រាជធានីភ្នំពេញ ៖ តារាកំប្លែងរាងខ្ពស់ និងដើមទ្រូងសិចស៊ីនាងលន់ ដាណេបានចាកចេញទៅសម្តែងនៅប្រទេសអូស្ត្រាលីរយៈពេល៦សប្តាហ៍កាលពីពេល ថ្មីៗនេះ ។ លន់ ដាណេ
រាជធានីភ្នំពេញ ៖ តារាកំប្លែងរាងខ្ពស់ និងដើមទ្រូងសិចស៊ីនាងលន់ ដាណេបានចាកចេញទៅសម្តែងនៅប្រទេសអូស្ត្រាលីរយៈពេល៦សប្តាហ៍កាលពីពេល ថ្មីៗនេះ ។ លន់ ដាណេ ដែលបានទៅឃើញប្រទេសគេជឿនលឿននោះ តែមិនចង់រស់នៅទេ ព្រោះនាងមិនអាចចោលស្រុកខ្មែរ ទស្សនិកជន ពិសេសនាងមិនចង់បែកពីគូស្នេហ៍ ។
កាលពីថ្ងៃទី២២ កុម្ភៈ ឆ្នាំ២០១៥ តារាកំប្លែងមានប្រភពមកពីខេត្តកំពង់ធំនាងលន់ដាណេ ឱ្យដឹងថា នាងចេញទៅប្រទេសអូស្ត្រាលី រយៈពេល៦អាទិត្យ ដោយសម្តែងនៅទីនោះ ក្រោមសំឡេងគាំទ្រពីទស្សនិកជនច្រើន។ ដោយសារតែសម្តែងបានល្អ ខាងអ្នកធានានឹងរត់ការយកនាងទៅសម្តែងម្តងទៀត អាចមុនបុណ្យចូលឆ្នាំខ្មែរ ឬក្រោយចូលឆ្នាំ ។ កត្តាដែលនាងដាណេមានតម្រុយចេញទៅសាងស្នាដៃសាជាថ្មីនៅប្រទេសអូស្ត្រាលី ព្រោះតែនាងមានចរិតរាក់ទាក់ដាក់ទស្សនិកជន មិនឆ្មើង។ រាល់ពេលចេញទៅច្រៀងមានទស្សនិកជន សុំអញ្ជើញទៅញ៉ាំបាយតាមផ្ទះជាមួយក្រុមគ្រួសារ ហើយនាងបានសម្តែងភាពស្និទ្ធស្នាល សួរសុខទុក្ខពីរបៀបរស់នៅស្រុកគេយូរឆ្នាំមានភាពលំបាក និងស្រណុកបែបណា ។ លើសពីនេះឲ្យតែទទួលអាហាររួចអស់ហើយ នាងដាណេតែងតែជួយប្រមូលចានឆ្នាំងលាងទុកដាក់ជាមួយម្ចាស់ផ្ទះ មិនប្រកាន់ខ្លួនជាតារាទេ បើត្រូវជួយធ្វើម្ហូប គឺធ្វើម្ហូប មិនមើលនឹងភ្នែកឡើយ ។
តារាដែលមានគម្រោងចេញទៅអូស្ត្រាលីជាលើកទី២រូបនេះឲ្យដឹងថា «ដ្បិតតែនាងខ្ញុំមានក្តីសុខពេលទៅអូស្ត្រាលីលើកទី១ ដោយបានឃើញស្រុកគេមែន ប៉ុន្តែនឹករលឹកស្រុក នាងខ្ញុំមិនអាចរស់នៅទីនោះបានទេ។ នៅទីនោះរស់នៅ ដាច់ៗដោយឡែកពីគ្នា បើចង់ជួបគ្នាវិញគឺជិះរថយន្តផ្លូវ ឆ្ងាយៗ ។ បើចង់ទៅញ៉ាំអីតាមហាងវិញក៏លំបាក ។
ម្យ៉ាងទៀតរបស់របរ ថ្លៃៗហូបតែបន្តិចបន្តួចសោះអស់ពី២ទៅ៣រយដុល្លារ ។ កាន់តែពិបាកគឺចង់រកកន្លែងសប្បាយតាមហាង និងក្លឹបក៏មិនស្រួលដែរ គឺថ្លៃ ។ ពេលឃើញការរស់នៅស្រុកគេគិតតែរឿងការងារទើបដឹងថា ស្រុកខ្មែរសេរីខ្លាំង ព្រោះបើមានត្រឹមតែ១ពាន់ដុល្លារអាចដើរលេងបានយ៉ាងសប្បាយ ។
បើចង់ញ៉ាំគុយទាវ ឬបាយស្រូបឃើញគ្រប់កន្លែងញ៉ាំ ហើយអាចសល់ពេលជិះម៉ូតូឡានដើរកម្សាន្តមើលគេឯងបានតាមតំបន់កម្សាន្តនានានៅទីក្រុងយ៉ាងស្រួល ។ ចំពោះស្រុកគេអត់ទេទាល់តែខំធ្វើការលំបាកណាស់ ទម្រាំបានលុយនោះ ។ បើយាយពីផ្ទះវិញទិញនៅសុទ្ឋតែអស់៧០ម៉ឺនដុល្លារឯណោះ
បើមកទិញស្រុកយើងបានផ្ទះវីឡា ឬផ្ទះល្វែងពីរបីល្វែងបាត់ទៅហើយ ។ អីុចឹងហើយទើបនាងមិនអាចចោលស្រុកយើងបាន ។ ពេលទៅទីនោះនាងខ្ញុំបន់ឲ្យតែមកដល់ស្រុកវិញប៉ុណ្ណោះ។ លើសពីនេះគ្រាន់តែមើលពីលើយន្តហោះឃើញដើមត្នោតក្នុងខ្លួនរំភើបរកអ្វីប្រៀបមិនបាន ដូចជាទៅចោលស្រុក១០ទៅ២០ឆ្នាំមកហើយ។ បែបនេះហើយទើបនាងខ្ញុំមិនទៅនៅទេបើទោះជាមានអ្នកចង់ធានាឲ្យរស់នៅក៏ដោយ។ ណាមួយស្តាយការងារ និងមិនអាចចោលគូស្នេហ៍របស់នាងខ្ញុំបានឡើយដែលស្រឡាញ់គ្នាយូរឆ្នាំមកហើយ» ។
បន្ទាប់ពីងាកមកច្បាមការងារសិល្បៈឡើងវិញ លន់ ដាណេ បានសម្តែងកំប្លែងរៀងរាល់ល្ងាចថ្ងៃអាទិត្យនៅស្ថានីយទូរទស្សន៍ហង្សមាស។ ក្រៅពីនេះដាណេបានច្រៀងរាំ លេងកំប្លែងនៅតាមស្ថានីយទូរទស្សន៍មួយចំនួនទៀត ។
ដាណេបញ្ជាក់ពីជិវិតក្រៅឆាកសម្តែងនិងរំលឹករឿងអតីតកាល ខ្លះៗថា ទម្រាំមានថ្ងៃនេះ មានផ្ទះនៅគឺនាងឆ្លងកាត់ការតស៊ូពីបាតដៃទទេ ។ ពីមុនដាណេធ្លាប់យកមីកញ្ចប់ធ្វើជាសម្លហូបជាមួយបាយ ។ ម្ល៉ោះហើយឲ្យតែគិតដល់រឿងនោះនាងមិនដែលប្រកាន់រឿងរកកន្លែងទទួលទានមានភាពទំនើបឡើយ ឲ្យតែឃើញឆ្ងាញ់និងនៅលើចិញ្ចើមផ្លូវក៏នាងឈប់ឡាន ចុះទៅទទួលទានភ្លាម អ្នកណាថាអ្វីក៏ស្រេចតែចិត្ត ព្រោះនាងស្គាល់រសជាតិលំបាកច្រើន ។
ដាណេចង់បើកភោជនីយដ្ឋានម្តងទៀត បើទោះជានាងធ្លាប់បើកហើយខាត៥ទៅ៦ម៉ឺនដុល្លារព្រោះតែទុកចិត្តបុគ្គលិកក្តី ។ នាងចង់រិះរកវិធីបែបណាឲ្យបានដំណើរការល្អ ព្រោះមានតែម្នាក់ឯង បើនាងដួល អ្នកផ្ទះនាងទាំងអស់ក៏ដួល ព្រោះរាល់ថ្ងៃបាននាងម្នាក់គត់ជួយផ្គត់ផ្គង់ផ្នែកជីវភាពរស់នៅ ៕
ចែករំលែកព័តមាននេះ