រាជធានីភ្នំពេញ ៖ មជ្ឈមណ្ឌលហ្វឹកហ្វឺនកីឡាជាតិ កាលពីថ្ងៃសុក្រ ទី២៧ កុម្ភៈ កន្លងមកនេះបានរៀបចំពិធីសំណេះសំណាលមួយរវាងមន្ត្រីអគ្គនាយកដ្ឋានអប់រំកាយ និងកីឡា
រាជធានីភ្នំពេញ ៖ មជ្ឈមណ្ឌលហ្វឹកហ្វឺនកីឡាជាតិ កាលពីថ្ងៃសុក្រ ទី២៧ កុម្ភៈ កន្លងមកនេះបានរៀបចំពិធីសំណេះសំណាលមួយរវាងមន្ត្រីអគ្គនាយកដ្ឋានអប់រំកាយ និងកីឡា ជាមួយកីឡាករ-កីឡាការិនីមកពីសហព័ន្ធកីឡាចំនួន៣ ដែលត្រូវបានក្រសួងអប់រំ យុវជន និងកីឡា បញ្ជូនឱ្យទៅហ្វឹកហាត់នៅប្រទេសមីយ៉ាន់ម៉ា និងប្រទេសថៃ គឺកីឡាសី Chinlone សីប៉ាក់តាក្រ និងកីឡាទ្រីយ៉ាត្លុង ។
លោកប៉ុន សុខ នាយកមជ្ឈមណ្ឌល ហ្វឹកហ្វឺនកីឡាជាតិបានឱ្យដឹងថា ប្រភេទកីឡាដែលត្រូវបញ្ជូនឱ្យទៅធ្វើការហ្វឹកហាត់នៅប្រទេសមីយ៉ាន់ម៉ានោះ គឺកីឡាសី Chinlone ដែលមានទាំងកីឡាករ និងអនុរក្ស ព្រមទាំងគ្រូបង្វឹកទៀតផងនោះចំនួន១០នាក់ ។ អ្នកដឹកនាំប្រតិភូកីឡាទៅចូលរួមប្រកួតមានលោកលន់ ចន្ធូ ជាអនុរក្ស លោកឈួន បុ៉ណ្ណរ៉ា ជាគ្រូជំនួយ។ ចំណែកកីឡាករមានដូចជា អឹុង ណារិទ្ធ, ជិន សុវណ្ណារិទ្ធ, រៀម សុខភីរម្យ, ហេង រ៉ាវុធ, ជាតិ ខេមរិន្ទ, សុភៈ ចននី, ណាង សុភាព និងកីឡាករត្រឹង លី ។ ប្រភេទកីឡាសីប៉ាក់តាក្រដែលត្រូវទៅហ្វឹកហាត់នៅប្រទេសថៃវិញនោះប្រធានប្រតិភូដឹកនាំ គឺលោកស៊ិន សុតុលា ជាអនុរក្ស លោកជាតិ ខេមរា ជាគ្រូបង្វឹក លោកស្រីយ៉ែម ប៉ព្រៀង គ្រូជំនួយ ។ ក្រៅពីនោះជាកីឡាការិនីទាំងអស់មាន៨រូបមានដូចជាកីឡាការិនីសន សុភាព, ពេជ្រ សុផា, ងួន ច័ន្ទបូរមី, សុទ្ធ ស្រីលក្ខណ៍, ឯម ពិសិដ្ឋ, អ៊ុក សុខសាន្ត, ចន ពេជ្រញ៉ា និងកីឡាការិនីសន សោភ័ណ្ឌ ។ ចំពោះប្រភេទកីឡាទ្រីយ៉ាត្លុងដែលត្រូវធ្វើដំណើរទៅហ្វឹកហាត់នៅប្រទេសថៃដូចគ្នាមានទាំងអស់ចំនួន៦រូប គឺប្រធានប្រតិភូដឹកនាំដោយលោកស្រី សូវ៉ាន់ដេត ជាគ្រូបង្វឹក លោកឡាក់ ពុទ្ធិសិទ្ធិ ជាអនុរក្ស និងកីឡាករ៤រូបទៀតមានកីឡាករឈុន ប៊ុនថន, ចេង ចាន់តារ៉ា, សែ សុភស និងអាង ពេជ្រពិសិដ្ឋ ។
លោកប៉ុន សុខ បានឱ្យដឹងទៀតថា ប្រភេទកីឡាទ្រីយ៉ាត្លុងដែលត្រូវធ្វើដំណើរទៅហ្វឹកហាត់នៅប្រទេសថៃនោះ គឺមានរយៈពេល១ខែគិតចាប់ពីថ្ងៃទី១ ដល់ថ្ងៃទី៣១ ខែមីនា ។ ចំណែកសីប៉ាក់តាក្រត្រូវទៅហ្វឹកហាត់នៅប្រទេសថៃដូចគ្នា គឺចាប់ពីថ្ងៃទី១ ខែមីនា ដល់ថ្ងៃទី១៥ ខែមេសា និងប្រភេទកីឡាសី Chinlone ត្រូវធ្វើដំណើរទៅហាត់នៅប្រទេសមីយ៉ាន់ម៉ា ចាប់ពីថ្ងៃទី១ ខែមីនា ដល់ថ្ងៃទី២៥ ឧសភា ។
លោកអ៊ុក សិទ្ធិជាតិ អគ្គនាយកអគ្គនាយកដ្ឋានកីឡានៃក្រសួងអប់រំ យុវជន និងកីឡា បានមានប្រសាសន៍ផ្តាំផ្ញើដល់កីឡាករ-កីឡាការិនីទាំងអស់ត្រូវខិតខំប្រឹងប្រែងហ្វឹកហាត់ឱ្យបានខ្លាំងក្លាបំផុត កុំមានការធ្វេសប្រហែសឱ្យសោះព្រោះថា នៅសល់រយៈពេលមិនវែងប៉ុន្មានទៀតទេ នឹងត្រូវធ្វើដំណើរទៅប្រកួតកីឡាស៊ីហ្គេមលើកទី២៨ នៅប្រទេសសិង្ហបុរីហើយ ។ លោកក៏បានលើកឡើងអំពីប្រសាសន៍លោករដ្ឋមន្ត្រី ថោង ខុន ប្រធានគណៈកម្មាធិការជាតិអូឡាំពិកកម្ពុជា ដែលបានថ្លែងឱ្យដឹងនៅក្នុងឱកាសធ្វើមហាសន្និបាតបូកសរុបការងារប្រចាំឆ្នាំ២០១៤ និងទិសដៅការងារសម្រាប់ឆ្នាំ២០១៥ កន្លងទៅនេះថា វិញ្ញាសាកីឡាសីប៉ាក់តាក្រ គឺជាប្រភេទកីឡាដែលយើងមានជំនឿចិត្តក្នុងការដណ្តើមយកមេដាយបន្ទាប់ពីកីឡាប៊ូល និងប៉េតង់ ។ ដូច្នេះលោកសំណូមពរហើយសំណូមពរទៀត ធ្វើយ៉ាងណាត្រូវខិតខំត្រងត្រាប់ស្តាប់គ្រូ និងគោរពវិន័យឱ្យបានល្អដើម្បីក្លាយជាកីឡាករល្អ និងពូកែដណ្តើមមេដាយជូនជាតិឱ្យបាន ៕
ចែករំលែកព័តមាននេះ