ខេត្តមណ្ឌលគិរី ៖ ទោះបីការស្លាប់របស់យុវជនម្នាក់មានឈ្មោះ ភឿន សៅ ភេទប្រុស អាយុ២២ឆ្នាំ ក្នុងករណីដឹកឈើ២ដុំ ត្រូវគេសង្ស័យថារថយន្តបើកដេញពីក្រោយ ហើយសមត្ថិកិច្ចជំនាញរកមូលហេតុពិតមិនឃើញឡើយរហូតដល់ថ្ងៃនេះក្តី ។ តែដោយមានការយកចិត្តទុកដាក់ខ្ពស់ពីសំណាក់ ថ្នាក់ដឹកនាំកាកបាទក្រហមកម្ពុជានិងសប្បុរសជនជាច្រើនដែលមានចិត្តសប្បុរសធម៌ កាលពីព្រឹកថ្ងៃទី ៣០ មករា ២០១៥ កន្លងទៅ គ្រួសារសពបានទទួលអំណោយកើនឡើងរហូតដល់ទឹកប្រាក់ជាង១ម៉ឺនដុល្លារនិងប្រាក់រៀលជាង១លានរៀល ។
អំណោយសប្បុរសធម៌នេះបានយកមកជូនដល់ដៃគ្រួសារសព ក្រោមវត្តមានដ៍ខ្ពង់ខ្ពស់ពីលោក អ៊ុយ សំអាត ប្រធាននាយកដ្ឋានគ្រោះមហន្តរាយនិងមានការចូលរួមពីថ្នាក់ដឹកនាំខេត្តផងដែរ ។ទាំងនេះហើយសបញ្ជាក់ឱ្យឃើញថា កាកបាទក្រហមកម្ពុជា ជានិច្ចជាកាលពិតជាបានជួយដល់អ្នកទីទល់ក្រ ពិតៗមិនប្រកាន់ និន្នាកានយោបាយឡើយ ។ជាពិសេសរាល់បញ្ហាកើតឡើងនូវគ្រោះថ្នាក់ផ្សេងៗ។ចំពោះក្រុមគ្រួសារសពក្នុងនាមពួកគាត់ជាប្រជាពលរដ្ឋដែលបានទទួលអំណោយ គឺមានការរំភើបក្នុងចិត្តឥតឧបមានិងសូមបួងសួងដល់វត្ថុស័ក្តសិទ្ធិក្នុងលោក សូមឱ្យលោកជំទាេះកិត្តិព្រឹទ្ធបណ្ឌិត ប៊ុន រ៉ានីហ៊ុន សែន នៅជាប្រធានកាកបាទក្រហមកម្ពុជាជារៀងរហូត ។
សូមរំលឹកថា យុវជនម្នាក់ស្លាប់ភ្លាមៗនៅនឹងកន្លែង ក្រោយពីរូបគេបានដឹកឈើពីរដុំតាមម៉ូតូ ហើយត្រូវបានកម្លាំងប៉េអឹមប្រចាំការនៅអង្គការភិរក្សសត្វដំរី បើកឡានដេញចាប់ប្រផាប់ប្រផីង ដួលបោកក្បាលលើថ្នល់ស្លាប់មួយរំពេច ។ ហេតុការណ៏នេះកើតនៅចំណុចផ្លូវឆ្ពោះទៅឃុំមេម៉ង ស្ថិតនៅភូមិពូត្រុំ២ សង្កាត់មនោរម្យ ក្រុងសែនមនោរម្យ វេលាម៉ោង៩យប់ ថ្ងៃទី២៤ មករា ។
ប្រភពព័ត៌មានបានបញ្ជាក់ថា នៅពេលដែលជនរងទាំងពីរនាក់បងប្អូនធ្វើដំណើរពីភូមិមេម៉ង ឆ្ពោះទៅក្រុងសែនមនោរម្យ ពុំមានសមត្ថកិច្ចណារវល់អើពើមើល ការដឹកឈើបន្តិចបន្តួចនេះទេ ព្រោះតែយល់ថា តិចពេកនឹង អាណិតគ្នាអ្នកក្រដឹកគ្រាន់ដូរបាយប៉ុណ្ណោះ ។ ស្រាប់តែជនរងគ្រោះមកដល់ចំណុចកើតហេតុ ក៏ស្រាប់តែមានរថយន្តកាមរីគូទហើមពណ៌ស មួយគ្រឿង បានជិះដេញពីក្រោយយ៉ាងលឿន ស្របពេលនោះជនរងគ្រោះទាំងពីរនាក់បងប្អូន ក៏បានបំបែកផ្លូវគ្នា ។ដោយឡែកជនរងគ្រោះដែលស្លាប់ត្រូវបានរថយន្តពណ៌សដេញប្រកិតពីក្រោយជាប់ ព្រោះតែភ័យពេកជនរងគ្រោះបាន បើកម៉ូតូគេចទៅឆ្វេងដៃ ចៃដន្យផ្លូវមានក្រឡុកច្រើន ទើបបណ្តាលឲ្យម៉ូតូដួលបោកក្បាលជនរងគ្រោះលើថ្នល់ស្លាប់ភ្លាមៗ ។
បន្ទាប់ពីកើតហេតុរថយន្តបង្ករបានបើករត់គេចបាត់ស្រមោល ប៉ុន្តែកន្លងទៅប្រមាណជាងពីរម៉ោងរថយន្តបង្កត្រូវបានសមត្ថកិច្ចរកឃើញ នៅគ្រាដែលសមត្ថកិច្ចនឹងប្រជាពលរដ្ឋប្រហែលជា២០ទៅ៣០នាក់ កំពុងតាមរករថយន្តបង្កខាងលើឃើញម្ចាស់រថយន្តមិនព្រមចុះពីរថយន្តឡើយ ថែមទាំងអង្គុយឱបកាំភ្លើងអាការជាប់នឹងទ្រូង បើទោះបីសមត្ថកិច្ច សន្យារក្សាសុវត្ថិភាពមិនឲ្យប្រជាពលរដ្ឋវាយធ្វើបាបយ៉ាងណាក៏គេមិនព្រម ។លុះនៅម៉ោង១២រំលងអាធ្រាត ដោយមានការអន្តរាគមន៏ពីថ្នាក់លើរបស់ខ្លួន (ម្ចាស់រថយន្តបង្ក) ទើបគេព្រមប្រគល់ខ្លួនឲ្យសមត្ថកិច្ចនគរបាលក្រុងសែនមនោរម្យ នាំទៅសាកសួរនៅអធិការដ្ឋាននគរបាលក្រុង ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ