ខេត្ដសៀមរាប ៖ នៅរសៀលថ្ងៃទី៣១ ខែមករា ឆ្នាំ២០១៥នេះក្នុងសវនាការជំនុំជំរះករណីជនបរទេសជាជនជាតិបារាំងទាំងបីនាក់ដែលបានថតរូបអាក្រាតក្នុងប្រាសាទបន្ទាយក្តីនោះត្រូវបានតុលាការលើកយកមកជំនុំ
ខេត្ដសៀមរាប ៖ នៅរសៀលថ្ងៃទី៣១ ខែមករា ឆ្នាំ២០១៥នេះក្នុងសវនាការជំនុំជំរះករណីជនបរទេសជាជនជាតិបារាំងទាំងបីនាក់ដែលបានថតរូបអាក្រាតក្នុងប្រាសាទបន្ទាយក្តីនោះត្រូវបានតុលាការលើកយកមកជំនុំជំរះភ្លាមៗបន្ទាប់ពីមានការបញ្ជូនខ្លួនពីនគរបាលទេសចរមកកាន់តុលាការ ដែល ក្រោមការជំនុំជំរះដោយចៅក្រម កូយ សៅ និងតំណាងអយ្យការ លោក សុក កែវបណ្ឌិត ក្រឡាបញ្ជីលោក យ៉េង ដា មេធាវីលោក ភុំ ប៊ុនផាន់ និងមេធាវីរដ្ឋាភិបាលព្រមទាំងសមត្ថកិច្ចចូលរួមមានអាជ្ញាធរអប្សរា ,នគរបាលទេសចរ សាក្សី មួយចំនួនផងដែរ ។
ទាំងបីនាក់នោះ ជាជនជាតិបារំាង មានទី១. ឈ្មោះ Vincent Henri ភេទប្រុស អាយុ២០ឆ្នាំ កាន់លិខិតឆ្លងដែនលេខ13AK95763 រស់នៅ Carriere sur Seine ប្រទេសបារាំង ,ទី២. ឈ្មោះ Rodoiphe Fourgeot ភេទប្រុស អាយុ២១ឆ្នាំ កាន់លិខិតឆ្លងដែនលេខ14AY83376 រស់នៅទីក្រុង Lille ប្រទេសបារាំង និងទី៣. ឈ្មោះ Alexander André Raymond ភេទប្រុស អាយុ២២ឆ្នាំ កាន់លិខិតឆ្លងដែនលេខ 13AZ49579 រស់នៅទីក្រុង Hiedésheim ប្រទេសបារាំង ។
លោក កូយ សៅ ចៅក្រមជំនុំជំរះបានសម្រេចដាក់ពន្ធនាគារក្នុងម្នាក់ៗចំនួន៦ខែនិងពិន័យជាទឹកប្រាក់ម្នាក់ៗ១លានរៀល ពីបទជួញដូររូបភាពអាសអាភាសនិងបទបង្ហាញកេភេទក្នុងមាត្រា៣៩ កថាខណ្ឌទី៣នៃច្បាប់ស្តីពីការជួញដូរមនុស្សនិងអាជីវកម្មផ្លូវភេទក្នុងមាត្រា២៤៩នៃក្រមព្រហ្មទណ្ឌដែលជនទាំងនេះប្រព្រឹត្តិភូមិស្រះស្រង់ សង្កាត់នគរធំ ក្រុងសៀមរាបកាលពីថ្ងៃទី២៩ ខែមករា កន្លងទៅ ។ ប៉ុន្តែទោសទាំងអស់នេះត្រូវបានព្យួរទាំងមូលស្របតាមមាត្រា១០៧,១០៩,១១១ នៃក្រមព្រហ្មទណ្ឌ ដោយគ្រាន់តែពិន័យក្នុងម្នាក់ៗចំនួន១លានរៀលនិងមិនអនុញ្ញាតិឲ្យជនទាំងបីនាក់នោះចូលមកស្នាក់នៅប្រទេសកម្ពុជារយៈពេល៤ឆ្នាំ ។ក្នុងនោះតុលាការសម្រេចដកហូតយកវត្ថុតាងមួយចំនួនទុកជាសម្បត្តិរដ្ឋរួមមានទូរស័ព្ទដៃម៉ាកអាយហ្វូនស៊ិចចំនួន១គ្រឿង,អាយហ្វូនហ្វ័រ១គ្រឿង,មេម៉ូរី១,ម៉ាស៊ីនថតវីដេអូ១,ឧបករបំពងសំលេង១,ជើងកាម៉ារាចំនួន២ឆ្នាំងសាកទូរស័ព្ទចំនួន២, រីឯសម្ភារក្រៅពីនោះត្រូវប្រគល់ឲ្យជនជាប់ ចោទវិញ។
ជនជាប់ចោទទាំង៣នាក់នោះបានសារភាពនៅចំពោះមុខតុលាការថាខ្លួនពិតជាបានថតរូបអាក្រាតយ៉ាងដូច្នេះមែន ហើយពួកគេនិងធ្វើការសុំទោសចំពោះប្រជាជនកម្ពុជាទាំងអស់ ដូច្នេះពួកគេនឹងឈប់ប្រព្រឹត្តិយ៉ាងនេះទៀតហើយ ។ មូលហេតុច្បាស់លាស់។ចំណែកការលើកឡើងក្នុងបណ្តាញទំនាក់ទំនងសង្គមបានលើកឡើងផ្សេងៗគ្នាថា ការចាប់ខ្លួនបុរសជនជាតិបារាំងទាំង៣នាក់នោះគឺជាការរៀបចំរបស់អាជ្ញាធរទៅវិញ ។តាមពិតករណីថតរូបអាក្រាតកាយនៅក្នុងប្រាសាទបុរាណរបស់ខ្មែរនេះគឺជាការឆកល្វែងមួយរបស់សមត្ថកិច្ចកាលពីពេលកន្លងទៅ ប៉ុន្តែបន្ទាប់ពីកើតរឿងរ៉ាវនេះទៅអាជ្ញាធរចំរុះបានបង្កើនការរឹតបន្តឹងបន្ថែមទៀតរហូតឈានទៅដល់ការឃាត់ខ្លួនជនជាតិបារាំងទាំង៣នាក់នេះតែម្តង ដូច្នេះការលើកឡើងថា ករណីខាងលើនេះជាការរៀបចំទុកជាមុននោះគឺជារឿងមិនពិតនោះទេ ។
មជ្ឈដ្ឋាននានាបានសាទរទៅនឹងចំណាត់ការរបស់អាជ្ញាធរដែលសម្រេចបានយ៉ាងល្អ ខណៈពេលដែលមានជនបរទេសចូលមកលួចថតរូបអាសអាភាសក្នុងប្រាសាទបូរាណរបស់ខ្មែរ ប៉ុន្តែករណីស្តី្រម្នាក់ដែលគេថតរូបពាក់កណ្តាលខ្លួនក្នុងប្រាសាទនោះនៅមិនទាន់ស្វែងរកឃើញនៅឡើយទេ យ៉ាងនេះក្តីសេចក្តីថ្លែងការរបស់អាជ្ញាធរអប្សរាធ្លាប់បានបង្ហាញថាស្វែងរកជនទាំងនោះមកផ្តន្ទាទោសតាមផ្លូវច្បាប់ ព្រោះវាធ្វើឲ្យប៉ះពាល់ដល់វប្បធម៌សេចក្តីថ្លៃថ្លូររបស់ខ្មែរ។
ចែករំលែកព័តមាននេះ