ខេត្តបន្ទាយមានជ័យ ៖ បុរសម្នាក់ស៊ីឈ្នួលបើកបររថយន្តយីឌុបសណ្តោងរ៉ឺម៉កម៉ាក ហ៊ីយ៉ាន់ដាយ ដឹកដំឡូងមីពេញទ្រុង ទម្ងន់ជាង៤០តោនក្នុងល្បឿនលឿនលុះដល់ផ្លូវកោងបួងចង្កូតមិនទាន់ផ្ងារជើងក្រឡាប់ក្អួតចេញដំឡូងមីពេញមុខផ្ទះប្រជាពលរដ្ឋ បណ្តាលឱ្យអ្នកបើកបរម្នាក់និងព្រូរថយន្តចំនួន៣នាក់រងរបួសស្រាល ។ ចំណែករថយន្ត រងការខូចខាតផ្នែកខាងមុខទាំងស្រុង និងប៊ិះខ្ទេចផ្ទះប្រជាពលរដ្ឋមួយខ្នងនៅក្បែរផ្លូវផងដែរ។
ហេតុការណ៍ក្រឡាប់រថយន្តយីឌុបនេះ បានកើតឡើងកាលពីវេលាម៉ោង៤ និង៣០នាទីទាបភ្លឺ នៅថ្ងៃទី៣១ ខែមករា ឆ្នាំ២០១៥ ស្ថិតនៅចំណុចផ្លូវកែង តាមបណ្តោយជាតិលេខ៥៩ ក្នុងភូមិបន្ទាយទី១ ឃុំទួលពង្រ ស្រុកម៉ាឡៃ ខេត្តបន្ទាយមានជ័យ ។ អ្នកបើកបររថយន្តយីឌុប ឈ្មោះ ភ័ក្តិ ភេទប្រុស អាយុ២៧ឆ្នាំ និងព្រូរថយន្ត៣នាក់ទៀត មិនស្គាល់អត្តសញ្ញាណរងរបួសស្រាល ក្រោយពេលកើតហេតុនាំគ្នាដាក់មេប្រូចរត់គេចខ្លួន បាត់ស្រមោល ដោយបើកបររថយន្តម៉ាកហ៊ីយ៉ាន់ដាយពណ៌ស ពាក់ស្លាកលេខកំពង់ធំ 3A-0846 រងការខូចខាតផ្នែកខាងមុខទាំងស្រុង ដោយមានម្ចាស់ ឈ្មោះ ចែ ស្រី អាយុ៥២ឆ្នាំ រស់នៅ ភូមិអន្លង់វែង ឃុំអន្លង់វែង ស្រុកអន្លង់វែង ខេត្តឧត្តរមានជ័យ ។
ប្រភពព័ត៌មានពីសាក្សីនៅកន្លែងកើតហេតុបានឱ្យដឹងថា នៅវេលាម៉ោងប្រហែល៤និង៣០នាទីទៀបភ្លឺ គេឃើញរថយន្តយីឌុបសណ្តោងរ៉ឺម៉កមួយខ្សែ បើកបរក្នុងទិសដៅពីកើតទៅលិចក្នុងល្បឿនយ៉ាងលឿនដោយដឹកដំឡូងមីពេញទ្រុងប្រៀប លុះដល់ចំណុចកើតហេតុ ត្រង់ចំណុចផ្លូវកែង ស្រាប់តែរថយន្តមួយគ្រឿងនេះ បត់ឆ្វេងទៅទិសខាងត្បូង ។ ប្រភពបន្តទៀតថា តែដោយរថយន្តនេះបើកបរក្នុងល្បឿនលឿនពេក ខណៈកំពុងបួងចង្កូត បណ្តាលឱ្យផ្ងាជើងក្អួតដំឡូងមីចូលទៅផ្ទះប្រជាពលរដ្ឋមួយកន្លែង បណ្តាលឱ្យរងការខូចខាតដំបូល និងសម្ភារផ្ទះមួយចំនួនផងដែរ ។
ចំណែកអ្នកបើកបរ និងព្រូរថយន្តមួយចំនួនទៀតក្រោយពេល កើតហេតុបាននាំគ្នាបើកទ្វាររថយន្តដាក់មេប្រូចរត់គេចខ្លួនបាត់ស្រមោល ។ ក្រោយមកនៅព្រឹកថ្ងៃដដែលម្ចាស់រថយន្តបានយករថយន្តមួយគ្រឿងទៀត ដើម្បីផ្ទេរដំឡូងមីដឹកបន្តទៅលក់នៅស្តង់ដំឡូងមីក្បែរនោះផងដែរ ។ ចំណែកផ្ទះប្រជាពលរដ្ឋដែលរងការខូចខាតស្រាល និងបែកបាក់សម្ភារមួយចំនួនត្រូវម្ចាស់រថយន្តចេញថ្លៃសងទាំងអស់តែម្តង ។
ចែករំលែកព័តមាននេះ