រាជធានីភ្នំពេញ ៖ ចាត់ទុកថា ជាលើកទី១ ដែលកីឡាករជើងខ្លាំងដល់ទៅ៣រូប ដែលទើបឡើងសន្ទុះដូចគ្នា ត្រូវគេរៀបឲ្យជួបប្រកួតជាមួយកីឡាករថៃក្នុងថ្ងៃ និងសង្វៀនតែមួយ ។ អ្នកទាំង៣នាក់នឹងឡើងប្រកួតកម្រិតអន្តរជាតិ នៅព្រឹកថ្ងៃអាទិត្យ ទី១ មីនា នៅលើសង្វៀនទូរទស្សន៍អាស៊ីអាគ្នេយ៍ចាប់ពីម៉ោង៨និង៣០នាទីព្រឹកតទៅ ។
ក្នុងជំនួបដ៏ចម្រូងចម្រាសនេះ កីឡាករម៉ន សាម៉េត ប៉ះជាមួយកីឡាករថៃ Kheang Kit ក្នុងប្រភេទទម្ងន់៥៧គីឡូក្រាម ។ នៅមិនទាន់មានការអះអាងឲ្យបានច្បាស់លាស់ពីភាពខ្លាំងក្លារបស់កីឡាករមកពីប្រទេសថៃនៅឡើយទេ ក្រៅពីមានការបញ្ជាក់ថា នោះជាកីឡាករជើងខ្លាំងដែលត្រូវគេដាក់ឲ្យប៉ះ ម៉ន សាម៉េត ដើម្បីឲ្យមានលក្ខណៈរញ្ជួយ និងកក្រើក ។ ភាគីខាងកម្ពុជា គឺជាម្ចាស់ខ្សែក្រវាត់ជើងឯកស្រាបៀរកម្ពុជាឆ្នាំ២០១៣ និងជាជើងខ្លាំងម្នាក់ដែលទទួលបានកុងត្រាពីសង្វៀនទូរទស្សន៍អាស៊ីអាគ្នេយ៍ដោយសារតែជាប់ជើងឯក ដោយបទពិសោធន៍ និងសមត្ថភាពរបស់កីឡាកររូបនេះ ក៏ល្អគួរឲ្យកត់សម្គាល់នាពេលចុងក្រោយ ទោះជាមានប្រវត្តិឈ្នះខ្លះចាញ់ខ្លះក្ដី ។
ម៉ន សាម៉េត ទើបតែចាញ់កីឡាករក្នុងស្រុក ឈិត ង៉ុយ ប៉ុន្តែលោកក៏បានឈ្នះថៃនៅប៉ុន្មានលើកចុងក្រោយដូចគ្នា ថ្វីដ្បិតថាគូប្រកួតរបស់ខ្លួន មានសមត្ថភាពបែបណា ។ ម៉ន សាម៉េត ធ្លាប់ប្រកួតបាន៦៥ដង ឈ្នះ៤៨ដង ចាញ់១៤ដង និងស្មើ៣ដង ឯកីឡាករ Kheang Kit ឯណោះវិញ ធ្លាប់ឆ្លងកាត់ការប្រកួតបាន៦៤ដង ឈ្នះ៥២ដង ចាញ់១១ដង ស្មើ១ដង និងជាកីឡាករល្អម្នាក់ក្នុងប្រភេទទម្ងន់៥៧គីឡូក្រាមនៅថៃ ។ យោងតាមតួលេខនេះ គេអាចប៉ាន់ស្មានថា កីឡាករឆ្លងប្រទេសមានប្រវត្តិចាញ់ការប្រកួតតិចជាង ស្មើតិចជាង ក្នុងពេលដែលតួលេខសរុបនៃការឡើងរេញ គឺមានចំនួនប្រហែលគ្នា ។ ម៉ន សាម៉េត ខ្លាំងកែង និងម៉ាត់ ប៉ុន្តែលោកក៏ជាកីឡាករដែលមានទម្លាប់វាយច្រឡោត ធ្វើឲ្យបាត់ម្ចាស់ការណ៍ផងដែរ ទើបអ្នកទុកចិត្តសម្រាប់ការប្រកួតនេះ ហាក់មានមិនច្រើននៅឡើយ ក្នុងពេលដែលភាគីថៃ ស្រាប់តែគ្មានការបញ្ជាក់ថា ខ្លាំងស្នៀតណាមួយ ឬខ្សោយស្នៀតណាមួយ ដើម្បីងាយស្រួលវិភាគបែបនេះ។
ជាការប៉ាន់ស្មាន ម៉ន សាម៉េត ទំនងជាអាចដាក់បញ្ចូលកីឡាករ Kheang Kit ក្នុងបញ្ជីអ្នកចាញ់ខ្លួនបន្ថែមម្នាក់ទៀតនៅក្រោយការប្រកួត ប៉ុន្តែធាតុពិតនៅមិនទាន់កំណត់បាននោះទេ ។ កីឡាករ ផន ផល្លា ឬកីឡាករ វង្ស គង់រាជ ដែលជាជើងខ្លាំងម្នាក់ឈរក្នុងលំដាប់ជួរមុខផងដែរ សម្រាប់ប្រភេទទម្ងន់៦០គីឡូក្រាម ត្រូវគេឲ្យប៉ះជាមួយកីឡាករថៃឈ្មោះ Nong Ou ដែលធ្លាប់មកប្រកួតនៅក្នុងប្រទេសកម្ពុជារួចមកហើយ ។ កីឡាករឆ្លងប្រទេសរូបនេះ ត្រូវបានគេស្គាល់តាមរយៈការប៉ះប្រកួតជាមួយកីឡាករកម្ពុជា ហើយផ្ដួលកីឡាករកម្ពុជាខ្លះ និងបរាជ័យខ្លះនៅលើសង្វៀនរបស់ទូរទស្សន៍អាស៊ីអាគ្នេយ៍នាពេលកន្លងមក ។
លោកក៏ជាកីឡាករពូកែឌឺ ដោយគ្រប់ការប្រកួតកម្រណាស់ថា មិនបានទទួលប្រជាប្រិយភាពពីអ្នកទស្សនា បើទោះជាមានលទ្ធផលមិនល្អ ។ មុននេះបន្តិច កីឡាករ Nong Ou ទើបតែបានផ្ដួលកីឡាកររូបសង្ហា របស់កម្ពុជាឈ្មោះ ពៅ ស៊ីយ៉េត ឲ្យសន្លប់ក្នុងទឹកទី២ក្ដៅៗប៉ុណ្ណោះ ព្រមជាមួយនឹងលទ្ធផលក្នុងការប្រកួតផ្សេងទៀត ក៏បង្ហាញនូវភាពស្វិតស្វាញទម្រាំចាញ់ឈ្នះ ។ សម្រាប់ការប៉ះគ្នាលើកនេះ ផន ផល្លា ធ្លាប់ប្រកួតបាន៤៦លើក ឈ្នះ៣៥លើក ចាញ់៨លើក និងស្មើ៣លើក ឯ Nong Ou ធ្លាប់ប្រកួតបាន៦០លើក ឈ្នះ៤៩លើក ចាញ់៩លើក និងស្មើ២លើក។ ការប៉ះគ្នាលើកនេះ កីឡាករខាងថៃ ហាក់មានអ្នកទុកចិត្តច្រើនជាងសម្រាប់មហាជនជាអ្នកតាមដានដោយសារតែ Nong Ou ត្រូវគេស្គាល់រួចទៅហើយថា ល្អកែងទាត់ និងធាក់ព្រមគ្នា ។
យ៉ាងណាមិញ កីឡាករ ផន ផល្លា ក៏មានអ្នកជឿបែបនេះមិនអន់ដែរ ដោយសារតែក្នុងពិភពប្រដាល់អ្នកណាក៏ដឹងថា លោកខ្លាំងកណ្ដាប់ដៃ រន្ទះជើងនិងកែង បើទោះជាបទពិសោធន៍នៅស្ទើរបន្តិច ។ កីឡាករចុងក្រោយគឺ អ៊ុំ ចំរើន ត្រូវឡើងប្រកួតជាមួយកីឡាករ Keang Dea Lek ក្នុងប្រភេទទម្ងន់៦៥គីឡូក្រាម ។ កីឡាករកម្ពុជាគូនេះ ប្រកួតបាន៧៥ដង ឈ្នះ៥៥ដង ចាញ់១៧ដង និងស្មើ៣ដង ខណៈដែលភាគីថៃធ្លាប់ប្រកួតបាន៦៦ដង ឈ្នះ៥៩ដង និងចាញ់៧ដង។ អ៊ុំ ចំរើន មានការជឿជាក់ថា អាចឈ្នះច្រើនភាគរយជាង បើទោះជាលោកមមាញឹកក្នុងការសិក្សាថ្នាក់បរិញ្ញាបត្ររង និងរវល់កាត់ដេរស្បែកជើង ដែលជាអាជីពផ្ទាល់ខ្លួនជាជាងការហ្វឹកហាត់ដូចពេលមុន ។
នេះជាព្រឹត្តិការណ៍ដំបូង ដែលផ្ដល់ឱកាសឲ្យកីឡាករជើងខ្លាំងជួរមុខកម្ពុជាទាំង៣ គឺម៉ន សាម៉េត ផន ផល្លា ឬវង្ស គង់រាជ និងអ៊ុំ ចំរើន អាចឡើងប៉ះជាមួយថៃនៅលើសង្វៀនអន្តរជាតិរួមគ្នា ។ នៅមិនទាន់ដឹងថារវាងអ្នកទាំង៣រូប តើអ្នកណាអាចផ្ដួលកីឡាករថៃជាគូបដិបក្ខ និងអ្នកណាត្រូវថៃផ្ដួលវិញនោះទេ ក្នុងពេលការប្រកួតនាព្រឹកថ្ងៃអាទិត្យ មិនទាន់កើតឡើងបែបនេះ ៕
ចែករំលែកព័តមាននេះ