ខេត្តស្វាយរៀង ៖ លោកយាយអាយុ៧៣ឆ្នាំម្នាក់បានលង់ទឹកស្រះឌៀស្លាប់ពេលបញ្ជូនទៅដល់មន្ទីរពេទ្យ បន្ទាប់ពីលោកយាយចុះទៅជួយស្រង់ចៅដែលរត់តាមលោកយាយទៅជញ្ជាត់ត្រីរួចធ្លាក់ចូលក្នុងទឹកស្រះឌៀ ។
ហេតុការណ៍នេះបានកើតឡើងកាលពីវេលាម៉ោង៧ព្រឹក ថ្ងៃទី៣១ មករា ២០១៥ ស្ថិតនៅភូមិត្រពាំងស្មាច់ ឃុំអណ្តូងត្របែក ស្រុករមាសហែក។ បើតាមនគបាលប៉ុស្តិ៍រដ្ឋបាលឃុំអណ្តូងត្របែកបានឲ្យដឹងថា លោកយាយដែលស្លាប់ដោយលង់ទឹកស្រះឈ្មោះក្រឹម ស្រី អាយុ៧៣ឆ្នាំ រស់នៅភូមិ-ឃុំកើតហេតុខាងលើ។
មុនពេលកើតហេតុគេឃើញលោកយាយរងគ្រោះកណ្តៀតឈ្នាងទៅជញ្ជាត់ត្រីនៅឯមាត់បឹងជាមួយកូនស្រីឈ្មោះមាស អ៊ុច អាយុ៣៧ឆ្នាំ ពេលនោះចៅឈ្មោះយ៉ុត ណាក់ ភេទប្រុស អាយុ៣ឆ្នាំ ក៏រត់តាមម្តាយ និងយាយទៅជញ្ជាត់ត្រីដែរ ។
ពេលទៅដល់បឹងស្ត្រីជាម្តាយ និងកូនបាននាំគ្នាជញ្ជាត់ត្រី រីឯកូនតូចអាយុ៣ឆ្នាំ រត់លេងនៅក្បែមាត់ឌៀ ក៏រអិលជើងធ្លាក់ចូលក្នុងទឹកឌៀជម្រៅប្រមាណ២ម៉ែត្របណ្តាលឲ្យលង់ ពេលនោះស្ត្រីជាយាយក៏ទម្លាក់ឈ្នាងចោលរត់ទៅចុះស្រង់ចៅលើកបោះមកលើគោក ចំណែកស្ត្រីជាម្តាយក៏ចាប់លើកកូនប្រុសមករលាក់ទឹក ខណៈនោះលោកយាយរងគ្រោះក៏ផែលជើងទៅក្នុងទឹកជ្រៅបណ្តាលឲ្យលង់តែម្តង ។
ស្ត្រីជាកូនឃើញម្តាយលង់ទឹកក៏ទុកកូនប្រុសនៅលើមាត់ឌៀរួចលោតចុះទៅក្នុងទឹកឌៀជួយស្រង់ម្តាយ ក៏ប៉ុន្តែដោយទឹកឌៀនោះជ្រៅលិចក្បាលមួយសន្ទូងហើយខ្លួនមិនចេះមុជទឹកផងទម្រាំស្រង់ម្តាយបានម្តាយផឹកទឹកឆ្អែតហល់សន្លប់បាត់បង់ស្មារតីទៅហើយក៏លើករលាក់ទឹក ដុតភ្លើងឆ្អើរអស់រយៈពេលមួយម៉ោង នៅតែមិនដឹងខ្លួនក៏សែងមកផ្ទះរួចហៅរថយន្តដឹកមកកាន់មន្ទីរពេទ្យបង្អែកស្រុកប្រតិបត្តិរមាសហែកដើម្បីសង្គ្រោះ តែមិនអាចសង្គ្រោះបានដោយគ្រូពេទ្យប្រាប់ថា ហួសពេលហើយបើពេលស្រង់ស្ត្រីរងគ្រោះភ្លាមដឹកមកមន្ទីរពេទ្យប្រហែលជាអាចសង្គ្រោះបាន តែទុកស្ត្រីរងគ្រោះយូរពេក៕
ចែករំលែកព័តមាននេះ