រាជធានីភ្នំពេញ ៖ នារី២នាក់ ក្នុងនោះមានម្នាក់ជានិស្សិតឆ្នាំទី៤ រៀននៅសាកលវិទ្យាល័យ IU រងរបួសបាក់ភ្លៅម្ខាង និងម្នាក់ទៀតរង
រាជធានីភ្នំពេញ ៖ នារី២នាក់ ក្នុងនោះមានម្នាក់ជានិស្សិតឆ្នាំទី៤ រៀននៅសាកលវិទ្យាល័យ IU រងរបួសបាក់ភ្លៅម្ខាង និងម្នាក់ទៀតរងរបួសស្រាល បន្ទាប់ពីត្រូវរថយន្តដឹកសំរាមរបស់ក្រុមហ៊ុនស៊ិនទ្រីមួយគ្រឿង បើកលឿនដូចហោះក៏ជ្រុលទៅបុកពីក្រោយយ៉ាងពេញទំហឹង ខណៈពួកនាងកំពុុងជិះម៉ូតូឌុបគ្នាចេញពីសាលា ឆ្ពោះមកកាន់លំនៅឋាន កាលពីវេលាម៉ោង១១ និង២០នាទីព្រឹកថ្ងៃទី៣០ មករា ២០១៥ ស្ថិតនៅខាងត្បូងផ្សារស្ទឹងមានជ័យ ក្នុងសង្កាត់ស្ទឹងមានជ័យ ខណ្ឌមានជ័យ ។
ប្រភពបានឱ្យដឹងថា និស្សិតដែលរងរបួសបាក់ភ្លៅឈ្មោះអ៊ឹុង សុនីតា អាយុ២៥ឆ្នាំ ជានិស្សិតឆ្នាំទី៤ ស្នាក់នៅភូមិដំណាក់ធំ សង្កាត់ស្ទឹងមានជ័យ ខណ្ឌមានជ័យ និងនារីម្នាក់ទៀតរងរបួសស្រាលមិនបានស្គាល់អត្តសញ្ញាណទេ ដោយសារនាងមិនប្រាប់ ។ ចំណែកអ្នកបើកបរថយន្តបង្ក ក្រោយពីកើតហេតុបានចុះរត់គេចខ្លួនបាត់ ទុកតែរថយន្តចោលត្រង់ចំណុចកើតហេតុ ។
ប្រភពបន្តថា មុនពេលកើតហេតុ គេឃើញនារីរងគ្រោះទាំង២នាក់ជិះម៉ូតូម៉ាកគុបជ្រុង៥០មួយគ្រឿង ពណ៌ទឹកប៊ិច ពាក់ស្លាកលេខ ភ្នំពេញ 1AF-8953 ធ្វើដំណើរចុះពីលើស្ពានអាកាសស្ទឹងមានជ័យ ចុះតាមផ្លូវមុន្នីរ៉េត ក្នុងទិសដៅពីជើងទៅត្បូង លុះជិះហួសស្ពាន ជាង១០០ម៉ែត្រ ស្របពេលមានរថយន្តស៊ិនទ្រីប្រមូលសំរាមមួយគ្រឿងកំពុងបើកពីក្រោយក្នុងល្បឿនយ៉ាងលឿន ហើយទំនងចាប់ហ្វ្រាំងមុនស៊ី ក៏ជ្រុលទៅបុកម៉ូតូរបស់នារីរងគ្រោះពេញទំហឹង បណ្តាលឱ្យម៉ូតូនិងអ្នកឌុបខ្ទាតមកខាងស្តាំដៃ ឯនារីឈ្មោះអ៊ឹង សុនីតា ជាអ្នកជិះក្រោយបានធ្លាក់ពីលើម៉ូតូខ្ទាតខាងឆ្វេងដៃ ត្រូវកង់ក្រោយរបស់រថយន្តស៊ិនទ្រីកិនចំចំហៀងភ្លៅខាងឆ្វេងបាក់ឆ្អឹងខ្ទេចរងរបួសយ៉ាងធ្ងន់ធ្ងរ ។
សមត្ថកិច្ចបានបញ្ជាក់ថា ក្រោយពីកើតហេតុ ក៏មានរថយន្តសង្គ្រោះបន្ទាន់មកដឹកនារីដែលរងរបួសធ្ងន់ទៅសង្គ្រោះនៅមន្ទីរពេទ្យ មិត្តភាព-ខ្មែរសូវៀត (រុស្ស៊ី) ភ្លាម ។ ចំណែកអ្នកបើកបរថយន្តបង្ក រួមជាមួយអ្នកដើរប្រមូលសម្រាមដាក់ក្នុងរថយន្ត បាននាំគ្នារត់គេចខ្លួនបាត់អស់តែម្តង ។
គួរកត់សម្គាល់ រថយន្តដឹកសំរាមរបស់ក្រុមហ៊ុនស៊ិនទ្រីតែងតែបង្កគ្រោះថ្នាក់ចរាចរណ៍ជារឿយៗ ហើយបន្ទាប់ពីបង្កហេតុរួច គឺតែងតែរត់ប្រះអាយុបាត់អស់ហើយ ដោយគេមិនដឹងថា ខាងកម្លាំងសមត្ថកិច្ចរកអ្នកដែលបើករថយន្តបង្កបានឬក៏អត់នោះទេ?
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ