រាជធានីភ្នំពេញ ៖ ចំពោះនិស្សិតដែលចង់ស្វែងរកពីការអប់រំលំដាប់ថ្នាក់ពិភពលោកជាមួយនិងតម្លៃសមរម្យ ព្រមទាំងអាហារូបករណ៍ទៅសិក្សានៅទឹកដីដែលមានទំនាក់ទំនងនឹងកម្ពុជា ជាង២សហស្សវត្សហើយនោះ នៅសណ្ឋាគារអ៊ីនធើរខនធីណិនថលភ្នំពេញ នាថ្ងៃសៅរ៍ និងថ្ងៃអាទិត្យចុងសបា្តហ៍នេះ នឹងមានពិព័រណ៍ស្តីពីការអប់រំនៅប្រទេសឥណ្ឌា ចាប់ពីម៉ោង១០ព្រឹក រហូតដល់ម៉ោង៥ល្ងាច ។
រៀបចំដោយអង្គការលើកកម្ពស់ការអប់រំនៅអាស៊ីអាគ្នេយ៍ ហៅកាត់ថា SAPE ក្រោមការគាំទ្រពីស្ថានទូតឥណ្ឌាប្រចាំនៅកម្ពុជា និងដៃគូសហការធំៗពីស្ថាប័នអប់រំថ្នាក់ឧត្តមពិព័រណ៍ស្តីពីការអប់រំនៅប្រទេសឥណ្ឌា ឆ្នាំ២០១៥នេះ នឹងសម្ពោធក្រោមអធិបតីភាពជាកិត្តិយសពីលោក Dinesh K.Patnaik ឯកអគ្គរដ្ឋទូតឥណ្ឌា និងលោកសាមឺឌី ស៊ីសុវឌ្ឍនា អនុរដ្ឋលេខាធិការក្រសួងអប់រំ យុវជន និងកីឡា ។
ក្នុងសេចក្តីប្រកាសព័ត៌មាន Sanjay Thapa ស្ថាបនិករបស់ SAPE បានឱ្យដឹងថា «កាលពីមុននិស្សិតស្គាល់តែជំនាញវេជ្ជសាស្ត្រ និងវិស្វករប៉ុណ្ណោះ ។ ប៉ុន្តែសព្វថ្ងៃ ពួកគេមានជម្រើសច្រើនដូចជាផ្សព្វផ្សាយពាណិជ្ជកម្ម រូបភាពជីវចល ធនាគារ ហិរញ្ញវត្ថុ ជីវបច្ចេកវិទ្យា កុំព្យូទ័រ ច្នៃម៉ូដ ភាពយន្ត រចនារូបភាព សណ្ឋាគារ ទេសចរណ៍ បដិសណ្ឋារកិច្ច ព័ត៌មានវិទ្យា ធានារ៉ាប់រង ច្នៃម៉ូដអគារ ច្បាប់គ្រប់គ្រង ទំនាក់ទំនងជាដើម» ។
តាមរយៈពិព័រណ៍នេះ សិស្សនិស្សិតកម្ពុជានឹងទទួលបានព័ត៌មានពីតម្លៃសិក្សា ក៏ដូចជាស្វែងរកព័ត៌មានអាហារូបករណ៍ផងដែរ ។
យោងតាមស្ថានទូតឥណ្ឌាក្នុងមួយឆ្នាំ ប្រទេសនេះបានផ្តល់អាហារូបករណ៍ប្រមាណ១៥០កន្លែងទាំងរយៈពេលវែង និងវគ្គខ្លី ។ សមាគមអតីតនិស្សិតខ្មែរនៅប្រទេសឥណ្ឌាមានចំនួនចន្លោះពី១១០០ ទៅ១២០០នាក់ ដែលបច្ចុប្បន្នកំពុងបំពេញការងារយ៉ាងសកម្មភាពក្នុងស្ថាប័នរដ្ឋ និងឯកជនជាដើម ។
ចែករំលែកព័តមាននេះ