រាជធានីភ្នំពេញ ៖ រថយន្តឡង់គ្រីស្ស័រពាក់ស្លាកលេខ«នគរបាល»១គ្រឿងបើកបរដោយបុរសម្នាក់ដែលគេស្គាល់ថាជាមន្ត្រីនគរបាលអន្តោប្រវេសន៍ បើកលឿនពេករេចង្កូតទៅបុកដើមស្វាយ ដើមស្នាយ និងដើមដូង ក្រឡាប់សង្កត់លើ បណ្តាលឲ្យអ្នកជិះក្នុងរថយន្ត៤នាក់ រងរបួសធ្ងន់ម្នាក់ និងស្រាល៣នាក់ ។ ហេតុការណ៍នេះកើតឡើងនៅវេលាម៉ោង៣ និង២០នាទីរសៀល ថ្ងៃទី២៨ ខែកុម្ភៈ ឆ្នាំ២០១៥ តាមផ្លូវជាតិលេខ១ មុខកន្លែងលក់ដើមឈើ ក្នុងភូមិជ្រោយអំពិល សង្កាត់ក្បាលកោះ ខណ្ឌច្បារអំពៅ ។
សាក្សីនៅកន្លែងកើតហេតុបានឲ្យដឹងថា មុនពេលកើតហេតុរថយន្តម៉ាកឡង់គ្រីស្ស័រ ពណ៌ខ្មៅ ពាក់ស្លាកលេខ នគរបាល ២-១៥៥៨ ជិះគ្នា៤នាក់ បើកបរដោយយុវជនវ័យក្មេង ដែលគេស្គាល់ថាជាមន្ត្រីនគរបាលអន្តោប្រវេសន៍ ហើយក៏ជាកូនរបស់មន្ត្រីនគរបាលអន្តោប្រវេសន៍ផងដែរ បើកបរពីកើតទៅលិច មកដល់ចំណុចខាងបានបួងចង្កូតទៅខាងឆ្វេងដៃទៅបុកបាក់ដើមស្វាយ១ដើម ដើមដូង១ដើម និងដើមស្នាយ១ដើម ធ្វើឲ្យក្រឡាប់សង្កត់លើដើមឈើទាំង៣ដើម បណ្តាលឲ្យរថយន្តផ្ទុះពោងសុវត្ថិភាព ចំណែកអ្នកជិះក្នុងរថយន្តបានលូនចេញពីក្នុងរថយន្ត ដោយរងរបួសធ្ងន់ម្នាក់ និងស្រាល៣នាក់ ។
ក្រោយពេលកើតហេតុ ម្ចាស់កូនឈើបានចរចាជាមួយម្ចាស់រថយន្តទាមទារសំណង១៨៣០ដុល្លារ ដោយធ្វើការចរចាគ្នារហូតដល់យប់ទើបខាងរថយន្តសង១២០០ដុល្លារបញ្ចប់រឿង ៕
ចែករំលែកព័តមាននេះ