ក្រសួងការពារជាតិអ៊ុយក្រែនប្រកាសកាលពីថ្ងៃទី២៦ កុម្ភៈ ថា កងទ័ពអុ៊យក្រែន បានចាប់ផ្តើមដកអាវុធធុនធ្ងន់ពីខ្សែរណសិរ្សនៅតំបន់ភាគខាងកើតប្រទេស ដូចមានចែងក្នុងកិច្ចព្រមព្រៀងសន្តិភាពទីក្រុងមីនស្ក៍ហើយ ។
ក្នុងសេចក្តីប្រកាសមួយ ក្រសួងនេះនិយាយថា ដោយអនុវត្តកិច្ចព្រមព្រៀង ដែលចុះហត្ថលេខានៅទីក្រុងមីនស្ក៍ កាលពីថ្ងៃទី១២ កុម្ភៈ អ៊ុយក្រែនចាប់ផ្តើមនាថ្ងៃទី២៦ កុម្ភៈ ដកបណ្តាកាំភ្លើងធំទំហំ១០០ម.មរបស់ខ្លួន ចេញពីខ្សែរណសិរ្ស ។ ប្រតិបត្តិការនៃការដកនេះធ្វើឡើង ក្រោមការត្រួតពិនិត្យរបស់ពួកអ្នកសង្កេតការណ៍ នៃអង្គការសន្តិសុខនិងកិច្ចសហប្រតិបត្តិការនៅអឺរ៉ុប OSCE ។
ការសម្រេចចិត្តដកអាវុធធុនធ្ងន់ត្រូវបានធ្វើបន្ទាប់ពីឃើញសញ្ញាវិជ្ជមាននានារយៈពេល២ថ្ងៃចុងក្រោយនេះចំពោះការគោរពបទឈប់បាញ់គ្នានៅតំបន់ភាគខាងកើតប្រទេស ។
យោងតាមអ្នកនាំពាក្យកងទ័ពអុ៊យក្រែនលោកអានឌ្រីអីុ លីសេនកូ ថាការប្រទូស្តរា៉យគ្នា រវាងកងទ័ពអ៊ុយក្រែន និងពួកបះបោរបំបែកខ្លួនត្រូវបានបញ្ឈប់ក្នុងតំបន់ភាគច្រើននាខាងកើតប្រទេស ។
ទោះបីយា៉ងណា លោកលីសេនកូ រៀបរាប់ពីការប៉ុនប៉ងនានារបស់ពួកឧទ្ទាមបោះទីតាំងនៅជិតទីក្រុងដូណេតស្ក៍ និងក្រុងមា៉រីអ៊ួប៉ូល រយៈពេលប៉ុន្មានថ្ងៃចុងក្រោយនេះ ដោយទាហានអ៊ុយក្រែន៤នាក់ត្រូវរបួស តែពុំមានអ្នកស្លាប់ឡើយ ៕
ចែករំលែកព័តមាននេះ