ខេត្តកំពង់ស្ពឺ ៖ មានការភ្ញាក់ផ្អើលមួយបានកើតឡើងដោយសារតែប្រជាពលរដ្ឋប្រទះឃើញសពនារីម្នាក់ក្នុងថ្លុកត្រពាំងទឹកមួយកន្លែង កាលពីវេលាម៉ោង១ និង៤០នាទីរំលងអធ្រាត្រឈានចូលថ្ងែទី១ កុម្ភៈ ២០១៥នៅភូមិតាំងតាឡាត់ ឃុំព្នាយ ស្រុកសំរោងទង ខេត្តកំពង់ស្ពឺ។
នារីរងគ្រោះត្រូវបានគេស្គាល់ឈ្មោះម៉ៅ សុខា អាយុ២០ឆ្នាំ ជាកម្មការិនី មានទីលំនៅភូមិត្រពាំងជួន ឃុំឆក់ឈើនាង ស្រុកអង្គស្នួល ខេត្តកណ្តាល ។ នៅឆ្ងាយពីសពគេឃើញមានម៉ូតូធុនC១២៥មួយគ្រឿង។
តាមការរៀបរាប់របស់ស្ត្រីម្នាក់ឈ្មោះលី ផុន អាយុ៥០ឆ្នាំ ជាម្តាយរបស់នារីរងគ្រោះបានឱ្យដឹងថា មុនពេលកើតហេតុកូនស្រីរបស់គាត់បានសុំគាត់ជាម្តាយមកទទួលយកបងប្អូនជីដូនមួយរបស់នាងនៅភូមិកើតហេតុក្នុងគោលបំណងទៅចូលរួមបុណ្យដារលាននៅឃុំស្រង់ ស្រុកគងពិសី ដែលជាផ្ទះមិត្តភក្តិរបស់គេ(សព)ម្នាក់។ ម្តាយនារីរងគ្រោះបន្តថា ពេលកូនស្រីគាត់ចេញពីផ្ទះមក គាត់បានទូរស័ព្ទរកកូននៅវេលាម៉ោង១០យប់ដើម្បីចង់ដឹងពីសុខទុក្ខ តែមិនមានអ្នកទទួលនោះទេ ធ្វើឱ្យគាត់ជាម្តាយមានការសង្ស័យក៏នាំគ្នាតាមស្វែងរករហូតដល់យប់ជ្រៅក៏បានប្រទះឃើញម៉ូតូ និងប្រទះឃើញសពជាក្រោយ។
ម្តាយនារីរងគ្រោះបន្តថា ករណីនេះគាត់សង្ស័យជារឿងរំលោភសម្លាប់។ ទោះជាមានការលើកឡើងបែបនេះក្តីក៏សមត្ថកិច្ចមិនទាន់ហា៑នអះអាងថា ជាករណីអ្វីពិតប្រាកដនោះទេ ដោយពេលនេះសមត្ថកិច្ចកំពុងតែធ្វើការត្រួតពិនិត្យសពដើម្បីរកភស្តុតាងឈានទៅរកពន្លឺស្វែងរកជនបង្កយកមកផ្តន្ទាទោសតាមផ្លូវច្បាប់៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ