រាជធានីភ្នំពេញ ៖ ក្នុងឆ្នាំថ្មីនេះ វិស័យដីធ្លីហាក់មានកំណើនខ្លាំងជាងឆ្នាំកន្លងទៅ ដោយអ្នកវិនិយោគមួយចំនួន កាលពីឆ្នាំ២០១៤បានសរសើរថា វិស័យដីធ្លីមានស្ថានភាពល្អប្រសើរ តែដោយឡែកឆ្នាំ២០១៥
រាជធានីភ្នំពេញ ៖ ក្នុងឆ្នាំថ្មីនេះ វិស័យដីធ្លីហាក់មានកំណើនខ្លាំងជាងឆ្នាំកន្លងទៅ ដោយអ្នកវិនិយោគមួយចំនួន កាលពីឆ្នាំ២០១៤បានសរសើរថា វិស័យដីធ្លីមានស្ថានភាពល្អប្រសើរ តែដោយឡែកឆ្នាំ២០១៥ គ្រាន់តែរយៈជាងមួយខែកន្លងមកនេះ អ្នកវិនិយោគមួយចំនួនធំកាន់តែសរសើរពីកំណើននៃវិស័យដីធ្លីថែមទៀតជាពិសេសលើតម្លៃតាមតំបន់នានាក្នុងរាជធានីភ្នំពេញ ។
លោកគីម ហ៊ាង ប្រធានគ្រប់គ្រងក្រុមហ៊ុនអចលនទ្រព្យខ្មែររៀលអីុស្ទេត បានឲ្យដឹងថា ក្នុងឆ្នាំ២០១៥នេះ វិស័យដីធ្លីដូចជាកើនឡើងគួរឲ្យកត់សម្គាល់ ។ ប៉ុន្តែក៏អាចជាការព្រួយបារម្ភមួយដែរ ដោយសារតំបន់ខ្លះកើនឡើងខ្លាំង តែសកម្មភាពថយចុះ ព្រោះអ្នកវិនិយោគមួយចំនួនមិនមានលទ្ធភាពទិញដីសម្រាប់វិនិយោគ ឬសាងសង់ ។ ក្នុងឆ្នាំថ្មីនេះវិញ អ្នកវិនិយោគបរទេសបានសម្រុកចូលមកកម្ពុជាយ៉ាងច្រើន ហើយបាននិងកំពុងស្វែងរកទិញដីសម្រាប់បង្កើតអាជីវកម្ម ឬសាងសង់អគារផ្សេងៗនៅកណ្ដាលក្រុងថែមទៀត ។ ចំណែកអ្នកវិនិយោគក្នុងស្រុកវិញភាគច្រើនរកទិញដីនៅជាយក្រុង ព្រោះដីតំបន់នោះនៅមានតម្លៃទាប ហើយមួយចំនួនធំនៃអ្នកវិនិយោគក្នុងស្រុកដែលទិញដីហើយ ក៏ពុំមែនសាងសង់ភ្លាមៗដែរ ពួកគាត់ទិញដើម្បីរក្សាទុកលក់យកចំណេញប៉ុណ្ណោះ ដែលខុសពីអ្នកវិនិយោគបរទេសទិញដីកណ្ដាលក្រុងរួច គឺចាប់ផ្តើមរៀបចំសាងសង់ជាអ្វីមួយសម្រាប់ដំណើរការអាជីវកម្មតែម្តងដូចជា អគារខុនដូ អាផាត់មែន ឬអគារការិយាល័យជាដើម ។
លោកបន្តថា សព្វថ្ងៃនេះដីនៅកណ្ដាលក្រុងតាមតួលេខតម្លៃកើនឡើងខ្លាំង តែធាតុពិតចំពោះសកម្មភាពទិញលក់វិញ មិនអាចប្រៀបធៀបនឹងជាងក្រុងបានឡើយ ដោយសារតែវាមានតម្លៃថ្លៃខ្ពស់ពេក ហើយវាមិនមែនទើបតែឡើងពេលនេះទេ។ ម្យ៉ាងទៀតការសាងសង់ក៏ស្ទើរតែពេញផងដែរ ដូចនៅបឹងកេងកងជាដើម ។ ចំណែកនៅជាយក្រុងគិតជាភាគរយកើនឡើងស្ទើរតែ១០០ភាគរយទៅហើយក្នុងរយៈពេលជាង១ឆ្នាំនេះតួយ៉ាងដូចជា តំបន់ជ្រោយចង្វា កាលពីឆ្នាំមុនមានតម្លៃប្រមាណ៨០០ដុល្លារ ឬ៩០០ដុល្លារក្នុង១ម៉ែត្រការ៉េ តែពេលនេះវាហក់ឡើងរហូតដល់ប្រមាណ១.៥០០ដុល្លារទៅហើយក្នុងមួយម៉ែត្រការ៉េ ។ ទោះបីជាវាឡើងប៉ុណ្ណេះហើយក្តី ក៏នៅតែមានអ្នករកទិញដែរ ដែលខុសពីកណ្ដាលក្រុងឡើងតែមាត់ឡើងតែតម្លៃ តែសកម្មភាពមានតិចតួច ។ តំបន់ផ្សេងៗទៀតដែលមានកំណើនខ្លាំងដែរនោះ មាននៅភ្នំពេញថ្មី ខណ្ឌពោធិ៍សែនជ័យ និងខណ្ឌដង្កោជាដើម ។
គួរបញ្ជាក់ថា រហូតមកដល់ពេលនេះ ដីធ្លីនៅរាជធានីភ្នំពេញ មិនទាន់មានតំបន់ណាមួយដណ្ដើមបានតម្លៃខ្ពស់ជាងគេក្រៅពីតំបន់បឹងកេងកង ឬតំបន់នានានៅក្នុងខណ្ឌចំការមននៅឡើយ ។ ដីដែលស្ថិតនៅកន្លែងត្រូវប៉ាន់ដូចជា នៅផ្លូវកែងជាប់ផ្លូវធំ និងមានសក្ដានុពលអាជីវកម្ម វាមានតម្លៃរហូតដល់ជិត៧.០០០ដុល្លារអាមេរិកទៅហើយក្នុងមួយម៉ែត្រការ៉េ។ មូលហេតុដែលធ្វើឲ្យដីតំបន់ទាំងនេះនៅតែរក្សាតម្លៃខ្ពស់ជាងគេ មានកត្តាជាច្រើន ដែលអ្នកជំនាញខាងវិស័យដីធ្លីបានបញ្ជាក់ ដោយសារវាជាកន្លែងដែលល្បីយូរមកហើយបន្ទាប់ពីសម័យសង្គ្រាម ជាកន្លែងជិតទីស្នាក់ការ អង្គការសហប្រជាជាតិ ជាកន្លែងដែលប្រមូលផ្ដុំទៅដោយអាជីវកម្មចម្រុះ និងការរស់នៅបែបទំនើបៗជាដើម ៕
ចែករំលែកព័តមាននេះ