ខេត្តកណ្តាល ៖ ដីមជ្ឈមណ្ឌលក្រុងតាខ្មៅទំហំប្រមាណពីរហិកតាដែលគេដឹងថា ពីមុនជាដីរបស់រដ្ឋ ហើយបានវិនិយោគឲ្យក្រុមហ៊ុនឯកជននោះ មកដល់ពេលនេះ ត្រូវបានដឹងថា គេឃុបឃិតគ្នាលក់ទៅឲ្យឯកជន តម្លៃច្រើនម៉ឺនដុល្លារមិនដឹងតាំងពីពេលណាមកនោះទេ បានកាត់ប្លង់រួចរាល់ និងកំពុងត្រៀមសាងសង់ផ្ទះល្វែងលក់។
ដីនេះមានទីតាំងល្អខ្លាំងណាស់នៅជាប់សួនច្បារមាត់ទន្លេក្រុងតាខ្មៅ ស្ថិតក្នុងភូមិតាខ្មៅ សង្កាត់តាខ្មៅ។ ការបែកធ្លាយរឿងដីរដ្ឋធ្លាក់ដល់ដៃបុគ្គលមានលុយ មានអំណាចនេះគឺដោយសារពេលថ្មីៗនេះ ក្រុមហ៊ុន វិនិយោគ មជ្ឈមណ្ឌលក្រុងតាខ្មៅបានបញ្ចប់កុងត្រាជួលតូបជាមួយអាជីវករជាបន្ទាន់បំផុតធ្វើឲ្យអាជីវករជ្រួលច្របល់ និងមិនសប្បាយចិត្ត ព្រោះតែបញ្ចប់កុងត្រាលឿនពេក ប្រញាប់យកទីតាំងនេះធ្វើផ្ទះល្វែង។
ទាក់ទិននឹងបញ្ហាខាងលើនេះមន្ត្រី អាជ្ញាធរក្រុង ក៏ដូចជាខេត្ត និងមន្ត្រីមន្ទីជំនាញដែលកំពុងមានតួនាទីក្នុងតំណែងសព្វថ្ងៃ ម្នាក់ៗសុទ្ធតែមិនហ៊ានបញ្ចេញមតិ កប់យោបល់គ្រប់ៗគ្នា គឺដឹងរឿង និងដឹងប្រវត្តិដីនេះ ជាដីរបស់រដ្ឋច្បាស់ ប៉ុន្តែធ្វើជាមិនដឹង។ ចំណែកមន្ត្រីខ្លះដែលហ៊ាននិយាយវិញក៏បានប្រាប់ តែសុំកុំឲ្យបញ្ចេញឈ្មោះ ឬប្រភពដែរ។
តាមប្រភពព័ត៌មាននោះបានឲ្យដឹងថា ដីរបស់រដ្ឋដែលវិនិយោគជាមជ្ឈមណ្ឌលក្រុងតាខ្មៅ ពេលនេះត្រូវបានគេលក់បន្តទៅឲ្យឈ្មោះតាំង គួង ជាថៅកែក្រុមហ៊ុនសំណង់បុរីពេជ្រ។ បច្ចុប្បន្ន ក្រុមហ៊ុននេះកំពុង រត់ការសុំច្បាប់សាងសង់សំណង់រឹង ធំ គឺសង់ជាបុរី ឬផ្ទះល្វែងលើផ្ទៃដីទំហំជាង២ម៉ឺនម៉ែត្រការ៉េសំរាប់លក់។
មន្ត្រីដែលដឹងពីប្រវត្តិនេះបានឲ្យដឹងថា ដីនេះជាដីរបស់រដ្ឋ អតីតជាទីលានកីឡដ្ឋានខេត្ត ។ ក្នុងអំឡុងទសវត្សឆ្នាំ១៩៩០ ដីនេះបានវិនិយោគ៧៥ឆ្នាំទៅឲ្យក្រុមហ៊ុន ថៃ សេងឡុង ធ្វើជាផ្សាររាត្រីបានប៉ុន្មានឆ្នាំ ក្រុមហ៊ុននេះក៏បានផ្ទេរទៅឲ្យក្រុមហ៊ុន លោកឧកញ៉ាស៊ីវ ថៃ វិនិយោគសាងសង់ជាមជ្ឈលក្រុងតាខ្មៅនៅជុំវិញ បានសាងសង់ជាតូប ឬស្តង់សំរាប់ជូលឲ្យអាជីវករលក់ដូរ។ ស្រាប់តែពេលថ្មីៗនេះ ក្រុមហ៊ុនលោកឧកញ៉ាស៊ីវ ថៃ វិនិយោគមជ្ឈមណ្ឌលក្រុងតាខ្មៅ បានបញ្ចប់កុងត្រាជួលតូបជាមួយអាជីវករជាបន្ទាន់បំផុត ធ្វើឲ្យអាជីវករជ្រួលច្របល់ និងមិនសប្បាយចិត្ត ព្រោះតែបញ្ចប់កុងត្រាលឿនពេក ។
ប្រភពព័ត៌មានបានបន្តឲ្យដឹងទៀតថា ពេលនេះដីមជ្ឈមណ្ឌល ត្រូវបានកាត់ប្លង់ និងផ្ទេរសិទ្ធទៅជាដីឯកជនរួចរាល់ឲ្យឈ្មោះតាំង គួង ជាថៅកែក្រុមហ៊ុនបុរីពេជ្រ។ បច្ចុប្បន្ន ក្រុមហ៊ុននេះកំពុងធ្វើការរុះរើតូប ឬស្តង់ និងកំពុងរត់ការសុំច្បាប់សាងសង់សំណង់រឹងធំលើផ្ទៃដីទំហំជាង២ម៉ឺនម៉ែត្រការ៉េ ប៉ុន្តែមិនទាន់បានច្បាប់សាងសង់ទេ។ ថ្មីៗនេះក្រុហ៊ុន សំណង់បុរីពេជ្របានសាងសង់របងដែក បាំងដី មជ្ឈមណ្ឌលរំលោភលើដីចំណីផ្លូវដោយខុសច្បាប់ តែត្រូវអាជ្ញាធរធ្វើការហាមឃាត់។
គេមិនបានដឹងថា ដីរបស់រដ្ឋនៅចំកណ្តាលក្រុងតាខ្មៅនេះត្រូវគេឃុបឃិតគ្នាលក់តាំងពីពេលណាមក និងតម្លៃប៉ុន្មាននោះទេ ។ មហាជនបានលើកឡើងថា កន្លងមកមន្ទីការិយាល័យ ឬអគាររបស់រដ្ឋជាច្រើនកន្លែងនៅទីប្រជុំជន ជាកន្លែងមានហាងឆេង ត្រូវគេដោះដូរទីតាំងទៅកន្លែងឆ្ងាយ តែពេលនេះដីរបស់រដ្ឋនៅកណ្ដាលក្រុងត្រូវបានលក់ធ្លាក់ដល់ដៃឯកជនទៀតហើយ៕
ចែករំលែកព័តមាននេះ