រាជធានីភ្នំពេញ ៖ ការប្រកួតប្រដាល់ជាលក្ខណៈមិត្តភាពអន្តរជាតិនៅលើសង្វៀនទូរទស្សន៍អប្សរា ក្រោមការជួយឧបត្ថម្ភពីណាហ្គាវើលរៀងរាល់មួយខែម្តងនោះ គឺទទួលបានការគាំទ្រយ៉ាងខ្លាំងពីសំណាក់អ្នកដែលនិយមទស្សនាការប្រកួតប្រដាល់ក្បាច់គុនបុរាណខ្មែរ ជាពិសេសឈុតឆាកនៃការប្រកួតរវាងកីឡាករកម្ពុជា និងកីឡាករថៃតែម្តង ។ ក្នុងការប្រកួតកន្លងមក កីឡាករកម្ពុជាកម្រចាញ់ណាស់ ប៉ុន្តែសម្រាប់ការប្រកួតកាលពីរសៀលថ្ងៃសៅរ៍ ទី២៨ កុម្ភៈ កន្លងមកនេះបានធ្វើឱ្យអ្នកទស្សនាមានការខកចិត្តយ៉ាងខ្លាំង ដោយសារតែអ្នកប្រដាល់ជើងខ្លាំងកម្ពុជា២រូបបានចាញ់បាក់មុខនៅលើសង្វៀនក្រោមដៃកីឡាករថៃទាំង២នាក់តែម្តង ។
ហ៊ុន ឈុនហេង មកពីក្លិបសម្រែករាជសីហ៍បង្ក្រាបគ្រឿងញៀន ត្រូវកីឡាករថៃ Dav Saiyam Kietkamphon ទាត់ត្រូវកញ្ចឹងកមួយជើងយ៉ាងពេញទំហឹងបណ្តាលឱ្យដួលសន្លប់ក្រោកលែងរួចនៅត្រឹមទឹកទី៣ ។ ចំណែក ឡៅ ចន្ទ្រា មកពីក្លិបកងពលតូចឆត្រយោង៩១១ ត្រូវកីឡាករថៃ Back Jo Kietkamphon ម៉ាត់ចូលមុខជាច្រើនដៃបណ្តាលឱ្យសន្លប់ស្តូកនៅត្រឹមទឹកទី១ បុ៉ណ្ណោះ ។ ការបរាជ័យរបស់កីឡាករកម្ពុជាទាំង២រូបនេះមិនត្រឹមតែធ្វើឱ្យគ្រូបង្វឹកបាក់មុខបុ៉ណ្ណោះទេ ថែមទាំងធ្វើឱ្យអ្នកគាំទ្រកម្ពុជាភាគច្រើនមានការស្រងាកចិត្តយ៉ាងខ្លាំង ព្រោះតែពួកគេទាំង២នាក់សុទ្ធតែជាជើងខ្លាំងគួរឱ្យទុកចិត្តបំផុត បែរជាមកសន្លប់ក្រោមកណ្តាប់ដៃកីឡាករថៃយ៉ាងងាយបែបនេះទៅវិញ ។
រីឯការប្រកួតរវាងកីឡាករកម្ពុជាគ្នាឯងវិញ កីឡាករបាង កាយ៉ាក មកពីក្លិបអប្សរាក្បាច់គុនខ្មែរ បានយកឈ្នះពិន្ទុកីឡាករហ៊ុល ដារ៉ា មកពីក្លិបសាលវ័ន្តកីឡា ។ កីឡាករកំពែង ខ្មៅ មកពីសមាគមកីឡាប្រដាល់ក្រសួងកសិកម្ម បានយកឈ្នះពិន្ទុកីឡាករឡុង បញ្ញា មកពីក្លិបសាលវ័ន្តកីឡា ។ កីឡាករផល ប្រុសខួច មកពីក្លិបគិរីវង់សុខសែនជ័យ បានយកឈ្នះពិន្ទុកីឡាករអឿន សាវលិញ មកពីសមាគមកីឡាប្រដាល់ខេត្តកោះកុង និងកីឡាករធី សំណាង មកពីសមាគមកីឡាប្រដាល់ក្រសួងការពារជាតិ ក៏បានយកឈ្នះពិន្ទុកីឡាករផល ខ្ទឹម មកពីក្លិបគិរីវង់សុខសែនជ័យដូចគ្នាដែរ ៕
ចែករំលែកព័តមាននេះ