រាជធានីភ្នំពេញ៖ ដើម្បី ធ្វើឱ្យទីក្រុងស្អាតស្របតាមការចង់បាន របស់ប្រជាពលរដ្ឋទូទៅនិងឆ្លើយតបតាមការណែនាំរបស់រាជរដ្ឋាភិបាល ក៏ដូចជាដើម្បីធ្វើឱ្យទីក្រុងស្អាតស្របផងនោះ កាលពីព្រឹក ថ្ងៃទី២៨ ខែកុម្ភៈ ឆ្នាំ២០១៥ លោក លី សាវេត អភិបាលនៃគណៈអភិបាលខណ្ឌសែនសុខនិងលោកជុំ សារ៉ាយចៅសង្កាត់ភ្នំពេញថ្មីបានដឹកនាំកម្លាំងយុវជន ប្រជាការពារនិងមានការចូលរួមពីប្រជាពលរដ្ឋ ប្រារឰពិធីទិវាជាតិទីក្រុងស្អាតដើម្បីនិងធ្វើយុទ្ធាការណ៍ដើររើសសំរាមតាមបណ្តោយផ្លូវ១៩១៩និងផ្លូវ១៩៨៦ ចូលរួមធ្វើឱ្យរាជធានីភ្នំពេញយើងកាន់តែមានសោភ័ណ្ឌភាពប្រសើរឡើង ។
លោកលី សាវេតអភិបាលខណ្ឌសែនសុខបានមានប្រសាសន៍ថាទីក្រុងស្អាត លុះត្រាតែ មានការចូលរួមសហការទាំងអស់គ្នា ពោលអាជ្ញាធរក៏ប្រឹងរៀបចំជួយប្រមូលសំរាមនិងបងប្អូនប្រជាពលរដ្ឋ ក៏ចូលរួមទុកដាក់សំរាមដោយវេចខ្ចប់ឲ្យបានត្រឹមត្រូវផងដែរទើបយើងសង្ឃឹមថានឹងទទួលបានជោគជ័យ ។
លោកបន្តថាទិវាខាងលើនេះចាត់ទុកជាការបម្រើវិស័យទេសចរណ៍ជាវិស័យអទិភាពមួយក្នុងចំណោម វិស័យអទិភាពទាំង១០ក្នុងយុទ្ធសាស្ដ្រចតុកោណដំណាក់កាលទី២របស់រាជរដ្ឋាភិបាលកម្ពុជាដែលស្ថិតនៅក្នុងមុំនៃការអភិវឌ្ឍន៍វិស័យឯកជន និងចាត់ទុកវិស័យទេសចរណ៍ជាមាសបៃតងរួមចំណែកដល់ការអភិវឌ្ឍន៍សេដ្ឋកិច្ច សង្គមផងដែរ ។
ជាមួយគ្នានោះដោយសារមានការប្រឹងប្រែងលើវិស័យទេសចរណ៍ ទីក្រុងស្អាតនេះហើយ ទើបខណ្ឌសែនសុខបានឆ្លងការប្រលង ប្រណាំងក្នុងឆ្នាំ២០១៥នេះទទួលបានជ័យលាភីផ្ការំដួលមួយទង ។ នេះជាលទ្ធផល បញ្ជាក់ឱ្យឃើញថា យើងទាំងអស់គ្នាត្រូវ ប្រឹងប្រែងបន្ដទៀត ដើម្បីធ្វើការប្រលង ប្រណាំងនៅលើកក្រោយៗទៀត ត្រូវតែ យកជ័យលាភីផ្ការំដួល៣ទងឱ្យបានជាដាច់ខាត ។
បន្ទាប់មានមតិសំណេះសំណាលជា មួយមន្ដ្រី និងប្រជាពលរដ្ឋក្នុងទិវាជាតិ ទីក្រុងស្អាតក្រោមប្រធានបទ “ជោគជ័យ ទីក្រុងស្អាត ជោគជ័យទេសចរណ៍ ” រួចមកលោកអភិបាលខណ្ឌបានដឹកនាំមន្ដ្រី ក្រោមឱវាទ និង ប្រជាពលរដ្ឋរួមគ្នារើសសំរាម និង បោសសម្អាតតាមដង ផ្លូវសាធារណៈ ដើម្បីចូលរួមធ្វើឱ្យទីក្រុងស្អាតជោគជ័យ លើវិស័យទេសចរណ៍ ៕
ចែករំលែកព័តមាននេះ