NOCC ធ្វើមហាសន្និបាតបូកសរុបការងារឆ្នាំ2014 និងលើកទិសដៅឆ្នាំ2015
រាជធានីភ្នំពេញ ៖ គណៈកម្មាធិការជាតិអូឡាំពិកកម្ពុជា (NOCC) កាលពីព្រឹកថ្ងៃទី២៦ កុម្ភៈ បានរៀបចំមហាសន្និបាតបូកសរុបការងារប្រចាំឆ្នាំ២០១៤ របស់ខ្លួន និងលើកទិស
រាជធានីភ្នំពេញ ៖ គណៈកម្មាធិការជាតិអូឡាំពិកកម្ពុជា (NOCC) កាលពីព្រឹកថ្ងៃទី២៦ កុម្ភៈ បានរៀបចំមហាសន្និបាតបូកសរុបការងារប្រចាំឆ្នាំ២០១៤ របស់ខ្លួន និងលើកទិសដៅការងារសម្រាប់ឆ្នាំ២០១៥ ។ មហាសន្និបាតនេះប្រារព្ធឡើងក្រោមអធិបតីភាពលោកថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា ដោយមានការចូលរួមពីលោកវ៉ាត់ ចំរើន អគ្គលេខាធិការ NOCC និងមន្ត្រីពាក់ព័ន្ធក្នុងវិស័យកីឡាជាច្រើនរូបទៀត ។
អំពីផែនការសកម្មភាពរបស់សហព័ន្ធកីឡាជាតិក្នុងឆ្នាំ២០១៤ លោកវ៉ាត់ ចំរើន អគ្គលេខាធិការ NOCC បានមានប្រសាសន៍ថា មានសហព័ន្ធកីឡាជាតិចំនួន២១ ក្នុងចំណោម៤៤សហព័ន្ធបានបញ្ជូនរបាយការណ៍បូកសរុបការងារប្រចាំឆ្នាំ២០១៤ ជូនគណៈកម្មាធិការជាតិអូឡាំពិកកម្ពុជាស្តីពីសកម្មភាពក្នុងប្រទេស គឺមានសកម្មភាពគួរឱ្យចាប់អារម្មណ៍យ៉ាងខ្លាំងដូចជា ការចូលរួមធ្វើមហាសន្និបាត ការងារបដិសណ្ឋារកិច្ចប្រតិភូបរទេស ការបណ្តុះបណ្តាលធនធានមនុស្ស ការរៀបចំព្រឹត្តិការណ៍កីឡាជាដើម។
ចំណែកសកម្មភាពក្រៅប្រទេសវិញ ក៏មានសកម្មភាពផុលផុសគួរឱ្យកត់សម្គាល់ផងដែរដូចជា គណៈកម្មាធិការជាតិអូឡាំពិកកម្ពុជា បានបញ្ជូនប្រតិភូកីឡាជាតិឱ្យទៅចូលរួមប្រកួតស្ទើរតែគ្រប់ព្រឹត្តិការណ៍ទាំងអស់ និងទទួលបានលទ្ធផលល្អប្រសើរថែមទៀតផង ។ លោកវ៉ាន់ ចំរើន បានបញ្ជាក់ឱ្យដឹងផងដែរថា មហាសន្និបាតថ្ងៃនេះក្រៅពីការធ្វើកំណែទម្រង់នូវចំណុចខ្សោយខ្លះនោះយើងនៅមានការងារជាច្រើនទៀតដែលត្រូវធ្វើ ហើយការងារសំខាន់គឺត្រូវបង្ហើយផែនការមេ និងអនុម័តឱ្យបានរួចរាល់នៅក្នុងឆ្នាំនេះ ។
លោកថោង ខុន រដ្ឋមន្ត្រីក្រសួងទេសចរណ៍ និងជាប្រធាន NOCC បានមានប្រសាសន៍ថា មហាសន្និបាតថ្ងៃនេះ នឹងក្លាយជាវេទិកាដ៏មានប្រសិទ្ធភាពក្នុងការពិភាក្សារិះរកមធ្យោបាយ និងបទពិសោធន៍ថ្មីៗដើម្បីជាធាតុផ្សំចូលរួមចំណែកដល់ការលើកទិសដៅការងារ និងដាក់ចេញផែនការសកម្មភាពសម្រាប់ឆ្នាំ២០១៤ ប្រកបដោយលក្ខណៈវិទ្យាសាស្ត្រគ្រប់ជ្រុងជ្រោយស្របតាមនិន្នាការរីកចម្រើននៃចលនាកីឡាអន្តរជាតិ ពិសេសផែនការមេឆ្ពោះទៅរកការធ្វើជាម្ចាស់ផ្ទះរៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ នៅកម្ពុជា ។
លោកមានប្រសាសន៍បន្តថា អស់រយៈពេលពេញ១ឆ្នាំ (ក្នុងឆ្នាំ២០១៤) គណៈកម្មាធិការជាតិអូឡាំពិកកម្ពុជាបានសហការជាមួយសហព័ន្ធកីឡាជាតិយ៉ាងជិតស្និទ្ធ ជាពិសេសជាមួយក្រសួងអប់រំ យុវជន និងកីឡា ដែលបានយកចិត្តទុកដាក់ក្នុងការធ្វើកំណែទម្រង់វិស័យកីឡាជាតិ ។ អ្វីដែលគួរឱ្យកត់សម្គាល់គួរជាទីមោទនៈក្នុងឆ្នាំ២០១៤កន្លងមកនេះ គឺការបង្កើតបាននូវកំណត់ត្រាប្រវត្តិសាស្ត្រនៃការដណ្តើមបានមេដាយមាសកីឡាអាស៊ីជាលើកដំបូង (Asian Games) ក្នុងរយៈពេល៦០ឆ្នាំរបស់កម្ពុជា និងមេដាយសំរឹទ្ធដំបូងក្នុងការប្រកួតកីឡាអាស៊ីតំបន់ឆ្នេរនៅទីក្រុងភូកេត ប្រទេសថៃ ។ ជាពិសេសទៅទៀតនោះសហព័ន្ធប៊ូល និងប៉េតង់ ក៏ទទួលបានមេដាយជើងឯកថ្នាក់ពិភពលោក និងថ្នាក់អាស៊ីអាគ្នេយ៍ប្រចាំឆ្នាំ២០១៣-២០១៤ ទៀតផង ។
តាមលទ្ធផលជាក់ស្តែងចេញពីផែនការយុទ្ធសាស្ត្រ ឆ្នាំ២០១០ ក្នុងការស្វែងរកមេដាយមាស២ខ្ទង់ក្នុងការប្រកួតកីឡាស៊ីហ្គេមឆ្នាំ២០១៣កន្លងមក គឺយើងទទួលបានលទ្ធផលជាផ្លែផ្កាគួរកត់សម្គាល់ ក្នុងនោះយើងទទួលបានមេដាយមាស៨គ្រឿង និងក្នុងការប្រកួតកីឡាអាស៊ីឆ្នាំ២០១៤ ក៏សម្រេចបានជោគជ័យយ៉ាងត្រចះត្រចង់ជាប្រវត្តិសាស្ត្រនៃកីឡាកម្ពុជា គឺដណ្តើមបានមេដាយមាស១គ្រឿងលើវិញ្ញាសាតេក្វាន់ដូ ។ លោករដ្ឋមន្ត្រីបញ្ជាក់បន្ថែមទៀតថា បច្ចុប្បន្នព្រឹត្តិការណ៍ប្រកួតកីឡាធំៗបានក្លាយជាផលិតផលទេសចរណ៍ ជាធុរកិច្ចដ៏អស្ចារ្យ និងជាការបង្ហាញឥទ្ធិពលនៃប្រទេសធ្វើជាម្ចាស់ផ្ទះដែលត្រូវបានចាត់ទុកជាវេទិកាដ៏មានប្រសិទ្ធភាព ជំរុញឱ្យមានការផ្លាស់ប្តូរជាវិជ្ជមាននៅក្នុងសង្គម រួមចំណែកដល់ការរេៀបចំផែនការជាតិ លើកកម្ពស់ស្មារតីសាមគ្គីភាព ឯកភាពជាតិ ឧត្តមភាពជាតិ តាមរយៈឥទ្ធិពលនៃកីឡា។
ដោយឡែកសម្រាប់សហព័ន្ធកីឡាជាតិមួយចំនួនក៏ខិតខំប្រឹងប្រែង និងមានភាពរឹងមាំទាំងផ្នែករដ្ឋបាល ទាំងផ្នែកបច្ចេកទេស និងមានសកម្មភាពកីឡាជំនាញ ការងារទំនាក់ទំនងសហព័ន្ធអន្តរជាតិរបស់ខ្លួនជាប្រចាំ ក្នុងនោះប្រភេទកីឡាគួរឱ្យកត់សម្គាល់មានកីឡាបាល់ទាត់ កីឡាប្រដាល់ កីឡាប៊ូល និងប៉េតង់ កីឡាចំបាប់ កីឡាតេក្វាន់ដូ កីឡាទ្រីយ៉ាត្លុង កីឡាវាយសី កីឡាវាយកូនបាល់ កីឡាហែលទឹក កីឡាវាយកូនឃ្លីលើតុ និងកីឡាប្រណាំងទូក ៕
ចែករំលែកព័តមាននេះ