អ្នកកាសែតរូបថតម្នាក់ និងអ្នកស្ម័គ្រចិត្តម្នាក់ជាជនជាតិអ៊ុយក្រែនដូចគ្នាបានស្លាប់កាលពីថ្ងៃទី២៨ កុម្ភៈ នៅភាគខាងកើតអ៊ុយក្រែន តំបន់របស់ពួកបំបែកខ្លួនស្និទ្ធរុស្ស៊ី ទោះបីជាមានបទឈប់បាញ់គ្នាដ៏ផុយស្រួយដែលនាំឱ្យមានការភ័យខ្លាចលើការផ្ទុះជាថ្មីនៃការប្រយុទ្ធគ្នា ។
អ្នកថតរូបឱ្យកាសែតអ៊ុយក្រែន SEGODNIA លោកស័រហ្គីអីុ នីកូឡាអីុយេវ និងយុទ្ធជនម្នាក់នៃកងជីវពលជាតិនិយម PRAVY SEKTOR ត្រូវស្លាប់នៅពីស្គី ជាភូមិមួយស្ថិតនៅក្បែរព្រលានយន្តហោះក្រុងដូណេតស្ក៍ដែលរងការបំផ្លាញដោយសង្គ្រាម ។
ទោះបីយ៉ាងណា កងទ័ពអ៊ុយក្រែនរៀបរាប់ពីការចុះថយច្រើននៃការបាញ់ប្រហារនាយប់ថ្ងៃទី២៧ មក ២៨ កុម្ភៈ បន្ទាប់ពីអំពើហិង្សាដែលសម្លាប់ទាហានអ៊ុយក្រែន៣នាក់នៅជិតព្រលានយន្តហោះក្រុងដូណេតស្ក៍ ក្នុងការវាយប្រហារមួយរបស់ពួកឧទ្ទាមគាំទ្រដោយរថក្រោះ និងកាំភ្លើងត្បាល់ ។
អ្នកនាំពាក្យយោធាអ៊ុយក្រែន លោកអានឌ្រីអីុលូសេនកូ រៀបរាប់ពីការប៉ះទង្គិចគ្នាមួយរវាងកងទ័ពអ៊ុយក្រែន និងពួកឧទ្ទាមនៅជុំវិញព្រលានយន្តហោះក្រុងដូណេតស្ក៍ រយៈពេល២៤ម៉ោងចុងក្រោយនេះ តែពុំបណ្តាលឱ្យមានទាហានស្លាប់ឡើយក្រៅពីរបួស៣នាក់ ៕
ចែករំលែកព័តមាននេះ