សរ រាជសីហ៍ និងផុន ផាន់ណា បង្កើនសន្ទុះលើសង្វៀន
រាជធានីភ្នំពេញ ៖ នៅក្នុងព្រឹត្តិការណ៍ប្រដាល់ដណ្ដើមខ្សែក្រវាត់ K-Cement កាលពីថ្ងៃទី២៨ កុម្ភៈ ឆ្នាំ២០១៥ កីឡាករ២រូប គឺសរ រាជសីហ៍ និងកីឡាករផុន ផាន់ណា បានក្លាយជាគូឯកទទួល
រាជធានីភ្នំពេញ ៖ នៅក្នុងព្រឹត្តិការណ៍ប្រដាល់ដណ្ដើមខ្សែក្រវាត់ K-Cement កាលពីថ្ងៃទី២៨ កុម្ភៈ ឆ្នាំ២០១៥ កីឡាករ២រូប គឺសរ រាជសីហ៍ និងកីឡាករផុន ផាន់ណា បានក្លាយជាគូឯកទទួលការចាប់អារម្មណ៍គួរឲ្យកត់សម្គាល់។ ក្នុងតំណែងជាគូឯក អ្នកទាំងពីរបង្កើនសន្ទុះបានយ៉ាងប្រសើរនៅលើសង្វៀនប្រកួត ។
នេះជាការឡើងប្រកួតប៉ះគ្នាដ៏កម្រចាប់តាំងពីកីឡាករទាំងពីរបានក្លាយជាជើងខ្លាំងនៅលើសង្វៀនប្រដាល់ ។ យ៉ាងណាក៏ដោយ កីឡាករបង្គោលក្រហមផុន ផាន់ណា ក៏បានសារភាពដោយត្រង់ថា មិនបានវាយលុកទៅលើគូប្រកួតបានអស់ពីសមត្ថភាពនោះផងដែរ បើទោះជាក្នុងការប្រកួតក៏បានតតាំងគ្នាពេញរយៈពេល៥ទឹក ។ នោះបណ្ដាលមកពីផុន ផាន់ណា ដែលត្រូវគេស្គាល់ថា ជាកីឡាករដែលមានស្នាដៃ និងមានកម្រិតកម្របរាជ័យជាមួយគូប្រកួតបែរជាធ្លាក់ដៃបណ្ដោយឲ្យចាញ់កីឡាករសរ រាជសីហ៍ នៅវគ្គចុងក្រោយ ។ ជ័យជម្នះបង្គោលខៀវបានរុញឲ្យក្រេឌីតក្នុងចំណោមអ្នកទស្សនាភាគច្រើនឈានឡើងមួយកម្រិត ខណៈដែលមុនការប្រកួតមិនមានអ្នកគាំទ្រច្រើនណាស់ណាទាល់តែសោះថា ផុន ផាន់ណា នឹងចាញ់ការប្រកួត ។ ពេញការប្រកួត៤ទឹកដំបូងម្នាក់ៗសុទ្ធតែបញ្ចេញស្នាដៃដាក់គ្នាបានល្អ និងធ្វើឲ្យការប្រកួតទទួលបានការចាប់អារម្មណ៍មិនធម្មតា បើធៀបនឹងវត្តមានគូប្រកួតសន្សំពិន្ទុក្នុងជុំទី៣ របស់កីឡាករទាំង៨ ។ គូនេះនឹងត្រូវបើកឆាកសងសឹកគ្នាជាថ្មីម្ដងទៀត ប៉ុន្តែមិនទាន់ច្បាស់ថា នឹងកើតឡើងនៅក្នុងព្រឹត្តិការណ៍ណាមួយរបស់ស្ថានីយទូរទស្សន៍អាស៊ីអាគ្នេយ៍នោះទេ ដោយសារតែស្ថាប័នមួយនេះមានការប្រកួតច្រើនសង្វៀន ។ កីឡាករផុន ផាន់ណាបានអះអាងថា ខ្លួនប្រកួតមិនទាន់អស់ដៃនោះឡើយដោយសារតែមានបញ្ហាសម្រាកមិនគ្រប់គ្រាន់នៅមុនការប្រកួតចាប់ផ្ដើម ។ អញ្ចឹងហើយទើបលោកសម្ដែងការពេញចិត្តនៅពេលមានការប្រកាសថា នឹងរៀបឲ្យសងសឹកជាមួយ សរ រាជសីហ៍ ក្នុងពេលខាងមុខ ។ ជាលទ្ធផលអ្នកទាំងពីរទទួលបានការចាប់អារម្មណ៍ខ្លាំងដូចគ្នា ដោយមិនគិតពីរឿងឈ្នះចាញ់ដែលបានកើតឡើងកាលពីរសៀលថ្ងៃសៅរ៍នៅលើសង្វៀនទូរទស្សន៍អាស៊ីអាគ្នេយ៍នោះ ។ មិនយូរប៉ុន្មាន ឱកាសឡើងប្រកួតក្នុងនាមជាគូអន្តរជាតិនឹងធ្លាក់ចូលដៃមិនយូរមិនឆាប់បន្ទាប់ពីធ្វើឲ្យបែកផ្កាភ្លើងក្នុងតំណែងជាគូឯកលើកនេះ ។
ងាកមកកាន់ការប្រកួតរបស់កីឡាករ៨រូបដែលមានមុខបើកឆាកប្រយុទ្ធសន្សំពិន្ទុនៅក្នុងព្រឹត្តិការណ៍ដណ្ដើមខ្សែក្រវាត់នោះវិញ ក៏បានទទួលការចាប់អារម្មណ៍មិនធម្មតា បន្ទាប់ពីកីឡាករដែលឈ្នះក្នុងជុំទី៣ ក៏ទទួលបានពិន្ទុកាន់តែខ្ពស់ ឯអ្នកចាញ់ត្រូវគេមើលឃើញថា ទំនងជាត្រូវបង្កើនសន្ទុះខ្លាំងជាងនេះ ដើម្បីមុខមាត់ ។ សម្រាប់ការប្រកួតគូទី១ កីឡាករមាស ច័ន្ទមាន ឬ សារឹម ង៉ា ដណ្ដើមបាន៣ពិន្ទុជាលើកទី៣ បន្ទាប់ពីការប្រកួតក្នុងជុំទី១ និងទី២ ទទួលបាន៦ពិន្ទុនាំមុខគេរួចទៅហើយ។ លោកយកឈ្នះកីឡាករឱម សំរេច ដែលក្នុងការប្រកួត៣លើក គឺបានត្រឹមតែឈ្នះ១ចាញ់២ ស្មើនឹង៥ពិន្ទុ ។ គូនេះប្រកួតគ្នា៥ទឹកពេញ ដោយមានន័យថា ក្នុងចំណោមកីឡាករដែល មាស ច័ន្ទមាន បានប៉ះប្រកួតក្នុងវគ្គសន្សំពិន្ទុ មានតែ ឱម សម្រេច ម្នាក់ប៉ុណ្ណោះ ដែលមានសមត្ថភាពតតាំងជាមួយដល់ពេញ៥ទឹក និងបានធ្វើឲ្យកីឡាករចាស់វស្សារូបនេះឈ្នះទាំងលំបាក។ ងាកមកការប្រកួតគូទី២ កីឡាករថុល មករា បានឈ្នះកីឡាករណាម ម៉ូរ៉ាក់ ក្នុងទឹកទី១ ហើយទទួលបាន៥ពិន្ទុយ៉ាងងាយបំផុត ស្មើពិន្ទុកីឡាករឱម សម្រេច ។ នេះជាជ័យជម្នះលើកទី២ ក្នុងចំណោមការប្រកួតទាំង៣ជុំ ដែលបានធ្វើឡើងនៅក្នុងព្រឹត្តិការណ៍ដណ្ដើមខ្សែក្រវាត់K- Cement ។ ថុល មករា មាន៧ពិន្ទុក្នុងដៃ ដែលនេះគឺជាពិន្ទុប្រកិតៗនឹងកីឡាករមាស ច័ន្ទមាន ដែលច្បាស់ណាស់ថា គឺមិនពិបាកសម្រាប់ការប្រដេញពិន្ទុជាមួយអ្នកមានពិន្ទុនាំមុខនោះឡើយ ។ គូបន្ទាប់កីឡាករសូត្រ ប៊ុនធី បានឈ្នះជាលើកទី៣ លើកីឡាករកីឡាករជ័យ ប៊ុនសង់ ត្រឹមតែប្រើរយៈពេល៣ទឹកប៉ុណ្ណោះ។ លោកក្ដោបបាន៩ពិន្ទុស្មើនឹងកីឡាករមាស ច័ន្ទមាន ក្នុងចំណោមកីឡាករ៨រូបដែលមានពិន្ទុកំពូល ។ ប៉ុន្តែមិនមែនមានន័យថា អ្នកមានពិន្ទុ៩ក្នុងដៃ ជិះសេះលែងដៃនោះឡើយក្នុងពេលដែលអ្នកមាន៧ពិន្ទុ គឺមានដល់ទៅ២រូបហើយក៏មានសមត្ថភាពមិនធម្មតាសម្រាប់ឱកាសប៉ែងជើងយកឈ្នះ ។ ឆ្លងកាត់វគ្គនេះម្នាក់ៗនៅសល់៤ប្រកួតទៀតទើបកាន់តែធ្វើឲ្យអ្នកមានពិន្ទុខ្ពស់កាន់តែប្រយ័ត្ន ឯអ្នកមានពិន្ទុក្នុងលំដាប់បន្ទាប់ ក៏រឹតតែត្រូវបង្កើនល្បឿន ។ អ្នកមានពិន្ទុទាប ក៏នឹងអាចកែប្រែការបរាជ័យបានដែរ ប្រសិនបើអាចឈ្នះទាំង៤ប្រកួតចុងក្រោយ បើទោះនោះនឹងពិបាកទៅរួច ព្រោះតែអ្នកដែលមានពិន្ទុខ្ពស់ ក៏កាន់តែពង្រឹងកម្រិតបច្ចេកទេសដូចគ្នា ។ គូទី៤ ចុងក្រោយកីឡាករឃីម បូរ៉ា ដែលរងការរិះគន់ថាវាយធ្លាក់ដៃ និងកន្លងមកមិនព្រមបើកឆាកស៊ីផុយលើគូប្រកួតនោះហាក់ស្រូតយកឈ្នះខុសពីមុន ដោយសារតែបានផ្ដួលកីឡាករលាស់ យីន ឲ្យសន្លប់ទឹកទី១ ។ ឃីម បូរ៉ា មានពិន្ទុ៧ មិនអន់ជាងអ្នកមាន៩ពិន្ទុដាច់ឆ្ងាយនោះទេ ទើបការប្រកួតសន្សំពិន្ទុនៅវគ្គក្រោយៗនឹងក្លាយជាសង្វៀនកាន់តែតានតឹងបំផុតសម្រាប់អ្នកមានពិន្ទុ៩ និងពិន្ទុ៧ ទាំង៤រូប ៕
ចែករំលែកព័តមាននេះ