ខេត្តប៉ៃលិន ៖ គេសង្កេតឃើញថា រថយន្តថៃរាប់សិបគ្រឿងបានបើកចូលមកទិញផ្លែតាង៉ែន ហៅមៀនប៉ៃលិនតាមច្រកព្រំដែនអន្តរជាតិកម្ពុជា-ថៃ ខណៈដំណាំមួយប្រភេទនេះមានហាងឆេងខ្ពស់គួរឱ្យកត់សម្គាល់នាដើមឆ្នាំ២០១៥នេះ ដោយពីមុនផ្លែតាង៉ែនលេខមួយគេលក់ត្រឹមតែ១គីឡូក្រាមថ្លៃ៤០ទៅ៥០បាត(ប្រាក់ថៃ)ប៉ុណ្ណោះ ប៉ុន្តែបច្ចុប្បន្ននេះគេលក់១គីឡូក្រាមថ្លៃពី៧០ទៅ៨០បាតឯណោះធ្វើឱ្យកសិករម្នាក់ៗ ដែលប្រកបមុខរបរនេះមានទឹកមុខញញឹមញញែមស្ទើរស្ងួតជើងធ្មេញ ដោយលក់បានលុយរាប់លានដុល្លារ ។
ជាក់ស្តែងនៅក្នុងចម្ការរបស់កសិករម្នាក់ឈ្មោះ សា ចំរើន ហៅអឿង អាយុ៤៥ឆ្នាំ ស្ថិតនៅភូមិទឹកចេញ ឃុំស្ទឹងកាច់ ស្រុកសាលាក្រៅ កំពុងតែប្រមូលផលតាង៉ែនយ៉ាងមមាញឹក ។ សូមបញ្ជាក់ថា បច្ចុប្បន្ននេះដំណាំតាង៉ែនកំពុងតែពេញនិយមពីសំណាក់ប្រទេសជិតខាងចូលមកទិញ ដូចជាថៃជាដើម បើទោះបីជាកសិករយើងដាំបានរាប់សិបហិកតា ក៏មិនមានការធ្លាក់ហាងឆេងឡើយ ដូច្នេះកសិករម្នាក់ៗ ដែលប្រកបមុខរបរដំណាំដំឡូងមីខាតដើមខាតចុង បានទុកដីរបស់ខ្លួនមួយចំណែកដើម្បីដាំដំណាំនេះ ព្រោះជាដំណាំឆាប់ទទួលបានផល ក្រោយពីដាំតែរយៈពេល៣ទៅ៤ឆ្នាំប៉ុណ្ណោះ អាចទាញយកផលគួរជាទីពេញចិត្ត ដោយ១ឆ្នាំៗទិន្នផលរបស់វាមានការកើនឡើងគួរឱ្យកត់សម្គាល់ផងដែរ ។
បើតាមការរៀបរាប់ពីលោក សា ចំរើន ហៅអឿង ជាម្ចាស់ចម្ការបានឱ្យដឹងថា គាត់មានដីចំនួន២០ហិកតានៅជាប់នឹងផ្លូវជាតិ៥៧ ដោយដាំតាង៉ែនទាំងអស់ចំនួន១.៩០០ដើម ហើយទទួលផលជាច្រើនឆ្នាំមកហើយ គឺតាំងពីការតុបតែងមែករហូតដល់រុក្ខជាតិមួយនេះទទួលផលមានរយៈពេលប្រហែល៧ខែ ។ លោកបានបន្តទៀតថា ជារៀងរាល់ឆ្នាំការលក់តាង៉ែនឱ្យសមាគមថៃ គឺក្នុង១គីឡូក្រាមពី៤០បាតទៅ៥០បាត(ប្រាក់ថៃ) ដោយឡែកនៅថ្ងៃទី២២ កុម្ភៈ ២០១៥នេះ គាត់លក់បាន១គីឡូក្រាមថ្លៃ៦០ទៅ៧០បាត ហើយតាមការប៉ាន់ប្រមាណមើលការប្រមូលផលនៅឆ្នាំនេះ អាចទទួល៤៥០តោនឯណោះ ដោយបេះរយៈពេល២ថ្ងៃទើបអស់ ។
គាត់បញ្ជាក់ទៀតថា ការជួលកម្មករ គឺឈ្មួញជាអ្នកចេញប្រាក់ឱ្យគេ ដោយ១កញ្ឆេរមានទម្ងន់ជាង១០គីឡូក្រាមឱ្យថ្លៃឈ្នួល៤០បាត(ប្រាក់ថៃ) ។ លោកក៏លើកទឹកចិត្តឱ្យបងប្អូនប្រជាពលរដ្ឋរស់នៅខេត្តប៉ៃលិន និងខេត្តនានានៅទូទាំងប្រទេសដែលមានដីទួលមិនជាំទឹក អាចនាំគ្នាសាកល្បងដាំដំណាំនេះ ព្រោះក្នុង១ដើមៗ ទទួលបានផលពី១០០ទៅ២០០គីឡូក្រាម អាចលើសនេះបើសិនជាដើមតាង៉ែននេះកាន់តែយូរឆ្នាំ ។ រហូតមកដល់ពេលនេះគាត់លក់បានប្រាក់មិនតិចនោះទេ ហើយលោកបន្តដាំរាប់រយដើមថែមទៀត ដើម្បីអភិវឌ្ឍន៍សេដ្ឋកិច្ចក្នុងគ្រួសារឱ្យកាន់តែមានហូរហៀរផងដែរ ៕
ចែករំលែកព័តមាននេះ