រាជធានីភ្នំពេញ ៖ លោក គឹម សន្តិភាព អ្នកនាំពាក្យក្រសួងយុត្តិធម៌ ត្រូវបានវិទ្យុ VOD នៅព្រឹកថ្ងៃសុក្រ ទី២៧ កុម្ភៈ ផ្សាយថា បន្ទាប់ពីមានកិច្ចប្រជុំដឹកនាំដោយរដ្ឋមន្ត្រីក្រសួងយុត្តិធម៌
រាជធានីភ្នំពេញ ៖ លោក គឹម សន្តិភាព អ្នកនាំពាក្យក្រសួងយុត្តិធម៌ ត្រូវបានវិទ្យុ VOD នៅព្រឹកថ្ងៃសុក្រ ទី២៧ កុម្ភៈ ផ្សាយថា បន្ទាប់ពីមានកិច្ចប្រជុំដឹកនាំដោយរដ្ឋមន្ត្រីក្រសួងយុត្តិធម៌ កាលពីថ្ងៃព្រហស្បតិ៍ ក្រសួងបានស្រង់ទិន្នន័យចំនួនស្ត្រីដែលជាប់ក្នុងពន្ធនាគារ១៦នាក់ ដែលត្រូវដោះលែងនៅថ្ងៃទី៨ មីនា ជាថ្ងៃទិវានារីអន្តរជាតិ ។ លោកបន្ថែមថា ក្នុងចំណោមស្ត្រីទាំងនោះជាស្ត្រីមានកូននៅជាមួយ១៥នាក់ និងស្ត្រីមានផ្ទៃពោះម្នាក់ ដែលនឹងត្រូវដោះលែង ហើយគណៈកម្មការនឹងពិនិត្យលើទិន្នន័យរបស់ខ្លួនបន្តៗទៀត ។
អ្នកនាំពាក្យរូបនេះបានបញ្ជាក់ដែរថា ស្ត្រីដែលមានកូនជាប់ក្នុងពន្ធនាគារមាន២ប្រភេទគឺ ៖
១-ស្ត្រីដែលនាំយកមកឃុំខ្លួនដោយមានក្មេងមកជាមួយតែម្តង ព្រោះតែពួកគេគ្មានគ្រួសារជួយមើលថែក្មេងទាំងនោះបាន ។
២-ស្ត្រីមានកូនដែលពួកគេបានឆ្លងទន្លេនៅក្នុងអំឡុងពេលត្រូវបានឃុំខ្លួនក្នុងពន្ធនាគារ ។
លោកបន្តថា ស្ត្រីទាំងនោះត្រូវបានថែទាំយ៉ាងយកចិត្តទុកដាក់ពីអគ្គនាយកដ្ឋានពន្ធនាគារ ដោយនាំយកទៅឆ្លងទន្លេនៅមន្ទីរពេទ្យ ឬសម្ភពបានត្រឹមត្រូវ ។
បើតាមលោក គឹម សន្តិភាព ឱ្យដឹងថា គណៈកម្មការបានស្រង់តួលេខស្ត្រីមានផ្ទៃពោះជាប់ពន្ធនាគារ មានចំនួន២០នាក់ ហើយស្ត្រីដែលមានកូនចំនួន៤៤នាក់ ។ បុ៉ន្តែចំនួននេះមិនទាន់ប្រាកដនៅឡើយទេ គឺត្រូវពិនិត្យផ្ទៀងផ្ទាត់ឡើងវិញ ។
កាលពីដើមសប្តាហ៍នេះ ក្នុងពិធីចែកសញ្ញាបត្រដល់និស្សិតសាកលវិទ្យាល័យមួយ សម្តេចតេជោ ហ៊ុន សែន បានស្នើឱ្យមានការដោះលែងស្ត្រីមានផ្ទៃពោះ និងមានកូននៅទូទាំងប្រទេសដើម្បីធានាថា កូនៗរបស់គេមិនកើតក្នុងពន្ធនាគារ ។ លោកបញ្ជាក់ថា ការស្នើសុំព្រះរាជទានទោសរបស់លោក មិនមែនបំពានច្បាប់នោះទេ បុ៉ន្តែដោយសារលោកមានអំណាចក្នុងការសុំព្រះរាជទានទោសនេះ ។
ការដោះលែងនេះអាចធ្វើឡើងមុនចូលឆ្នាំខ្មែរក្នុងខែមេសា ប៉ុន្តែសម្រាប់ស្ត្រីដែលមានផ្ទៃពោះអាចត្រូវធ្វើឡើងនៅមុនទិវាសិទ្ធិនារី ៨ មីនា ខាងមុខនេះ ៕
ចែករំលែកព័តមាននេះ