ខេត្តបន្ទាយមានជ័យ ៖ មន្ត្រីនគរបាលវរសេនាតូចការពារព្រំដែនគោកលេខ៨០៧ ឈរជើងការពារព្រំដែនប៉ែកខាងជើងនៃខេត្តបន្ទាយមានជ័យ មានឋានន្តរស័ក្តិអនុសេនីយ៍ឯក (ស័ក្តិ៣)ត្រូវបានគេប្រទះឃើញស្លា.ប់ដោយចង.ក
ខេត្តបន្ទាយមានជ័យ ៖ មន្ត្រីនគរបាលវរសេនាតូចការពារព្រំដែនគោកលេខ៨០៧ ឈរជើងការពារព្រំដែនប៉ែកខាងជើងនៃខេត្តបន្ទាយមានជ័យ មានឋានន្តរស័ក្តិអនុសេនីយ៍ឯក (ស័ក្តិ៣)ត្រូវបានគេប្រទះឃើញស្លាប់ដោយចង.កនៅក្នុងបន្ទប់ទឹកក្នុងទីបញ្ជាការវរសេនាតូចការពារព្រំដែនគោលេខ៨០៧ ស្ថិតក្នុងភូមិបន្ទាយមានរិទ្ធ ឃុំគោករមៀត ស្រុកថ្មពួក ខេត្តបន្ទាយមានជ័យ កាលពីវេលាម៉ោង១២ និង៤០នាទីថ្ងៃត្រង់ ថ្ងៃ២៦ ខែកុម្ភៈ ឆ្នាំ២០១៥ ។
ប្រភពព័ត៌មានពីនគរបាលស្រុកថ្មពួកបានឲ្យដឹងថា មន្ត្រីនគរបាលនៃវរសេនាតូចការពារព្រំដែនគោកលេខ៨០៧ដែលធ្វើអត្តឃាតមានឈ្មោះឡាក់ លីហ៊ា ភេទប្រុស អាយុ៤៦ឆ្នាំ ជាមន្ត្រីប៉ុស្តិ៍ការពារព្រំដែនគោក នៃវរសេនាតូចលេខ៨០៧ ច្រកតំបន់បេងត្រកួន ។
ប្រភពដដែលបានបញ្ជាក់ថា តាមការត្រួតពិនិត្យរបស់គណៈកម្មការបានអះអាងថា មន្ត្រីនគរបាលរូបនេះគឺពិតជាធ្វើអត្តឃាតសម្លាប់ខ្លួនមែន ដោយយកខ្សែភ្លើងពណ៌សចងនឹងឆ្នឹមបន្ទប់ទឹក ។ តាមការសន្និដ្ឋាន បុរសរូបនេះជាមនុស្សញៀនស្រា ជារៀងរាល់ថ្ងៃគឺផឹកស្រាជាប្រចាំ ភ្លេចបាយទឹក និងជាមនុស្សសរសៃប្រសាទ ម្យ៉ាងពេលស្រវឹងម្តងៗតែងតែព្យាយាមធ្វើអត្តឃាតសម្លាប់ខ្លួនជាច្រើនលើក តែត្រូវបានក្រុមគ្រួសារ និងមិត្តភក្តិជួយអន្តរាគមន៍ ។
នៅថ្ងៃកើតហេតុបុរសរូបនេះស្រវឹងស្រាបានដើរចូលទៅក្នុងបន្ទប់ទឹកដើម្បីបត់ជើង តែដោយបាត់យូរពេកមានមន្ត្រីនគរបាលម្នាក់បានដើរទៅមើល ក៏ស្រាប់តែឃើញបុរសនេះបានស្លាប់ ទើបមានការភ្ញាក់ផ្អើល ។
សាកសពត្រូវបានប្រគល់ជូនក្រុមគ្រួសារចាត់ចែងធ្វើបុណ្យតាមប្រពៃណីបន្ទាប់ពីធ្វើការត្រួតពិនិត្យរួច ៕
ចែករំលែកព័តមាននេះ