រាជធានីភ្នំពេញ ៖ អតីតតារាចម្រៀងនាងពៅ បញ្ញាពេជ្រ បានបង្ហាញវីដេអូឃ្លីបមួយនៅលើទំព័រហ្វេសប៊ុករបស់នាង រៀបរាប់ពីសុខភាពរបស់នាងស្របខួប៨ឆ្នាំនៃការបាញ់ប្រហារនាង ។
ក្រោយការបាញ់ប្រហាររយៈពេល៨ឆ្នាំមកនេះ ពៅ បញ្ញាពេជ្រ ក្លាយជាជនពិការនៅតែលើរទេះរុញ ហើយបន្តព្យាបាលដោយស្ងៀមស្ងាត់ និងមិនមានក្តីសង្ឃឹម ។
វីដេអូឃ្លីបរយៈពេលប្រមាណ៧នាទីកន្លះ បង្ហាញកាលពីថ្ងៃទី២៣ កុម្ភៈ ២០១៥ ពៅ បញ្ហាពេជ្រ បានរ៉ាយរាប់ពីទុក្ខលំបាកនៃអាការជំងឺរបស់នាង ដែលរហូតមកដល់ពេលនេះនាងនៅតែបន្តអង្គុយនៅលើរទេះរុញដដែល ចំណែកក្តីសង្ឃឹមនៃការជាសះស្បើយនោះគឺហាក់មិនមានពន្លឺទេ ។
ពៅ បញ្ញពេជ្រ បានរៀបរាប់ថា នេះជាវីដេអូថ្មីមួយទៀតរបស់នាងស្របខួប៨ឆ្នាំដែលនាងរងការបាញ់ប្រហារ តែរហូតមកដល់ពេលនេះនាងនៅតែពិបាក និងបន្តអង្គុយតែនៅលើតែរទេះរុញដដែល ។ វីដេអូឃ្លីបនេះគឺនាងចង់បង្ហាញពីបញ្ហាសុខភាពរបស់នាងសម្រាប់អ្នកដែលចង់ដឹងពីសុខទុក្ខរបស់នាង ជាពិសេសផ្ញើដល់អ្នកដែលនៅតែចងចាំ និងគាំទ្ររូបនាង ។
តាមការឲ្យដឹងពី ពៅ បញ្ហាពេជ្រ រយៈពេល៨ឆ្នាំហើយសុខភាពរបស់នាងមិនវិវឌ្ឍអ្វីជាដុំកំភួនឡើយ ខណៈពេលដែលជើងរបស់នាងដែលស្ពឹកស្រពន់នោះនៅមិនទាន់អាចលើកឡើងដោយខ្លួនឯងបាននៅឡើយទេ ។ កន្លងមកមានប្រិយមិត្តមួយចំនួនងឿងឆ្ងល់ថា តើហេតុអ្វីបានជានាងបង្ហោះរូបភាពនៅលើហ្វេសប៊ុកជាបន្តបន្ទាប់ ប៉ុន្តែហេតុអ្វីបានជានាងមិនអាចដើរបាន ។ ត្រង់ចំណុចនេះនាងចង់បញ្ជាក់ថា នាងមានបញ្ហាផ្នែកខួរឆ្អឹងខ្នង ហើយជំងឺមួយនេះគឺពិបាកព្យាបាលបំផុត ។ វាមិនដូចជាអ្នកដែលមានបញ្ហាបាក់ឆ្អឹង ដាច់ស្បែក ដែលអាចតភ្ជាប់គ្នាវិញបានឡើយ ប៉ុន្តែជំងឺរបស់នាងជាប់ទាក់ទងជាមួយសរសៃ ដែលវាពិបាករីកលូតលាស់ណាស់ ។ ហេតុដូច្នេះរូបនាង ក៏ដូចជាក្រុមគ្រូពេទ្យនៅមិនទាន់ហ៊ានអះអាងបាននៅឡើយទេថា រូបនាងអាចនឹងដើរបាននៅក្នុងអំឡុងពេលណាឡើយ គឺអាស្រ័យទៅលើពេលវេលា និងជោគជាតារាសី គួបផ្សំជាមួយនឹងការហាត់ប្រាណជារៀងរាល់ថ្ងៃផង ។
ពៅ បញ្ញាពេជ្រ បញ្ជាក់ថា ជារៀងរាល់ថ្ងៃនាងមិនអាចចេញទៅណាក្រៅពីក្នុងផ្ទះឡើយ ហើយនាងអាចទទួលដឹងព័ត៌មានទាំងឡាយគឺអាស្រ័យលើហ្វេសប៊ុកដែលនាងមានមិត្តភក្តិជាច្រើន ។ នាងថតរូបបង្ហោះក្នុងសភាពញញឹមញញែមនោះ គឺមិនប្រាកដថា នាងធូរស្រាលពីជំងឺឡើយ ផ្ទុយទៅវិញ ពេលខ្លះនាងបង្ហោះរូបនេះហើយចាប់ផ្តើមឈឺចុកចាប់ក៏មាន ។ ម្យ៉ាងទៀតបច្ចុប្បន្ននាងក៏ប្រឈមមុខជាមួយនឹងជំងឺតម្រងនោមផងដែរ ។ នៅពេលដែលនាងមានការឈឺចាប់ ម្តងៗ គឺនាងត្រូវទៅមន្ទីរពេទ្យជាបន្ទាន់ ដោយការចំណាយក្នុង មួយលើកៗ ពី១ពាន់ទៅ២ពាន់ដុល្លារ ។ ការចំណាយនេះធ្វើឲ្យនាងពិបាកចិត្តយ៉ាងខ្លាំងដោយសារតែក្រុមគ្រួសាររបស់នាងមិនសូវមានចំណូលគ្រប់គ្រាន់ក្នុងការចំណាយលើការព្យាបាលជំងឺរបស់នាង ប៉ុន្តែបើមិនព្យាបាលទេនោះ នាងនឹងបាត់បង់ជីវិត ។
ក្នុងនាមជាអតីតតារាចម្រៀងដែលធ្លាប់មានការគាំទ្រមួយរូប ពៅ បញ្ញាពេជ្រ បានសម្តែងការដឹងគុណដល់បណ្តាទស្សនិកជនដែលតែងតែផ្តល់ការលើកទឹកចិត្តដល់រូបនាង ជាពិសេសអ្នកដែលបានជួយឧបត្ថម្ភដល់រូបនាងនាពេលកន្លងមក ។
អតីតតារាចម្រៀងនាង ពៅ បញ្ញាពេជ្រ បានចូលប្រឡូកក្នុងវិស័យសិល្បៈចម្រៀងរយៈពេល៧ឆ្នាំ ធ្វើឱ្យនាងមានកេរ្តិ៍ឈ្មោះល្បីតាមរយៈទឹកដមសំឡេងពីរោះ ។
ពៅ បញ្ញាពេជ្រ ត្រូវជនមិនស្គាល់មុខបាញ់ប្រហារនៅថ្ងៃទី២៣ កុម្ភៈ ២០០៧ វេលាម៉ោង៦និង២០នាទីព្រឹកនៅក្បែររបងក្រសួងឧស្សាហកម្ម រ៉ែ និងថាមពល បណ្តាលឱ្យរងរបួសធ្ងន់ស្ទើរស្លាប់ ស្ទើររស់ ៕
ចែករំលែកព័តមាននេះ