ក្រុងប៉ោយប៉ែត ៖ ជាការពិតណាស់ ប្រមុខរាជរដ្ឋាភិបាល ដែលមានសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានខិតខំយកចិត្តទុកដាក់ក្នុងការកែទម្រង់ស៊ីជម្រៅយ៉ាងក្តៅគគុកដាក់ចេញនូវគោលនយោបាយភូមិ-ឃុំមានសុវត្ថិភាពដើម្បីឱ្យអាជ្ញាធរមានសមត្ថកិច្ច កងកម្លាំងប្រដាប់អាវុធទាំង២ប្រភេទ គឺសមត្ថកិច្ចប៉ូលិស និងប៉េអឹម ដែលឈរជើងនៅតាមមូលដ្ឋានគោលដៅរបស់ខ្លួនយកទៅអនុវត្តដើម្បីរក្សាសន្តិសុខ និងការពារសណ្តាប់ធ្នាប់សាធារណៈជូនប្រជាពលរដ្ឋឱ្យមានសុខសន្តិភាព ។
តែផ្ទុយទៅវិញ គេសង្កេតឃើញនៅក្នុងទឹកដីតំបន់ជាយដែនកម្ពុជា-ថៃ ក្នុងអាណាចក្រក្រុងប៉ោយប៉ែត បែរជាគ្មានន័យទៅវិញ ខណៈពេលដែលមានប៉ូលិស និងប៉េអឹមមួយចំនួនតូច បានកំពុងតែប្រព្រឹត្តអំពើល្មើសប្រឆាំងទៅនឹងថ្នាក់ដឹកនាំ និងបានយកខ្លួនធ្វើជាអ្នកកាង និងបើកបនល្បែងស៊ីសងពាលាអាវ៉ាសែ ខុសច្បាប់យ៉ាងអនាធិបតេយ្យ ដើម្បីប្រមូលយកផលប្រយោជន៍យកទៅធ្វើមានធ្វើបានដោយខ្លួនឯងទៅវិញ ។
តាមប្រភពព័ត៌មានពីប្រជាពលរដ្ឋនៅក្រុងប៉ោយប៉ែតបានរាយការណ៍ឱ្យដឹងថា បនល្បែងស៊ីសងនៅក្នុងតំបន់ជាយដែនកម្ពុជា-ថៃ គឺកើតមានយ៉ាងស្អេកស្កះ ដូចផ្សិតត្រូវទឹកភ្លៀងអ៊ីចឹង មានដូចជាកន្ទុយលេខ (ឆ្នោត) ត្រូវបានគេដាក់តុតាំងដូចលក់លៀស នៅតាមទីផ្សារក្នុងក្រុងប៉ោយប៉ែតរាប់សិបកន្លែង ។ ក្រៅពីល្បែងកន្ទុយលេខ មានល្បែងពេញនិយមភ្នាល់បាល់តាមអ៊ីនធើរណេត (អន ឡាញ) ប្រមាណជាង២០កន្លែង កើតមានយ៉ាងអនាធិបតេយ្យតែម្តង ។
ប្រភពបន្តថា មេបនដែលបើកល្បែងស៊ីសងទាំងអស់នេះ ភាគច្រើនពុំសូវមានប្រជាពលរដ្ឋនោះទេ គឺជារបស់សមត្ថកិច្ចប៉ូលិស និងប៉េអឹម ដែលជាអ្នកមានឥទ្ធិពល និងអំណាចធំ ឬមានអំណាចល្មមៗ ទើបអាចបើកបនល្បែងទាំងអស់នេះបាន ។ បើតាមប្រភពពីសមត្ថកិច្ចមួយរូប សុំមិនបញ្ចេញឈ្មោះបានបង្ហើបឱ្យដឹងថា សមត្ថកិច្ចដែលមានជំនាញខាងកាង និងបើកល្បែងស៊ីសងទាំងអស់នេះ បានភាគច្រើនកើតចេញពីខាងសមត្ថកិច្ចប៉េអឹមតែម្តង ។
ប្រភពបន្តថា ក្នុងនោះត្រូវបានគេស្គាល់មន្ត្រីប៉េអឹមម្នាក់ឈ្មោះតែម បូឡា ពាក់ស័ក្តិ៣ និងមានមួយចំនួនតូចទៀត មិនទាន់បញ្ចេញឈ្មោះ ដែលល្មោភនិងលុយយកទៅធ្វើមានធ្វើបាន មិនបានគិតពីប្រយោជន៍ជាតិ ប្រមូលយកលុយពីបនល្បែង ទៅទិញរថយន្តស៊េរីថ្មីទំនើបៗ មានតម្លៃរាប់សែនដុល្លារសម្រាប់ជិះបង្អួតស្រីស្នេហ៍ និងបង្អួតគេឯងក្នុង១នាក់ ២ទៅ៣គ្រឿងឯណោះ ។
ចំណែកលោកតែម បូឡា មេបញ្ជាការរងប៉េអឹមក្រុងប៉ោយប៉ែតដែលរងការចោទប្រកាន់ថា មានការបើកល្បែងស៊ីសងទាំងអស់នេះ មិនអាចសុំការបំភ្ឡឺបានទេ នៅព្រឹកថ្ងៃទី២៤ កុម្ភៈ ២០១៥ នេះ ។ ជុំវិញបញ្ហាទាំងអស់នេះ ប្រជាពលរដ្ឋសមានសមត្ថកិច្ចគ្រប់លំដាប់ថ្នាក់ ដែលមានតួនាទីឈរជើងនៅក្នុងទឹកដីក្រុងប៉ោយប៉ែត បានទទូចសុំឱ្យអស់លោកអាជ្ញាធរមានសមត្ថកិច្ចគ្រប់លំដាប់ថ្នាក់ដែលមានតួនាទីឈរជើងនៅក្នុងទឹកដីក្រុងប៉ោយប៉ែត ជាពិសេសគឺលោកឧត្តមសេនីយ៍ត្រីឱ បូរិន មេបញ្ជាការប៉េអឹមខេត្ត ល្មមគិតគូរចាត់វិធានការជួយទប់ស្កាត់បង្ក្រាបនូវបទល្មើសបនល្បែងទាំងអស់នេះ ឱ្យបានទាន់ពេលវេលាផង ចៀសវាងកុំឱ្យកើតមានអំពើចោរកម្មលួច ឆក់ កាប់ សម្លាប់ ប្លន់យកទ្រព្យសម្បត្តិប្រជាពលរដ្ឋស្លូតត្រង់ ដើម្បីឱ្យស្របទៅតាមយុទ្ធសាស្ត្ររបស់រាជរដ្ឋាភិបាល ដែលដឹកនាំដោយសម្តេចតេជោ ហ៊ុន សែន ។
ចែករំលែកព័តមាននេះ