មន្ទីរប៉ង់តាហ្គោនរាយការណ៍កាលពីថ្ងៃទី២៨ មករា កន្លងទៅនេះថា រដ្ឋាភិបាលអាមេរិកបានជ្រើសរើសការបន្តប្រើប្រាស់យន្តហោះប៊ូអុីង៧៤៧ សម្រាប់យន្តហោះប្រធានាធិបតី AIR FORCE ONE
មន្ទីរប៉ង់តាហ្គោនរាយការណ៍កាលពីថ្ងៃទី២៨ មករា កន្លងទៅនេះថា រដ្ឋាភិបាលអាមេរិកបានជ្រើសរើសការបន្តប្រើប្រាស់យន្តហោះប៊ូអុីង៧៤៧ សម្រាប់យន្តហោះប្រធានាធិបតី AIR FORCE ONE ជំនាន់ក្រោយ ដោយពិតណាស់បដិសេធមិនប្រើយន្តហោះ AIRBUS A380 ។
មន្ទីរប៉ង់តាហ្គោននិយាយថា បានជ្រើសរើសយន្តហោះប៊ូអីុង៧៤៧-៨០០ ទើបផលិតថ្មីបំផុតសម្រាប់ជំនួសយន្តហោះប៊ូអីុង៧៤៧-២០០ ចំនួន២គ្រឿង ដែលចាស់ហើយបច្ចុប្បន្នកំពុងប្រើដោយប្រធានាធិបតីអាមេរិក ។ យន្តហោះថ្មីទាំងនេះអាចដាក់ឱ្យប្រើប្រាស់មុនឆ្នាំ២០១៨ ។
រដ្ឋាភិបាលអាមេរិកពិចារណាពីការរកយន្តហោះធុនធំមានរេអាក់ទ័រ៤ ដែលតម្រូវឱ្យមានការជ្រើសរើសរវាងប៊ូអីុង៧៤៧ ឬ AIRBUS A380 ។ ក៏ប៉ុន្តែយន្តហោះប៊ូអីុង៧៤៧-៨០០ ដែលផលិតតែនៅសហរដ្ឋអាមេរិកពេលបំពាក់ឧបករណ៍ពិសេសទាំងឡាយរួច អាចបំពេញបេសកកម្មរបស់ប្រធានាធិបតី ហើយវាក៏ជានិមិត្តរូបមួយនៃផលប្រយោជន៍ជាតិទៀតផង ។
រដ្ឋាភិបាលអាមេរិកពេលនេះនឹងចាប់ផ្តើមចរចាលើកុងត្រាទិញជាមួយក្រុមហ៊ុនប៊ូអីុង ។ ក្រុមហ៊ុនប៊ូអីុងនឹងទទួលបន្ទុកផ្តល់យន្តហោះទាំងនេះ ។
បំពាក់ដោយមធ្យោបាយគមនាគមន៍ដែលមានសន្តិសុខ យន្តហោះ AIR FORCE ONE ចាត់ទុកដូចជាការិយាល័យចល័តមួយសម្រាប់ប្រធានាធិបតី ។ ក្នុងយន្តហោះនេះមានការិយាល័យមួយ មានបន្ទប់សន្និសីទ មានបន្ទប់ពេទ្យអាចប្រើជាបន្ទប់វះកាត់ និងមានកន្លែងធ្វើម្ហូបដែលអាចបម្រើមនុស្សដល់ទៅ១០០នាក់ ។ យន្តហោះទាំង២គ្រឿងសម្រាប់ប្រធានាធិបតី គឺធុនប៊ូអីុង៧៤៧-២០០B ដែលកែប្រែជាពិសេស។ យន្តហោះទាំងពីរត្រូវបានប្រើប្រាស់តាំងពីឆ្នាំ១៩៩១ មក ៕
ចែករំលែកព័តមាននេះ