ស្ករត្នោតកំពង់ស្ពឺកំពុងមានទីផ្សារក្នុងស្រុកបន្តហក់ចូលទីផ្សារបរទេស
ខេត្តកំពង់ស្ពឺ ៖ ដើមត្នោតដែលដុះឡើងត្រដែតនៅវាលស្រែនៃប្រទេសកម្ពុជា ជានិមិត្តរូបនៃទេសភាពស្រុកខ្មែរ ។ ដើមត្នោតមានប្រភពមកពីប្រទេសឥណ្ឌា និងមកដល់អាស៊ី
ខេត្តកំពង់ស្ពឺ ៖ ដើមត្នោតដែលដុះឡើងត្រដែតនៅវាលស្រែនៃប្រទេសកម្ពុជា ជានិមិត្តរូបនៃទេសភាពស្រុកខ្មែរ ។ ដើមត្នោតមានប្រភពមកពីប្រទេសឥណ្ឌា និងមកដល់អាស៊ីអាគ្នេយ៍តាំងពីកកើតមានប្រទេសកម្ពុជាមកម្ល៉េះ ។
ដើមត្នោតមានប្រយោជន៍ណាស់ គេប្រើវាសម្រាប់សង់ផ្ទះ ផ្កាគេកៀបយកទឹក ស្លឹកធ្វើមួក ឬស្មុក និងស្លឹកកណ្តបប្រក់់ផ្ទះ ផ្លែសម្រាប់ធ្វើអាហារ និងឫសរបស់វាសម្រាប់ធ្វើថ្នាំបុរាណ ។ សព្វថ្ងៃ ត្នោតជានិមិត្តរូបជាតិស្ករត្នោតតំបន់កំពង់ស្ពឺ ស្ថិតនៅខាងលិចរាជធានីភ្នំពេញ ហើយស្ករត្នោតមានឈ្មោះល្បីជាងគេនៅប្រទេសកម្ពុជា ។ ការប្រមូលផល និងការកែច្នៃឱ្យទៅជាស្ករត្នោតបានធ្វើឡើងតៗគ្នាពីបុព្វបុរសមក គឺជាបេតិកភណ្ឌវប្បធម៌មរតក ។ ចំណេះដឹងនេះមានភាពសម្បូរបែបតាំងពីរាប់ឆ្នាំមកហើយ និងជាកេរដំណែលបទពិសោធន៍ដ៏ច្រើនលើសលប់ ។
លោក សំ សារឿន ប្រធានសមាគមលើកកម្ពស់ស្ករត្នោតខេត្ត ឱ្យដឹងថា សព្វថ្ងៃនេះមានសហគមន៍អភិវឌ្ឍន៍កសិកម្មស្ករត្នោតកំពង់ស្ពឺ ដែលមានលោក ហុង ហឿន ជាប្រធាន មានទីតាំងនៅឃុំភ្នំតូច ស្រុកឧដុង្គ ខេត្តកំពង់ស្ពឺ ។ លោកបន្តថា សហគមន៍មានតួនាទីរៀបចំសៀវភៅបន្ទុកណែនាំពីការផលិត ចំណែកសមាគមមានប្រព័ន្ធត្រួតពិនិត្យ និងមានភារកិច្ចដើរមើលក្នុងតំបន់ដែលមានអ្នកធ្វើស្ករត្នោតថា តើដីនោះមាននៅក្នុងស្តង់ដាដែរឬទេ ។ នីតិវិធីផលិតតាំងពីដើមរហូតដល់ចប់ ក៏ត្រូវដាក់ឱ្យតាមដានដំណើរការផងដែរ គេត្រូវគោរពទៅលើបទដ្ឋានអនាម័យ និងបែបបទការងារប្រកបដោយអនាម័យ និងមានលក្ខណៈបុរាណ ។ ទាក់ទងនឹងស្ករត្នោតកំពង់ស្ពឺ គឺផ្សារភ្ជាប់ប្រពៃណី កេរដំណែលដែលផុសចេញពីធម្មជាតិ ។
លោកប្រធានសមាគមលើកកម្ពស់ស្ករត្នោតខេត្តលើកឡើងថា មុនត្រងយកទឹក គេត្រូវកៀបផ្កាឈ្មោល៣ដងក្នុងមួយព្រឹក ហើយក្នុងរយៈពេល៥ព្រឹក យើងត្រូវការរូតផ្កានោះដោយយកកាំបិតចិតកាត់មុខផ្កាពេលមានទឹក គេយកបំពង់ទៅត្រង ដែលនេះគឺជាបច្ចេកទេសពីបុរាណមក ។ ពេលដាក់ចុះពីលើដើម គឺមិនអាចទុកទឹកត្នោតនោះលើសពី២ម៉ោងទេ កាលណាលើស២ម៉ោងទឹកត្នោតវានឹងជូរ ព្រោះឡើងមេហើយនឹងបាត់ក្លិន ។ ក្នុងការត្រងយកទឹក គេនិយមប្រើបំពង់ឫស្សី ព្រោះបំពង់ឫស្សីអាចរក្សាក្លិនបានល្អ ការពារពន្លឺថ្ងៃ ហើយក្នុងបំពង់គេដាក់សម្បកពពេល ដើម្បីជួយកាត់បន្ថយការឡើងមេ និងចៀសវាងកុំឱ្យទឹកត្នោតទៅជាជូរ ។
កសិករម្នាក់ឈ្មោះ ហុង ហុក រស់នៅភូមិត្រពាំងអន្ទង់ ឃុំចាន់សែន ស្រុកឧដុង្គខេត្តកំពង់ស្ពឺ ឱ្យដឹងដែរថា ការផលិតស្ករត្នោតធ្វើឡើងតាមបែបធម្មជាតិសុទ្ធៗ ។ ក្រោយដាក់ចុះពីដើម គេរម្ងស់ទឹកត្នោតដោយប្រើអុស និងចង្ក្រានកែច្នៃ (ចង្ក្រានគុក) មានបំពង់ផ្សែង។កាលណាទឹកត្នោតរីងហើយមានពណ៌ជើងអង្ក្រង គេយកឧបករណ៍ស្នូលទៅកូរឱ្យទៅជាស្ករត្នោតហើយប៉ាតជាមួយឆ្នាំងខ្ទះឱ្យស្ងួត ទើបរែង ពេលរែងហើយក៏យកមកហាលថ្ងៃ ។ ចំពោះការហាលក្រោយពេលរាយសព្វហើយ ត្រូវយកស្បៃមកគ្របការពារធូលីដីហុយលើ ។
ក្លិនពិសេសរបស់ស្ករត្នោត គឺអាស្រ័យដោយពពួកទឹកភ្លៀងដែលច្រើនតែមានតិចតួច និងអាស្រ័យដីនៅតំបន់នោះមានខ្សាច់នៅស្រទាប់លើ និងមានក្រួសនៅស្រទាប់ជ្រៅធ្វើឱ្យទឹកជ្រាបបានល្អ ទើបទឹកត្នោតមានរសជាតិផ្អែមឈ្ងុយឆ្ងាញ់ពិសេស ។ នៅក្នុងបរិបទនេះ ការការពារផលិតផលសម្គាល់ភូមិសាស្ត្រមួយ ត្រូវបានបង្កើតឡើងដើម្បីធានាដល់អ្នកប្រើប្រាស់នូវឈ្មោះ គុណភាព និងរសជាតិដើមនៃស្ករត្នោតមកពីកំពង់ស្ពឺ ។ ហេតុនេះហើយទើបមានការអន្តរាគមន៍មកពីសមាគមដើម្បីលើកកម្ពស់ស្ករត្នោត ។ ស្ករត្នោតកំពង់ស្ពឺបច្ចុប្បន្នមានទីផ្សារនៅក្នុងស្រុក ១គីឡូក្រាមតម្លៃចាប់ពី២.៧០០រៀលទៅ៣.០០០រៀល ។ ចំពោះទីផ្សារបរទេស គឺ៣.៥០០រៀល ។
ក្នុងនាមប្រធានសហគមន៍ លោកក៏សូមអំពាវនាវផងដែរដល់បងប្អូនខ្មែរដែលរស់នៅបរទេស សូមជួយងាកមកគាំទ្រស្ករត្នោតរបស់ខ្មែរយើងឱ្យបានផុលផុសដើម្បីជួយលើក កម្ពស់កម្រិតជីវភាព ក៏ដូចជាការលើកទឹកចិត្តរបស់ពួកគាត់ឱ្យកាន់តែខិតខំផលិតស្ករត្នោតឡើង ។ ចំពោះការលក់វិញ លោក ហុក ហឿន បន្តឱ្យដឹងទៀតថា សព្វថ្ងៃនេះសហគមន៍មានដៃគូនាំស្ករត្នោតចេញទៅក្រៅប្រទេសចំនួន៨ ចំនួន២ក្រុមហ៊ុន គឺក្រុមហ៊ុនកុងហ្វីរ៉ែល និងក្រុមហ៊ុនហ្វាមលីង ដែលឈានមុខគេក្នុងការនាំស្ករត្នោតកំពង់ស្ពឺចេញក្រៅប្រទេស ។ ក្នុងនោះការនាំស្ករត្នោតចេញមានចំនួន១៥ប្រទេសដូចជា បារាំង អូស្ត្រាលី អាល្លឺម៉ង់ អូទ្រីស ញូវហ្សឺលែន ប៊ែលហ្សិក ហូឡង់ អាមេរិក ចិន ជប៉ុន វៀតណាម និងម៉ាឡេស៊ី ។
កញ្ញាណារ៉ានូអាលីនី អ្នកចាត់ការទូទៅក្នុងសហគមន៍ឱ្យដឹងដែរថា ទាក់ទងទៅនឹងស្ករត្នោតកំពង់ស្ពឺ ដែលរៀបចំឡើងដោយសហគមន៍ យើងមានផែនការចុះប្រមូលទិញពីសមាជិកគ្រប់រូប ក្នុងនោះនៅពេលដែលប្រមូលទិញ សមាជិកត្រូវរៀបម្រុងស្ករទុកនៅតាមមុខផ្ទះជាស្រេចហើយពេលទិញ គឺគិតលុយភ្លាមៗតែម្តង ។ ចំពោះនីតិវិធីក្នុងការលក់ស្ករបន្តទៅឱ្យអតិថិជន គឺអនុវត្តតាមកិច្ចសន្យា ក្នុងនោះកិច្ចសន្យានីមួយៗ គឺប្រែប្រួលតាមក្រុមហ៊ុននីមួយៗដែលគេចង់បាន ក្នុងនោះក្រុមហ៊ុនត្រូវវេចខ្ចប់ទៅតាមបទដ្ឋានអនាម័យ ។ កញ្ញាណារ៉ានូអាលីនី បន្តថា សារធាតុចិញ្ចឹមរបស់ស្ករធម្មជាតិមានសារសំខាន់ជាខ្លាំង ព្រោះស្ករមានសារធាតុការូសេន១០០ភាគរយ ចំណែកស្ករត្នោតវិញ គឺជាស្ករដើមសម្បូរទៅដោយវីតាមីន និងសារធាតុតូចៗ ។
គេប្រើស្ករត្នោតប្រចាំថ្ងៃ និងគ្រប់ពេលវេលាប្រើដាក់ក្នុងតែ នំ កាហ្វេ និងសម្រាប់ចម្អិនអាហារដែលជាស្ករដែលមានរសជាតិពិសេស និងមានក្លិនឈ្ងុយ លក្ខណសម្បត្តិទាំងពីរនេះហើយដែលបន្ថែមរសជាតិលើអាហារឱ្យកាន់តែប្លែក ។ ស្ករមិនត្រឹមមានរសជាតិឈ្ងុយ ថែមទាំងជួយដល់សុខភាពទៀត ដែលបង្ហាញនូវភាពសម្បូរបែបនៃវប្បធម៌ខ្មែរ បទពិសោធន៍ និងចំណូលចិត្តដ៏ខ្លាំងក្លា ។ ជាទូទៅ អ្នកកំពង់ស្ពឺ ក៏ដូចជាអ្នករស់នៅក្នុងនិងក្រៅប្រទេស ទាំងបុរស និងស្ត្រីផងដែរ ៕
ចែករំលែកព័តមាននេះ