទីន អះអាងថា អ្វីគ្រប់យ៉ាងនឹងត្រូវធ្វើដើម្បីវែកមុខពួកអ្នករៀបចំ និងពួកអ្នកប្រព្រឹត្តអំពើឧក្រិដ្ឋដ៏កំសាកនេះឱ្យទទួលទោសសមនឹងអំពើរបស់ពួកគេ ។
ពេលដែលប៉ូលិសកំពុងតាមរកពួកឃាតករ មនុស្សជាច្រើនពាន់នាក់បាននាំគ្នាដាក់ផ្កា និងបាច់ផ្កាកាលពីថ្ងៃទី២៨ កុម្ភៈ នៅលើស្ពានមួយ ស្ថិតនៅក្បែររបងវិមានក្រឹមឡាំង ជាកន្លែងដែលមេដឹកនាំប្រឆាំងរុស្ស៊ី អាយុ៥៥ឆ្នាំរូបនោះត្រូវគេបាញ់សម្លាប់មុននេះបន្តិចនាពាក់កណ្តាលយប់ ពេលលោកដើរលេងជាមួយនារីវ័យក្មេងម្នាក់ ទើបមកពីអ៊ុយក្រែន ដែលគេអាចចាត់ទុកថាជាមិត្តស្រីរបស់លោក ។
ការដើរហែក្បួនមួយរបស់ពួកប្រឆាំងកាត់កណ្តាលក្រុងមូស្គូ ជាការគោរពវិញ្ញាណក្ខ័ន្ធលោក ណេម សូវ ត្រូវបានអាជ្ញាធរអនុញ្ញាតដោយការដើរហែក្បួននោះត្រូវធ្វើនារសៀលថ្ងៃទី១ មីនា ។
យោងតាមគណៈកម្មាធិការស៊ើបអង្កេតក្រុងមូស្គូផ្អែកលើភស្តុតាងប្រមូលបានដំបូងនានាថា ការធ្វើឃាតលោក បូរីស ណេមសូវ អតីតឧបនាយករដ្ឋមន្ត្រីរបស់លោក បូរីស យែលស៊ីន ហើយក្លាយជាមេដឹកនាំប្រឆាំងរ៉ាឌីកាល់ ចំពោះលោកពូទីន ត្រូវបានគេរៀបចំផែនការទុកយ៉ាងល្អិតល្អន់ ។ នាវេលាម៉ោង២៣និង១៥នាទីម៉ោងក្នុងស្រុក រថយន្ត១គ្រឿងបានបើកមកក្បែរអ្នកទាំង២ ហើយមនុស្សម្នាក់បានបាញ់ប្រហារត្រូវខ្នងលោក ណេមសូវ ៤គ្រាប់ បណ្តាលឱ្យលោកស្លាប់នៅនឹងកន្កែង ។
បណ្តារូបភាពផ្សាយតាមទូរទស្សន៍រុស្ស៊ី TVC កាលពីយប់ថ្ងៃទី២៨ កុម្ភៈ ដោយរូបភាពទាំងនោះ យកពីកាមេរ៉ាត្រួតពិនិត្យតាំងនៅឆ្ងាយពីស្ពាន បង្ហាញពីឆាកនៃការធ្វើឃាតនោះ ទោះបីជារូបភាពទាំងនោះពុំសូវច្បាស់ក្តី ។ ក្នុងពេលបាញ់ប្រហារគេឃើញលោក ណេមសូវ និងសង្សារពួនអែបក្បែរគ្រឿងចក្រឈូសព្រិល មួយ ។ បន្ទាប់មកគេឃើញមនុស្សម្នាក់ដែលជាឃាតកររត់ទៅលើថ្នល់ មុនឡើងលើរថយន្តមួយគ្រឿងដែលនៅរង់ចាំជាស្រេចហើយចាកចេញពីទីនោះ ។
បណ្តាលមេដឹកនាំលោកខាងលិចក្នុងនោះរួមមានប្រធានាធិបតីអាមេរិក លោក បារ៉ាក់ អូបាម៉ា ភ្លាមៗបានថ្កោលទោសការបាញ់សម្លាប់មេដឹកនាំប្រឆាំងរូបនេះយ៉ាងសាហាវព្រៃផ្សៃ ហើយអំពាវនាវឱ្យមានការសើុបអង្កេតដ៏មានប្រសិទ្ធភាពមួយ ។
ចំណែកប្រធានាធិបតីអ៊ុយក្រែន លោក ប៉េត្រូ ប៉ូរ៉ូឆេនកូ វិញ បញ្ចេញប្រតិកម្មថា លោក បូរីស ណេមសូវ ជាស្ពានមួយរវាងអ៊ុយក្រែន និងរុស្ស៊ី ហើយស្ពាននោះត្រូវបានបំផ្លាញដោយគ្រាប់កាំភ្លើងរបស់ឃាតករម្នាក់ ។ ខ្ញុំគិតថានោះពុំមែនជារឿងចៃដន្យមួយឡើយ ។
ប៉ុន្មានម៉ោងមុនត្រូវគេសម្លាប់លោក ណេមសូវ បានអំពាវនាវដល់ពលរដ្ឋរុស្ស៊ី តាមវិទ្យុក្រុងមូស្គូ ឱ្យនាំគ្នាធ្វើបាតុកម្មនាថ្ងៃទី១ មីនា នៅក្រុងមូស្គូ ប្រឆាំងការឈ្លានពានរបស់លោកពូទីន នៅអ៊ុយក្រែន ។ បាតុកម្មនោះត្រូវបានលុបចោលវិញ ប្រែក្លាយទៅជាការដើរក្បួនគោរពវិញ្ញាណក្ខ័ន្ធរបស់មេដឹកនាំប្រឆាំងរូបនេះទៅវិញ ។
ចំពោះបណ្តាមនុស្សជំនិតនៃវិមានក្រឹមឡាំងនិយាយថា ការធ្វើឃាតនេះមានលក្ខណៈបង្កហេតុដែលបង្កឱ្យមានគ្រោះថ្នាក់ដល់ស្ថិរភាពរបស់រុស្ស៊ី ។ អ្នកនាំពាក្យវិមានក្រឹមឡាំង លោក ឌីមីទ្រី ប៉េស្កូវ និយាយថា លោក ពូទីន ចាត់ទុកការធ្វើឃាតនោះថាជាអំពើដ៏សាហាវ ដោយមានអ្នកបញ្ជានៅពីក្រោយក្នុងគោលបំណងធ្វើការបង្កហេតុ ។
ប្រមុខគណបក្សកុំមុយនីស្តរុស្ស៊ី លោកហ្គេនណាឌី ហ្ស៊ីអ៊ូហ្គាណូវ ធ្វើអត្ថាធិប្បាយថា ពិតណាស់គេធ្វើឱ្យមានឈាមហូរដើម្បីឱ្យផ្ទុះចលាចលនៅកណ្តាលក្រុងមូស្គូ ។ អ្នកទទួលខុសត្រូវម្នាក់ទៀតនៃគណបក្សនេះ លោក អីុវ៉ាន មែលនីសូវ យល់ថា នោះជាការបង្កហេតុសំដៅបង្កើតភាពស្អប់ខ្ពើមប្រឆាំងរុស្ស៊ីនៅឯបរទេស ។
អតីតជនលេខមួយសហភាពសូវៀត លោកមីខាអីុលហ្គ័រ បាឆូវ និយាយថា ការស្លាប់របស់លោកណេមសូវ នាំឱ្យមានការបារម្ភថាពួកឃាតករពុំអាចចាប់បាន ។ លោកគូសបញ្ជាក់ថា គេត្រូវតាមរកពួកឃាតករ ប៉ុន្តែរឿងឧក្រិដ្ឋប្រភេទនេះជួនកាលវាពិបាកវែកមុខណាស់ ៕
ចែករំលែកព័តមាននេះ