សារព័ត៌មានកោះសន្តិភាពប្រារព្ធខួប៤៨ឆ្នាំនៃការចេញផ្សាយរបស់ខ្លួន
រាជធានីភ្នំពេញ ៖ បុគ្គលិកសារព័ត៌មានកោះសន្តិភាពពីគ្រប់បណ្តាខេត្ត បានមកជួបជុំគ្នាលើទីស្នាកការកណ្តាល ដើម្បីប្រារព្ធខួបឆ្នាំទី៤៨នៃការចេញផ្សាយរបស់ខ្លួន
រាជធានីភ្នំពេញ ៖ បុគ្គលិកសារព័ត៌មានកោះសន្តិភាពពីគ្រប់បណ្តាខេត្ត បានមកជួបជុំគ្នាលើទីស្នាកការកណ្តាល ដើម្បីប្រារព្ធខួបឆ្នាំទី៤៨នៃការចេញផ្សាយរបស់ខ្លួន ដែលជាសារព័ត៌មានវ័យចំណាស់មួយនៅប្រទេសកម្ពុជា ហើយដែលបានឆ្លងកាត់របបជាច្រើនពីអតីតកាល និងបច្ចុប្បន្ន ។
ក្នុងពិធីសំណេះសំណាលជាមួយអ្នកសារព័ត៌មានមកពីតាមបណ្តាខេត្ត លោកឧកញ៉ា ថុង អ៊ុយប៉ាង ស្ថាបនិកសារព័ត៌មានកោះសន្តិភាព មានប្រសាសន៍ថា នេះជាលើកទី២ហើយដែលមានការជួបជុំអ្នកយកព័ត៌មានទាំងអស់ ហើយក៏ជាការជួបជុំដ៏ធំមួយស្របពេលដែលសារព័ត៌មានកោះសន្តិភាពបានប្រារព្ធខួបរបស់ខ្លួនក្នុងមោទនភាព ។
លោកឧកញ៉ាបន្តថា អ្វីដែលសំខាន់នោះ គឺយើងទាំងអស់គ្នាត្រូវខិតខំពង្រឹងចំណេះដឹងបន្ថែមទៀតលើវិជ្ជាជីវៈរបស់ខ្លួន ដើម្បីធ្វើការប្រកួតប្រជែងជាមួយបណ្តាសារព័ត៌មានផ្សេងៗ ពិសេសនោះគឺបណ្តាញព័ត៌មានវិទ្យា ហ្វេសប៊ុក គេហទំព័រ ដែលបច្ចុប្បន្នកំពុងតែផ្តល់នូវព័ត៌មានលឿនរហ័សខ្លាំងណាស់ ។ ក្នុងនាមជាអ្នកសារព័ត៌មាន ត្រូវគិតពីអ្វីដែលប្លែកសម្រាប់អ្នកអាន ដោយមិនគិតតែព័ត៌មានណាកើតឡើងនោះទេ គឺត្រូវតែស្វែងរកព័ត៌មានដែលជាចំណីរបស់អ្នកអានចង់ដឹង និងផ្តល់ចំណេះដឹងសម្រាប់សង្គមផងដែរ ។
លោកឧកញ៉ាបានធ្វើការដាស់តឿនដល់អ្នកយកព័ត៌មានត្រូវតែស្វែងរកអ្វីដែលថ្មី និងត្រូវសរសេរអ្វីដែលមិនប៉ះពាល់ដល់សេចក្តីថ្លៃថ្នូរបុគ្គល។ ជំនាញចំណេះដែលអ្នកសារព័ត៌មានត្រូវមានបន្ថែមគឺ ការអាននិងតាមដានសកម្មភាពដែលកើតឡើងជាប្រចាំ ។ ព័ត៌មានដែលអតិថិជនឬអ្នកអានចង់បាននោះ មិនមែនតែព័ត៌មានរឿងរ៉ែ រឿងដឹកឈើនោះទេ តែព័ត៌មានដែលគេចង់ដឹងនោះ គឺទាក់ទងនឹងបញ្ហាជីវិតគ្រួសារដូចជាព្រាត់ប្រាស បែកបាក់ប្តីប្រពន្ធ សង្សារជាដើម និងការរកឃើញថ្មីតាមបច្ចេកវិទ្យាទំនើបនាពេលបច្ចុប្បន្ន ។
លោកនិពន្ធនាយក ប៉ុល សារឿន មានប្រសាសន៍ដោយផ្តល់ដំបូន្មានដល់អ្នកយកព័ត៌មានត្រូវតែគោរពឱ្យបាននូវក្រមសីលធម៌វិជ្ជាជីវៈ ផ្តល់តែព័ត៌មានដែលពិត និងលឿនរហ័សអាចទុកចិត្តបាន ។ បច្ចុប្បន្នសារព័ត៌មានបោះពុម្ពផ្សាយ កំពុងប្រឈមនឹងការផ្សាយព័ត៌មានតាមទូរទស្សន៍ តាមគេហទំព័រ និងតាមបណ្តាញសង្គមហ្វេសប៊ុក ព្រោះថាបច្ចេកវិទ្យាព័ត៌មានកំពុងតែមានភាពជឿនលឿនណាស់ ប៉ុន្តែរាល់ព័ត៌មានតាមបែបបច្ចេកវិទ្យាមិនទាន់មានលក្ខណៈគ្រប់គ្រាន់ដែលអាចក្លាយទៅជាឯកសារផ្លូវការបានទេ គឺមានតែសារព័ត៌មានបោះពុម្ពផ្សាយប៉ុណ្ណោះ ។
លោកនិពន្ធនាយក ក៏ស្នើឱ្យអ្នករាយការណ៍ព័ត៌មានទាំងអស់ត្រូវតែសិក្សាបន្ថែមលើវិជ្ជាជីវៈសារព័ត៌មាន ទាំងចំណេះដឹង និងរបៀបសរសេរដែលភាគច្រើនអ្នកសារព័ត៌មានសុទ្ធតែមានគំនិតផ្សេងៗពីគ្នា ។ ចំណេះដឹងពិតប្រាកដគឺអ្នកសារព័ត៌មានត្រូវអានឱ្យបានច្រើន ពិសេសនោះគឺប្រៀបធៀបរបៀបសរសេររបស់អ្នកដទៃ និងស្នាដៃរបស់ខ្លួនថានៅមានចំណុចណាដែលខ្លួននៅមានភាពខ្វះខាត និងត្រូវបំពេញបន្ថែមទៀត ។
គួរបញ្ជាក់ថា គិតមកត្រឹមថ្ងៃទី២៧ កុម្ភៈ ឆ្នាំ២០១៥ សារព័ត៌មានកោះសន្តិភាពមានអាយុកាល៤៨ឆ្នាំហើយ ក្នុងការបោះពុម្ពផ្សាយរបស់ខ្លួន ៕
ចែករំលែកព័តមាននេះ