រាជធានីភ្នំពេញ ៖ ពុទ្ធ ឆាយរិទ្ធី មកពីក្លិបពុទ្ធសេរីវង្សព្រែកតាទែន បានណាត់ វ៉ែន សុវណ្ណ មកពីក្លិបកងកេងកីឡាខេត្តបាត់ដំបង ប្រកួតសាកកម្លាំងគ្នានៅលើសង្វៀនទូរទស្សន៍ស៊ីធីអិន នាថ្ងៃអាទិត្យ ទី១ មីនា សប្តាហ៍នេះ ដោយសារកន្លងមកពួកគេមិនធ្លាប់ជួបគ្នាទេ ។
រវាងកីឡាករទាំង២ មានប្រវត្តិប្រកួតមិនដូចគ្នានោះទេ ដោយ វ៉ែន សុវណ្ណ ចាស់វស្សាជាង ចំណែក ពុទ្ធ ឆាយរិទ្ធី គ្រាន់តែជាអ្នកប្រដាល់ជំនាន់ក្រោយម្នាក់បុ៉ណ្ណោះ ។ ដូច្នេះសម្រាប់ការជួបប្រកួតគ្នាជាលើកដំបូងនេះមិនដឹងថា ជើងចាស់ស៊ីជើងថ្មី ឬក៏ជើងថ្មីស៊ីជើងចាស់ឡើយ ។ វ៉ែន សុវណ្ណ មួយរយៈមកនេះមិនសូវឃើញលេចមុខនៅលើសង្វៀនភ្នំពេញញឹកញាប់នោះទេ។ គេនៅចាំបានថា ពីមុន វ៉ែន សុវណ្ណ គឺជាអ្នកប្រដាល់ជើងខ្លាំងមួយរូបដែលពិបាករកគូប្រកួតបំផុត បុ៉ន្តែការបាត់មុខពីលើសង្វៀនរបស់គេមួយរយៈមកនេះមិនដឹងថា ថ្វីដៃប្រកួតនៅល្អដូចមុនទៀតឬអត់ ។
អ្នកប្រដាល់រូបនេះពូកែប្រើស្នៀតកែង និងជង្គង់ បុ៉ន្តែរាល់ការវាយចេញរបស់គេហាក់មានភាពយឺតយ៉ាវបន្តិច ចំណែកចិត្តក៏មិនសូវជាសឿងបុ៉ន្មាន ។ ទម្លាប់របស់ វ៉ែន សុវណ្ណ ចូលចិត្តវាយជាប្រយោលច្រើនជាងចូលកៀក ដោយសារគេមានអំណោយផលខាងកម្ពស់ ។ ចំណែក ពុធ ឆាយរិទ្ធី ក៏ជាជើងខ្លាំងមិនអន់ជាងអ្នកប្រដាល់ជើងចាស់បុ៉ន្មានដែរ ។ បើទោះជាស្នៀតកែង និងជង្គង់របស់គេប្រើការមិនសូវស្ទាត់ជំនាញដូច វ៉ែន សុវណ្ណ មែន បុ៉ន្តែស្នៀតកណ្តាប់ដៃម៉ាត់ចេញរបស់គេពិតជាមិនធម្មតាឡើយ ពេលវាយចេញម្តងៗកម្រខុសគោលដៅ និងមានទម្ងន់ធ្ងន់ទៀតផង ។ ចាំមើល ពុទ្ធ ឆាយរិទ្ធី អាចទប់ទល់ជាមួយ វ៉ែន សុវណ្ណ បានឬអត់ ។
នៅលើសង្វៀនដដែល ក៏មានការប្រកួតរវាងកីឡាករចាន់ គង់រាជ មកពីក្លិបតាព្រហ្មមានជ័យបង្ក្រាបគ្រឿងញៀន និងកីឡាករចាន់ រតនៈ មកពីក្លិបខ្លារខិនមានរិទ្ធ ។ កីឡាករជ័យ វណ្ណៈ មកពីក្លិបឃ្លាំងមឿងកីឡា ប្រកួតជាមួយកីឡាករស្រិល ទ្រី មកពីក្លិបគជសារកីឡា ។ កីឡាករប្រាក់ រស្មី មកពីក្លិបតាឯកមានរិទ្ធ ប្រកួតជាមួយកីឡាករយៀង សុស មកពីក្លិបពន្លឺវិបុលមានរិទ្ធ ។ កីឡាករអេ ទូច មកពីក្លិបអេភូថងកីឡា ប្រកួតជាមួយកីឡាករជ័យ ដារ៉ាវុធ មកពីក្លិបឃ្លាំងមឿងកីឡា និងគូចុងក្រោយ កីឡាករឡុង គឹមហៀង មកពីក្លិបសាលវ័ន្តកីឡា ប្រកួតជាមួយកីឡាករព្រឿង សុជាតិ មកពីសមាគមកីឡាប្រដាល់ក្រសួងការពារជាតិ ៕
ចែករំលែកព័តមាននេះ