រាជធានីភ្នំពេញ ៖ ដើម្បីលុបបំបាត់ល្បែងស៊ីសងក្នុងមូលដ្ឋានស្របតាមគោលនយោបាយភូមិ-សង្កាត់មានសុវត្ថិភាព និងដើម្បីរក្សាសន្ដិសុខសណ្ដាប់ធ្នាប់ឱ្យបានល្អ ដូច្នេះអាជ្ញាធរខណ្ឌដូនពេញត្រូវតែមានវិធានការទប់ស្កាត់ការបើកហេ្គមល្បែងស៊ីសងឱ្យបាន ហើយក្នុងនោះយើងបានចាត់កម្លាំងសមត្ថកិច្ច គ្រប់ជាន់ថ្នាក់ក្នុងខណ្ឌ ដើម្បីបង្ក្រាប និងរឹបអូសយកទូហេ្គមទាំងនោះបានជាបន្ដបន្ទាប់យកមកវាយកមេ្ទចចោល ប្រយោជន៍កុំឱ្យពួកឈ្មួញឆ្លៀតឱកាស បើកល្បែងហេ្គមស៊ីសងទាំងនេះទៀត ។ នេះជាប្រសាសន៍របស់លោកគួច ចំរើន អភិបាល នៃគណៈអភិបាលខណ្ឌដូនពេញ ក្នុងពិធីវាយកំទេចទូហ្គេមចំនួន៥៥គ្រឿង ក្នុងនោះមានហ្គេមបាញ់ត្រីដែលមានតម្លៃរាប់ពាន់ដុល្លារ កាលពីព្រឹកថ្ងៃទី២៨ ខែកុម្ភៈ ឆ្នាំ២០១៥ នៅក្នុងសាលាខណ្ឌដូនពេញ ។
លោកអភិបាលខណ្ឌបានបញ្ជាក់ថា ទូហេ្គមទាំងអស់នេះត្រូវបានរឹបអូសពីកន្លែងធើ្វអាជីវកម្មខុសច្បាប់ជាច្រើនកន្លែងនៅក្នុងខណ្ឌដូនពេញ ខណៈដែលពួកគេបើកលេងទាំងយប់ទាំងថ្ងៃដោយពុំមានសុំការអនុញ្ញាតពីអាជ្ញាធរដែនដីនោះឡើយ ។ ទូហេ្គមទាំងនេះគឺជាប្រភេទហេ្គមល្បែងស៊ីសង ដែលធើ្វឱ្យ សិស្សានុសិស្ស ឬយុវវ័យមួយចំនួនលះបង់ការសិក្សាចូលទៅលេងហេ្គម បំផ្លាញលុយ ឬទ្រព្យសម្បត្ដិរបស់ឪពុក ម្ដាយ និងអាណាព្យាបាល ។ លើសពីនេះទៀត វាបានធើ្វឱ្យមានផលប៉ះពាល់ដល់សណ្ដាប់ធ្នាប់ សន្ដិសុខសង្គមតាមរយៈលេងហេ្គមចាញ់អស់លុយ ធើ្វឱ្យសិស្សានុសិស្ស ឬយុវវ័យទាំងនោះអាចប្រព្រឹត្ដអំពើអនាចារដូចជា លួច ឆក់ ប្លន់ បង្កអសន្ដិសុខសង្គមជាដើម ។
ទូហេ្គមដែលគេចាត់ទុកជាល្បែងស៊ីសងជាង៥០គ្រឿង ក្នុងនោះមានទូហេ្គមប្រភេទបាញ់ត្រីចំនួន៦គ្រឿង ត្រូវបានអាជ្ញាធរខណ្ឌដូនពេញវាយកំទេច ចោលទាំងស្រុង បន្ទាប់ពីទូហេ្គមទាំងនេះត្រូវបានអាជ្ញាធរបង្ក្រាប និងរឹបអូសបានពីកន្លែងបើកធើ្វអាជីវកម្មខុសច្បាប់នៅតាមបណ្ដាសង្កាត់នានាក្នុងខណ្ឌដូនពេញ ហើយនេះក៏ជាការប្តេជ្ញារបស់លោកអភិបាលខណ្ឌដូនពេញនាពេលកន្លងមក ដែលបានលើកឡើងថា នៅចុងឆ្នាំ២០១៥មិនមានហ្គេមប្រភេទល្បែងស៊ីសងក្នុងខណ្ឌដូនពេញទៀតទេ៕
ចែករំលែកព័តមាននេះ