សហរដ្ឋអាមេរិក កាលពីថ្ងៃទី២៤ កុម្ភៈ ប្រកាសផ្តល់រង្វាន់៣លានដុល្លារ សម្រាប់ការផ្តល់ព័ត៌មានអំពីជនជាតិរុស្ស៊ីម្នាក់ សង្ស័យចូលរួមក្នុងការវាយប្រហារប្រព័ន្ធព័ត៌មានវិទ្យារបស់បណ្តាសហគ្រាស ។
ក្រសួងការបរទេសអាមេរិក ប្រកាសផ្តល់រង្វាន់នោះ ប្រឆាំងនឹងលោក Evgeniy Mikhailovich Bogachev ដែល FBI តាមរកចាប់ខ្លួន ក្រោយពីការវាយប្រហាររបស់គេ បណ្តាលឱ្យមានការបាត់បង់គិតជាប្រាក់ជាង១០០លានដុល្លារ សម្រាប់បណ្តាសហគ្រាសនិងបណ្តាអ្នកប្រើប្រាស់អាមេរិក ។
ក្នុងក្របខណ្ឌនៃការវាយប្រហារនេះ ប្រព័ន្ធព័ត៌មានវិទ្យាមានឈ្មោះថា Zeus និង Gameovèr Zeus ត្រូវបានបញ្ចូលក្នុងកុំព្យូទ័រជាង១លានគ្រឿង ដែលអាចឱ្យអ្នកប្រើប្រព័ន្ធនេះ អាចវាយប្រហារ ឬលួចទិន្នន័យធនាគារទាំងឡាយ ព្រមទាំងអាចលួចយកប្រាក់ពីគណនីនានា ។
មានឈ្មោះតាមអីុនធើរណែតថា Lucky 12345 និង Slavik បុរសឈ្មោះ Bogachev នេះស្ថិតក្នុងបញ្ជីឈ្មោះពួកឧក្រិដ្ឋជនប្រព័ន្ធព័ត៌មានវិទ្យា ដែល FBI តាមរកបំផុត ។
ក្នុងសេចក្តីប្រកាសមួយ ក្រសួងការបរទេសអាមេរិក គូសបញ្ជាក់ថា គេគិតថា បុរសនោះអាចរស់នៅដោយមានសេរីភាពនៅរុស្ស៊ី ។ ប្រាក់រង្វាន់សម្រាប់ការចាប់ខ្លួនជននេះ បញ្ជាក់ជាថ្មីពីឆន្ទៈរបស់រដ្ឋាភិបាលអាមេរិក តាមរកចាប់ខ្លួនពួកអ្នកដែលចូលរួមក្នុងបទឧក្រិដ្ឋ ដែលមានការចាត់តាំង យកមកកាត់ទោស ទោះបីពួកគេលាក់ខ្លួននៅឯបរទេសក្តី ៕
ចែករំលែកព័តមាននេះ