ប្រទេសកូរ៉េខាងត្បូង និងសហរដ្ឋអាមេរិក កាលពីថ្ងៃទី២៧ កុម្ភៈ បានចាប់ផ្តើមធ្វើប្រតិបត្តិការជើងទឹករួមនានា មុនពេលបើកធ្វើនាសប្តាហ៍ខាងមុខនេះនូវសមយុទ្ធយោធារួមដោយទ្រង់ទ្រាយ
ប្រទេសកូរ៉េខាងត្បូង និងសហរដ្ឋអាមេរិក កាលពីថ្ងៃទី២៧ កុម្ភៈ បានចាប់ផ្តើមធ្វើប្រតិបត្តិការជើងទឹករួមនានា មុនពេលបើកធ្វើនាសប្តាហ៍ខាងមុខនេះនូវសមយុទ្ធយោធារួមដោយទ្រង់ទ្រាយធំនៅកូរ៉េខាងត្បូង ។
នាវាចម្បាំងកូរ៉េខាងត្បូង១០គ្រឿង គាំទ្រដោយបណ្តាយន្តហោះនិងឧទ្ធម្ភាគចក្រ ស៊ើបការណ៍ព្រមទាំងនាវាពិឃាតអាមេរិក US Aegis និងនាវាចម្បាំងឯទៀតៗ ព្រមទាំងឧទ្ធម្ភាគចក្រធុន Sea Hawk បានចូលរួមក្នុងការហាត់សមនោះ ។
អ្នកនាំពាក្យម្នាក់របស់ក្រសួងការពារប្រទេស កូរ៉េខាងត្បូង និយាយថា គោលដៅនៃសមយុទ្ធនេះគឺ កែលម្អសមត្ថភាពប្រតិបត្តិការ ព្រមទាំងពង្រឹងសមត្ថភាពការពាររបស់សម្ព័ន្ធមិត្តទាំង២ ។
នេះគ្រាន់តែជាការចាប់ផ្តើមសមយុទ្ធប្រចាំ ឆ្នាំមានឈ្មោះថា Foal Eagle ។ សមយុទ្ធ Foal Eagle ចាប់ផ្តើមនាថ្ងៃទី២ មីនា ហើយមានរយៈពេល៨សប្តាហ៍ ។ សមយុទ្ធនេះ រួមមានសមយុទ្ធតាមជើងគោក ជើងអាកាស និងជើងទឹក ។ ទាហានប្រមាណជា២០០.០០០នាក់របស់កូរ៉េខាងត្បូង និងទាហានអាមេរិក៣.៧០០នាក់ នឹងចូលរួមនាឱកាសនោះ ។ ទន្ទឹមនឹងនេះ សមយុទ្ធរួមមួយទៀត មានឈ្មោះថា Key Resolve ដែលមានរយៈពេល១សប្តាហ៍ ក៏នឹងត្រូវធ្វើដែរ ។
សមយុទ្ធយោធារួមទាំងនេះ ដែលជាការបង្ហាញកម្លាំងជាប្រភពនៃភាពតានតឹងនៅឧបទ្វីបកូរ៉េ ។ ក្រុងសេអ៊ូល និងក្រុងវ៉ាស៊ីនតោន ពន្យល់ថា វាជាសមយុទ្ធមានលក្ខណៈការពារសុទ្ធសាធ ក៏ប៉ុន្តែក្រុងព្យុងយ៉ាង យល់ឃើញថា នេះជាការរៀបចំសម្រាប់ការវាយលុកជាយថាហេតុមួយ ។ កូរ៉េខាងជើងស្នើពន្យារពេលការសាកល្បងនុយក្លេអ៊ែររបស់ខ្លួន ប្រសិនបើសមយុទ្ធយោធារួមប្រចាំឆ្នាំ២០១៥ទាំងឡាយ ត្រូវផ្អាក ។ ក្រុងវ៉ាស៊ីនតោន បានបដិសេធសំណើនេះ ដោយវាយតម្លៃថា នេះគ្រាន់តែជាការគំរាមរបស់ក្រុងព្យុងយ៉ាង ដើម្បីសាកល្បងគ្រាប់នុយក្លេអ៊ែរលើកទី៤ របស់ខ្លួនតែប៉ុណ្ណោះ ។
កាលពីថ្ងៃទី២៤ កុម្ភៈ កន្លងមកនេះ កាសែតផ្លូវការកូរ៉េខាងជើង Rodong Sinmun និយាយថា ការសម្រេចចិត្តរបស់ក្រុងសេអ៊ូល និងក្រុងវ៉ាស៊ីនតោន ធ្វើទៀតតាមការគ្រោងទុកនូវបណ្តាសមយុទ្ធយោធារួមប្រចាំឆ្នាំរបស់ពួកគេ គឺជាការបំផ្លាញរាល់ឱកាសនៃការចរចាអន្តរកូរ៉េ ឡើងវិញ ។ កាសែតនេះបន្តថា អ្វីដែលយើងត្រូវធ្វើ គឺប្រតិកម្មតបខាងយោធាចំពោះសហរដ្ឋអាមេរិក ដោយពង្រឹងខ្លាំងបំផុតនូវសមត្ថភាពនុយក្លេអ៊ែររបស់យើង ។
ក្នុងសមយុទ្ធជើងទឹករួម រយៈពេល៤ថ្ងៃនេះ ដែលធ្វើនៅសមុទ្រខាងត្បូង កងទ័ពត្រូវធ្វើត្រាប់ដូចធ្វើសង្គ្រាមពិតៗ ៕
ចែករំលែកព័តមាននេះ