ខេត្តប៉ៃលិន ៖ កសិដ្ឋានចិញ្ចឹមជ្រូកដ៏ធំមួយ ដែលសាងសង់ស្របតាមស្តង់ដាបច្ចេកទេស មិនបង្កក្លិនស្អុយធ្វើឱ្យប៉ះពាល់ដល់បរិស្ថានរស់នៅរបស់ពលរដ្ឋនៅជុំវិញ គឺស្ថិតនៅជាប់ផ្លូវជាតិលេខ៥៧
ខេត្តប៉ៃលិន ៖ កសិដ្ឋានចិញ្ចឹមជ្រូកដ៏ធំមួយ ដែលសាងសង់ស្របតាមស្តង់ដាបច្ចេកទេស មិនបង្កក្លិនស្អុយធ្វើឱ្យប៉ះពាល់ដល់បរិស្ថានរស់នៅរបស់ពលរដ្ឋនៅជុំវិញ គឺស្ថិតនៅជាប់ផ្លូវជាតិលេខ៥៧ ក្នុងភូមិសួស្តី សង្កាត់អូរតាវ៉ៅ ក្រុងប៉ៃលិន ។ កសិដ្ឋានមួយនេះជារបស់លោកឧកញ៉ា ជា គា ដែលសាងសង់ឡើងអស់រយៈពេលប្រហែល៤ឆ្នាំហើយ ។ គិតមកដល់ពេលនេះ មានជ្រូកសាច់សម្រាប់ផ្គត់ផ្គង់តម្រូវការទីផ្សារក្នុងនិងក្រៅខេត្តជាង១ម៉ឺនក្បាល ដោយក្នុង១ថ្ងៃលក់ចេញពី៤០ទៅ៥០ក្បាល ។ បច្ចុប្បន្នកសិដ្ឋានមួយនេះ កំពុងបំពាក់ឧបករណ៍ទំនើបសម្រាប់កែច្នៃលាមកជ្រូកឱ្យទៅជាហ្គាសសម្រាប់ប្រើប្រាស់ក្នុងកសិដ្ឋាន និងត្រៀមលក់ចែកចាយក្នុងពេលឆាប់ៗខាងមុខ ។
លោក ប៉ុស សុជា មេការគ្រប់គ្រងក្នុងកសិដ្ឋានចិញ្ចឹមជ្រូក បានឱ្យដឹងថា កសិដ្ឋានចិញ្ចឹមជ្រូកនេះ មានកម្មករកំពុងបំពេញការងារប្រមាណ៧០នាក់ មានម៉ាស៊ីនសម្រាប់ផលិតចំណីជ្រូកដោយខ្លួនឯង ដោយមិនចាំបាច់ទិញពីប្រទេសជិតខាងឡើយ ។ ចំណែកក្លិនសាយភាយលាមក និងចំណីអាហាររបស់ជ្រូកមានតិចតួចបំផុត ។ កសិដ្ឋាននេះ ចិញ្ចឹមតែជ្រូកសាច់សុទ្ធប៉ុណ្ណោះ សម្រាប់លក់ចែកចាយនៅក្នុងខេត្តប៉ៃលិន ខេត្តបាត់ដំបង ដោយក្នុង១ថ្ងៃៗលក់ចេញប្រហែល៥០ក្បាល ។
លោកបានបន្តថា ដោយឡែកការបង្កាត់ពូជជ្រូក គឺមានកសិដ្ឋានមួយទៀតស្ថិតនៅចំណុចអូរកម្មករ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ លុះពេលជ្រូកកើតកូនរួច ទើបដឹកមកថែបំប៉ននៅក្នុងកសិដ្ឋាននេះ គឺតាំងពីជ្រូកកើតកូនរហូតដល់ពេលចាប់លក់មានរយៈពេលប្រហែល១៥០ថ្ងៃ ។
ចំពោះបរិស្ថាន លោកបានបញ្ជាក់ថា ដើម្បីកុំឱ្យប៉ះពាល់ធ្ងន់ធ្ងរដល់ពលរដ្ឋដែលរស់នៅក្បែរ ក្រុមហ៊ុនរបស់លោកឧកញ៉ា ជា គា ក៏បានរៀបចំអាងស្តុកលាមកសត្វជ្រូក ដែលមានប្រវែងបណ្តោយ១០០ម៉ែត្រគុណនឹងទទឹង៥០ម៉ែត្រនៅខាងក្រោយកសិដ្ឋាន ដោយបង្ហូរលាមកចូលទៅក្នុងអាងនេះ ហើយគ្របតង់កៅស៊ូក្រាសពីលើ ដោយទុករហូតដល់លាមកសត្វជ្រូកហូរចូលពេញ មានកម្លាំងហ្គាសពី៥០០ ទៅ៦០០គីឡូវ៉ាត់ ទើបខាងលោកអាចបង្កើតទៅជាហ្គាសសម្រាប់ផ្គត់ផ្គង់តម្រូវការក្នុងកសិដ្ឋាន និងលក់ចែកចាយទៅខាងក្រៅថែមទៀតផង ។
រហូតមកដល់ពេលនេះ ក្រុមហ៊ុនកំពុងបំពាក់ឧបករណ៍ឌីណាម៉ូម៉ា ស៊ីនភ្លើង ដែលនឹងប្រើប្រាស់ដោយហ្គាសផលិតចេញពីលាមកជ្រូកនេះ សម្រាប់បំភ្លឺនៅក្នុងកសិដ្ឋានទាំងមូល ធ្វើឱ្យយើងកាត់បន្ថយការចំណាយបានច្រើន ពិសេសទៅលើការប្រើប្រាស់អគ្គិសនី ៕
ចែករំលែកព័តមាននេះ