ឃីម បូរ៉ា ខ្លាចចាញ់ជុំទី3 ខណៈ ម៉ន វិរៈ ចង់ឈ្នះគូប្រកួត
រាជធានីភ្នំពេញ ៖ ការប្រកួតនៅចុងសប្ដាហ៍ថ្ងៃសៅរ៍ និងថ្ងៃអាទិត្យនេះមានចំណុចគួរឲ្យចាប់អារម្មណ៍ទៀតហើយនៅលើសង្វៀនទូរទស្សន៍អាស៊ីអាគ្នេយ៍ ដោយសារកីឡាករ
រាជធានីភ្នំពេញ ៖ ការប្រកួតនៅចុងសប្ដាហ៍ថ្ងៃសៅរ៍ និងថ្ងៃអាទិត្យនេះមានចំណុចគួរឲ្យចាប់អារម្មណ៍ទៀតហើយនៅលើសង្វៀនទូរទស្សន៍អាស៊ីអាគ្នេយ៍ ដោយសារកីឡាករឃីម បូរ៉ា ប្រកាសមិនចង់ចាញ់សម្រាប់ការប្រកួតក្នុងជុំទី៣ រីឯកីឡាករម៉ន វិរៈ ក៏ប្រកាសសុំផ្ដួលជើងខ្លាំងគឺ សៀវ ង៉ុយ ដែលជាខ្លាចាស់ល្បីឈ្មោះ សងសឹកឲ្យ ម៉ន សាម៉េត ។ អ្វីៗនៅគ្រាន់តែជាការទស្សន៍ទាយនៅឡើយទេ ទល់នឹងការប្រកួតមិនទាន់ចាប់ផ្ដើមនេះ ។
ការប្រកួតដណ្ដើមខ្សែក្រវាត់ K-cement នៅថ្ងៃសៅរ៍ ទី២៨ កុម្ភៈនេះ កីឡាករ៨រូបនឹងស្ថិតក្នុងសភាពតានតឹងដាក់គ្នាកាន់តែខ្លាំង បើធៀបនឹងជុំទី១ និងទី២ ដែលត្រូវគេចាត់ទុកថា ជាជុំស្ទាបស្ទង់សមត្ថភាព ។ នៅក្នុងជុំនេះកីឡាករដែលមាន៦ពិន្ទុ ពិតជាត្រូវបង្កើនសមត្ថភាពប្រជែងយកភាពច្បាស់លាស់ដណ្ដើមខ្សែក្រវាត់ និងប្រាក់លាន ។ ដោយឡែកអ្នកមានពិន្ទុថ្នាក់កណ្ដាល ក៏ត្រូវបង្កើនឲ្យមានជ័យជម្នះនោះដែរដើម្បីឈោងយកឱកាសប៉ែងជើងអ្នកមានពិន្ទុខ្ពស់ឲ្យរអិលធ្លាក់ពីកៅអីតាមការចង់បាន ។
មិនខុសគ្នាដែរ កីឡាករដែលមានពិន្ទុទាប ក៏ពិតជាត្រូវស្ទុះស្ទាខុសប្លែកជាងមុនដូចគ្នាដោយសារទី១ ដើម្បីមុខមាត់ និងទី២ កុំឲ្យជាប់ឈ្មោះជាកីឡាករជាប់លេខនៅបាតតារាង ។ បើអាចដណ្ដើមបានជ័យជម្នះ ហើយមានកម្លាំងចិត្តទៅឈ្នះក្នុងជុំបន្តបន្ទាប់ ក្រុមអ្នកមានពិន្ទុទាបនាពេលនេះនឹងឆ្មក់ពិន្ទុធ្វើឲ្យអ្នកមានពិន្ទុលំដាប់ទី១ និងលំដាប់ទី២ បាត់បង់សំណាងទៅកាន់វគ្គខ្វែង ។ អញ្ចឹងហើយទើបការប្រកួតក្នុងជុំទី៣ ត្រូវគេចាត់ទុកជាជំនួបតានតឹងជៀសមិនផុតសម្រាប់អ្នកប្រកួតប្រជែងទាំង៨ ។ ប្រសិនបើភ្លាត់នោះកីឡាករសូត្រ ប៊ុនធី និងកីឡាករមាស ច័ន្ទមាន នឹងដណ្ដើមបាន៣ពិន្ទុម្នាក់បន្ថែមទៀត ហើយមានសង្ឃឹមភាគច្រើនទៅកាន់វគ្គខ្វែង បើទោះការប្រកួតសន្សំពិន្ទុនៅមិនទាន់ចប់ ។
ការប្រកួតនៅថ្ងៃសៅរ៍នេះ អ្នកដែលត្រូវគេអ៊ុតជាងគេ គឺ ឃីម បូរ៉ា ដោយសារតែលោក គឺជាកីឡាករជើងល្អក្នុងចំណោមអ្នកប្រកួតប្រជែង ។ ប៉ុន្តែបើភ្លាត់ឲ្យបាត់៣ពិន្ទុដូចជុំទី២ នោះមានន័យថា សូត្រ ប៊ុនធី និងមាស ច័ន្ទមាន ប្រាកដជាជិះសេះលែងដៃហើយ ។ នៅរសៀលថ្ងៃសៅរ៍នេះ កីឡាករឃីម បូរ៉ា ត្រូវប៉ះប្រកួតជាមួយកីឡាករលាស់ យីន ដែលជាជើងល្អម្នាក់ ។ ត្រឡប់ទៅកាន់ចុងឆ្នាំ២០១៣ ជើងចាស់ លាស់ យីន មិនមែនជាដៃគូរបស់កីឡាករវ័យក្មេងម្នាក់ហ្នឹងនោះទេ ដោយសារតែឃីម បូរ៉ា ទាំងដៃទាំងជើង និងកែង គឺរួសព្រមគ្នា ដែលពិបាកឲ្យគូប្រកួតទប់ជាប់ ។ ប៉ុន្តែសម្រាប់ពេលនេះលទ្ធភាពនៃការយកឈ្នះ គឺស្ថិតក្នុងភាពស្រពេចស្រពឹលដោយសារ ឃីម បូរ៉ា ក៏រាងធ្លាក់ដៃ ឯកីឡាករលាស់ យីន ក៏រាងដំឡើងសន្ទុះបានល្អជាងមុន ។
យ៉ាងណាក៏ដោយ ឃីម បូរ៉ា បានប្រកាសរួចហើយថា មិនអាចបណ្ដោយឲ្យចាញ់ក្នុងជុំទី៣ទៀតទេ ព្រោះបើភ្លាត់ម្ដងនេះ ស្មើនឹងមានន័យថា អតីតជើងឯករងម្ចាស់ខ្សែក្រវាត់របស់ស្រាបៀរកម្ពុជា ដែលធ្លាប់ដណ្ដើមបានក្លាយជាអសារបង់ និងមិនខុសពីបោះបង់ឱកាសឡើងដណ្ដើមខ្សែក្រវាត់ឲ្យគេ ។ ក្រោយភ្លាត់ឲ្យចាញ់កីឡាករសូត្រ ប៊ុនធី ដែលធ្លាប់ចាញ់ខ្លួនក្នុងជុំទី២ កីឡាកររូបនេះញញឹមមិនស្រស់នោះទេ ពេលឮការបន្តុះបង្អាប់ថា លោកធ្លាក់ដៃមិនល្អដូចមុនទេ ។ ពាក្យនេះសម្រាប់កីឡាករដែលមានឈ្មោះបោះសំឡេង គឺជារឿងដ៏អាម៉ាស់បំផុត ខណៈដែលទីផ្សារសម្រាប់ឡើងប្រកួតក្នុងព្រឹត្តិការណ៍ធំ ក៏ដូចជាតម្លៃខ្លួនក៏ទាញទម្លាក់ទៅតាមហ្នឹង ប្រសិនបើគ្មានការកែកុន ។ ទោះជាការប្រដាល់មិនមែនជាអាជីពអស់មួយជីវិត ក៏មិនអាចបណ្ដោយឲ្យមហាជនបាត់បង់ទំនុកចិត្តនោះដែរ គឺដាច់ខាតត្រូវតែប្រឹងដណ្ដើមយកកេរ្តិ៍ឈ្មោះត្រឡប់មកវិញ ។
នេះជាអ្វីដែល ឃីម បូរ៉ា បានបញ្ជាក់នៅក្រោយបរាជ័យក្រោមដៃ លាស់ យីន កាលពីសប្ដាហ៍មុន ។ លោកហាក់សម្លឹងឃើញជ័យជម្នះលើកីឡាករលាស់ យីន លើកនេះប្រកបដោយភាពជឿជាក់ ដោយសារតែអះអាងថា បានត្រៀមខ្លួនជាមុន និងមិនជឿថា លាស់ យីន អាចធ្វើឲ្យខ្លួនសំណាងអាក្រក់ដូច សូត្រ ប៊ុនធី ។ ជាមួយនឹងការតាំងចិត្ត កីឡាកររូបនេះពិតជាអាចសម្រេចគោលដៅ ខណៈដែលលោកក៏មិនទាន់ធ្លាក់ដៃរហូតដល់វ៉ៃលែងកើតដូចគ្នានឹងកីឡាករធ្លាក់កូដមួយចំនួន ។ ការបរាជ័យក្នុងជុំទី២ មានគេចាត់ទុកថាជារឿងចៃដន្យ និងដោយសារការមើលស្រាលទៅលើដៃគូ ព្រោះតែធ្លាប់ឈ្នះ សូត្រ ប៊ុនធី ក្នុងការប៉ះគ្នាមុនៗរួចទៅហើយ។ ឃីម បូរ៉ា និងលាស់ យីន មាន៤ពិន្ទុស្មើគ្នា ដោយសារឈ្នះ១ ចាញ់១ ដូចគ្នាក្នុងការប្រកួតសន្សំពិន្ទុ ។
នៅក្នុងជុំនេះ កីឡាករឱម សំរេច ដែលមាន៤ពិន្ទុ (ឈ្នះ១ ចាញ់១) ប៉ះ មាស ច័ន្ទមាន ដែលមាន៦ពិន្ទុពេញ ។ ណាម ម៉ូរ៉ាក់ មាន២ពិន្ទុ ប៉ះ ថុល មករា មាន២ពិន្ទុដូចគ្នា និង ជ័យ ប៊ុនសង់ មាន២ពិន្ទុ ប៉ះ សូត្រ ប៊ុនធី ដែលមាន៦ពិន្ទុពេញ ខណៈដែលបើ ឃីម បូរ៉ា ឈ្នះ នោះនឹងក្លាយជាលទ្ធផលប្រទាញប្រទង់ជាមួយ មាស ច័ន្ទមាន និង សូត្រ ប៊ុនធី សម្រាប់ជុំបន្ទាប់ ។ នៅក្នុងព្រឹត្តិការណ៍ប្រដាល់នាពេលរសៀលដូចគ្នា តែប្រព្រឹត្តឡើងនៅថ្ងៃអាទិត្យទី១ មីនា នោះវិញ ក៏មានកីឡាករម៉ន វិរៈ ប្រាថ្នាចង់ឈ្នះកីឡាករសៀវ ង៉ុយ ដែលជាជើងខ្លាំងឲ្យបានដាច់ខាតផងដែរ បើទោះជាដឹងច្បាស់ថាគូប្រកួតដែលខ្លួនត្រូវជួប គឺល្បីទាំងឈ្មោះ និងខ្លាំងទាំងស្នៀតពិបាកទប់ទល់រួច ។ ម៉ន វិរៈ ត្រូវគេដឹងថាផ្អាកឡើងប្រកួតយូរ ទើបការប្រកួតជាថ្មីក្រោយពេលបាត់មុខហាក់មិនសូវនឹងដៃដូចមួយរយៈមុន ។
បើគ្មានការតាំងចិត្តឲ្យមហាជនបានឮ នោះមនុស្សតិចណាស់ហ៊ានជឿថាស៊ីសៀវ ង៉ុយ សម្រាប់ការប្រកួតនេះ ដោយសារតែ សៀវ ង៉ុយ ទើបតែស៊ីកីឡាករម៉ន សាម៉េត ដែលជាជើងខ្លាំង និងល្បីជាងគេក្នុងត្រកូលម៉នរួចទៅហើយ ។ យ៉ាងណាក៏ដោយ កីឡាករម៉ន វិរៈ ត្រូវបានប្រភពពីគ្រូបង្វឹកប្រាប់ថា បានទទួលការហ្វឹកហាត់ខ្លាំងក្លាជាងមុនមុននឹងធ្វើការផ្គូផ្គង ទើបការប្រកួតដែលត្រូវប៉ះជាមួយជើងខ្លាំងលើកនេះហាក់ធ្វើឲ្យសាមីខ្លួន និងគ្រូបង្វឹកជឿថាឈ្នះ សៀវ ង៉ុយ ។ ការប្រកួតគូនេះ ពិតជាធ្វើឲ្យបែកផ្កាភ្លើងដោយសារតែ ម៉ន វិរៈ គឺជាកីឡាករជើងខ្លាំង ហើយកីឡាករសៀវ ង៉ុយ ក៏ជាកីឡាករកម្រប្រកួតចាញ់គូប្រកួតដូចគ្នា។ អ្នកទាំងពីរប៉ះគ្នាត្រូវគេប៉ាន់ស្មានថា នឹងពិតជាមានលទ្ធផលទ្រមខ្លួន ខណៈដែលភាគរយជឿជាក់បានសង្កត់ធ្ងន់ទៅលើ សៀវ ង៉ុយ ច្រើនជាង ។ ប៉ុន្តែយោងតាមការតាំងចិត្តរបស់ ម៉ន វិរៈ និងគ្រូបង្វឹកបានធ្វើឲ្យការទុកចិត្តទៅលើសៀវ ង៉ុយ ធ្លាក់ចុះ បើទោះជា ម៉ន វិរៈ ខានប្រដាល់មួយខ្យល់ធំ ។ ចាំមើល តើអ្នកណានឹងឈ្នះសម្រាប់គូនេះ ?
ចែករំលែកព័តមាននេះ