ស្រមោលខ្មៅ «ជ្រុងមួយនៃសង្គម»
បច្ចុប្បន្នសីលធម៌សង្គមត្រូវបានមើលឃើញថា ធ្លាក់ចុះយ៉ាងគំហុកគួរឲ្យព្រួយបារម្ភបំផុតនៅក្នុងប្រទេសដែលធ្លាប់តែមានអរិយធម៌ ប្រពៃណីទំនៀមទម្លាប់ល្អផូរផង់
បច្ចុប្បន្នសីលធម៌សង្គមត្រូវបានមើលឃើញថា ធ្លាក់ចុះយ៉ាងគំហុកគួរឲ្យព្រួយបារម្ភបំផុតនៅក្នុងប្រទេសដែលធ្លាប់តែមានអរិយធម៌ ប្រពៃណីទំនៀមទម្លាប់ល្អផូរផង់
បច្ចុប្បន្នសីលធម៌សង្គមត្រូវបានមើលឃើញថា ធ្លាក់ចុះយ៉ាងគំហុកគួរឲ្យព្រួយបារម្ភបំផុតនៅក្នុងប្រទេសដែលធ្លាប់តែមានអរិយធម៌ ប្រពៃណីទំនៀមទម្លាប់ល្អផូរផង់ និងវប្បធម៌ដ៏ចំណាស់នៅក្នុងតំបន់និងពិភពលោកមួយនេះ ។ ការធ្លាក់ចុះនេះ ត្រូវបានមើលឃើញតាមប្រព័ន្ធផ្សព្វផ្សាយជាតិ ស្ទើររៀងរាល់ថ្ងៃពីចាប់រំលោភសេពសន្ថវៈ ជាច្រើនករណីដែលកើតមាននៅគ្រប់ទិសទីទូទាំងប្រទេសក្នុងរយៈពេលប៉ុន្មានឆ្នាំចុងក្រោយនេះ ។ ករណីចាប់រំលោភសេពសន្ថវៈមួយចំនួន ស្ទើរតែមិនគួរឲ្យជឿនៅក្នុងប្រទេសដែលប្រកាន់ខ្ជាប់ខ្ជួននូវព្រះពុទ្ធសាសនា នោះគឺឪពុកចាប់កូនស្រីបង្កើតរបស់ខ្លួនរំលោភ និងរំលោភជាច្រើនដងរហូតដល់មានផ្ទៃពោះថែមទៀត បងប្រុសចាប់រំលោភប្អូនស្រីបង្កើត កូនបង្កើតចាប់រំលោភម្តាយចាស់របស់ខ្លួន តាចាស់វ័យ៨៥ឆ្នាំ ចាប់រំលោភកូនក្មេងមានអាយុត្រឹម៦ឆ្នាំ និងក្មេងប្រុសមិនទាន់ពេញវ័យចាប់រំលោភក្មេងស្រីមានអាយុក្រោម១០ឆ្នាំជាអនីតិជនដូចគ្នាជាដើម ។ល។
តើហេតុអ្វីបានជាមានការចាប់រំលោភបែបអគតិខាងលើនេះកើតឡើង ? វាជាកំហុសរបស់សង្គមទាំងមូល កតា្តចំណេះដឹង កត្តាគ្រួសារ បុគ្គលផ្ទាល់ ឬ វាកើតឡើងដោយសារកត្តារួមផ្សំជាច្រើនទៀតដែលជាកោសិកាសង្គម ? តើករណីនេះ នរណាខ្លះជាអ្នកទទួលខុសត្រូវ និងត្រូវរួមគ្នាទប់ស្កាត់និងដោះស្រាយបែបណា ?
បើតាមអត្ថបទដែលចុះផ្សាយនៅតាមប្រព័ន្ធផ្សព្វផ្សាយនានាទាំងសារព័ត៌មានបោះពុម្ពផ្សាយ វិទ្យុ និងទូរទស្សន៍ សុទ្ធតែបានស្រង់សម្តីជនដៃដល់ ឬសមត្ថកិច្ចមកអះអាងបញ្ជាក់ថា ការកើតមានករណីចាប់រំលោភភាគច្រើន ដោយសារតែការប្រើប្រាស់គ្រឿងស្រវឹង និងគ្រឿងញៀន ។ល។
បើយើងយកតែពីរចំណុចខាងលើ ដែលជាដើមចមនាំឲ្យកើតមានបទល្មើសចាប់រំលោភកើតឡើងមកធ្វើជាឧទាហរណ៍ជាក់ស្តែង ដើម្បីរួមសហការគ្នាទាំងមន្ត្រីរាជរដ្ឋាភិបាល សង្គមស៊ីវិល ក្រុមគ្រួសារនីមួយៗ និងការអនុវត្តច្បាប់ត្រឹមត្រូវក្នុងការទប់ស្កាត់នោះ វាពិតជាមិនមានការលំបាកធំដុំប៉ុន្មានទេ ប្រសិនបើមានឆន្ទៈនិងការទទួលខុសត្រូវពិតប្រាកដ ។ បើនិយាយពីគ្រឿងស្រវឹង គ្រឿងញៀន សុទ្ធតែអាចទប់ស្កាត់បាន ប៉ុន្តែបញ្ហានេះចង់មិនចង់ប្រជាពលរដ្ឋខ្មែរបានទម្លាក់កំហុសទៅមន្ត្រីជំនាញក្រសួង-ស្ថាប័នពាក់ព័ន្ធមួយចំនួនរបស់រាជរដ្ឋាភិបាលថា គ្មានឆន្ទៈក្នុងការរួសរាន់បង្កើតច្បាប់គ្រប់គ្រងនិងត្រួតពិនិត្យគ្រឿងស្រវឹង ការមិនយកចិត្តទុកដាក់ ឬ ឃុបឃិតដើម្បីលាភសក្ការៈផ្ទាល់ខ្លួន ជាថ្នូរទៅនឹងការអនុញ្ញាតឲ្យនាំចូលគ្រឿងញៀនតាមព្រំដែនជាដើម ។ យ៉ាងណាក៏ដោយ ករណីកើតមានបទល្មើសរំលោភផ្លូវភេទ វាមានកត្តារួមផ្សំជាច្រើនទៀតដូចជា ករណីរូបភាពអាសអាភាសនៅតាមទស្សនាវដ្តី ប្រព័ន្ធអ៊ីនធើរណេត និងទូរស័ព្ទដៃ ដែលគួរតែក្រសួងព័ត៌មាន ក្រសួងប្រៃសណីយ៍ និងទូរគមនាគមន៍ ក្រសួងវប្បធ៌មនិងវិចិត្រសិល្បៈ និងមន្ត្រីជំនាញក្រសួង-ស្ថាប័នពាក់ព័ន្ធ ព្រមទាំងសង្គមស៊ីវិលរួមគ្នាតាមដាននិងត្រួតពិនិត្យឲ្យបានដិតដល់ ជាពិសេសនៅពេលច្បាប់ស្តីពីការគ្រប់គ្រងប្រព័ន្ធផ្សព្វផ្សាយតាមអនឡាញ (Website) បានអនុម័តរួចរាល់នោះ ត្រូវអនុវត្តឲ្យមានប្រសិទ្ធភាព ។
ម្យ៉ាងវិញទៀត យុត្តាធិការរបស់តុលាការក៏ត្រូវចូលរួមអនុវត្តច្បាប់ទាំងអស់គ្នា ដោយមិនត្រូវឲ្យកើតមានករណីប៉ូលិសចាប់ បែរជាតុលាការដោះលែង ឬប្រឌិតរឿងសទៅជាខ្មៅ ខ្មៅទៅជាសនោះឡើយ ។ ចំណែកអាជ្ញាធរដែនដីវិញ ក៏មិនត្រូវសម្របសម្រួលក្រៅប្រព័ន្ធតុលាការដែរ ត្រូវតោងយល់ថា ករណីរំលោភសេពសន្ថវៈគឺជាបទល្មើសព្រហ្មទណ្ឌ ដែលមិនអាចសម្របសម្រួលក្រៅប្រព័ន្ធតុលាការបានឡើយ ទោះមានសំណងរដ្ឋប្បវេណី ក៏ជនដៃដល់នៅតែជាប់បណ្តឹងអាជ្ញាដែរ ។
សរុបមកវិញ ដើម្បីលើកស្ទួយសីលធម៌ខ្មែរដែលត្រូវមើលឃើញថា បាននិងកំពុងធ្លាក់ចុះយ៉ាងខ្លាំងក្នុងរយៈកាលប៉ុន្មានឆ្នាំចុងក្រោយ ដោយសារតែអំពើចាប់រំលោភសេពសន្ថវៈមានជាច្រើនករណីក្នុងមួយឆ្នាំៗនោះ ត្រូវមានការចូលរួមសហការទាំងអស់គ្នា ជាពិសេសមន្ត្រីក្រសួង-ស្ថាប័នពាក់ព័ន្ធរបស់រាជរដ្ឋាភិបាល ត្រូវមានឆន្ទៈនិងការទទួលខុសត្រូវខ្ពស់ក្នុងការដាក់ចេញនូវយុទ្ធសាស្ត្រផ្សេងៗ ការផ្សព្វផ្សាយ ការអប់រំពីគុណធម៌ ការអនុវត្តច្បាប់ឲ្យមានប្រសិទ្ធភាព ការផ្តន្ទាទោសជនប្រព្រឹត្តបទល្មើសឲ្យត្រឹមត្រូវតាមច្បាប់ និងការចូលរួមចំណែកពីឪពុកម្តាយ អាណាព្យាល ក្នុងការអប់រំប្រៀនប្រដៅណែនាំកូនចៅឲ្យបានល្អប៉ុណ្ណោះ ៕
ដោយ ជួប ថា
ចែករំលែកព័តមាននេះ