ខេត្តកំពង់ឆ្នាំង ៖ បុរសម្នាក់ត្រូវប្រជាពលរដ្ឋប្តឹងសមត្ថកិច្ចឱ្យចាប់ខ្លួន បន្ទាប់ពីបានលួចចាប់គោញី១ក្បាលដែលគេលែងឱ្យស៊ីស្មៅនៅចំណុចព្រៃស្តុកក្រៀល បំណងយកលក់
ខេត្តកំពង់ឆ្នាំង ៖ បុរសម្នាក់ត្រូវប្រជាពលរដ្ឋប្តឹងសមត្ថកិច្ចឱ្យចាប់ខ្លួន បន្ទាប់ពីបានលួចចាប់គោញី១ក្បាលដែលគេលែងឱ្យស៊ីស្មៅនៅចំណុចព្រៃស្តុកក្រៀល បំណងយកលក់យកលុយសងអង្គការដែលគេជំពាក់៣ពាន់ដុល្លារ។
ករណីនេះបានធ្វើឡើងនៅម៉ោង២ និង៣០នាទីរសៀល ថ្ងៃទី២៧ កុម្ភៈ ២០១៥ ក្នុងភូមិបឹងស្ទេង ឃុំខ្លូងពពក ស្រុកទឹកផុស។ លោកនាយការិយាល័យនគរបាលព្រហ្មទណ្ឌ
កំរិតស្រាលខេត្តបានឱ្យដឹងថា បុរសខាងលើនេះមានឈ្មោះ នៅ ធីម អាយុ៣៥ឆ្នាំ រស់នៅភូមិតាំងធ្នង់ ឃុំជៀប ស្រុកទឹកផុស។
មុនពេលចាប់ខ្លួនសមត្ថកិច្ចនគរបាលមូលដ្ឋានបានទទួលការរាយការណ៍ពីប្រជាពលរដ្ឋថា មានជនសង្ស័យម្នាក់បានលួចចាប់ និងដឹកយកគោញី១ក្បាល ដែលម្ចាស់គេលែងឱ្យស៊ីស្មៅនៅចំណុចខាងលើ ពេលទទួលបានព័ត៌មានសមត្ថកិច្ចក៏បានតាមស្រាវជ្រាវចាប់ខ្លួនជនសង្ស័យរូបនោះបានយកមកសាកសួរចម្លើយតាមនីតិវិធី។
នៅចំពោះមុខសមត្ថកិច្ចជនល្មើសបានសារភាពថា រូបគេពិតជាបានលួចគោញី១ក្បាលនោះមែន បំណងយកទៅលក់យកលុយសងអង្គការដែលគេនៅជំពាក់៣ពាន់ដុល្លារ។កាលពីមុនពេលដែលគេ និងប្រពន្ធមិនទាន់លែងលះគ្នា រូបគេបានខ្ចីលុយអង្គការចំនួន៤អង្គការ មានអេលីស៊ីដា ២កន្លែង ក្រេឌីត១កន្លែង និងស្ថាបនា១កន្លែង យកប្រាក់សរុបបានចំនួន៦ពាន់ដុល្លារ ហើយក្រោយមកបានសងគេជាបន្តបន្ទាប់អស់ចំនួន៣ពាន់ដុល្លារ មកដល់ពេលនេះនៅជំពាក់គេ៣ពាន់ដុល្លារទៀត។
ក្រោយពីប្រពន្ធបានលែងលះគ្នាទៅបន្ទុកនៃការសងប្រាក់អង្គការបានធ្លាក់មកលើខ្លួនគេជាអ្នកសង។ ដោយអង្គការមកបង្ខំទារប្រាក់ជារៀងរាល់ខែខ្លួនគ្មានលុយសង ទើបខ្លួនបានសម្រេចចិត្តមកលួចគោញីគេ១ក្បាលនេះបំណងយកទៅលក់ អាចបានប្រាក់ពី៣០០ទៅ៤០០ដុល្លារ ដើម្បីយកលុយសងអង្គការ។ ប៉ុន្តែពេលកំពុងលួចដឹកគោ ក៏ត្រូវសមត្ថកិច្ចចាប់ខ្លួនបានតែម្តង៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ