ខេត្តត្បូងឃ្មុំ ៖ ចំណតរថយន្តត្រពាំងផ្លុងមានទីតាំងស្ថិតនៅច្រកទ្វេរភាគីអន្តរជាតិត្រពាំងផ្លុង(កម្ពុជា-វៀតណាម) ឃុំត្រពាំងផ្លុង ស្រុកពញាក្រែក ដែលទើបសម្ពោធបើកដាក់ឲ្យប្រើប្រាស់ជាផ្លូវការនោះបានយកតំលៃលើសសៀវភៅបន្ទុកនាំឲ្យផ្ទុះការតវ៉ា។
អាជីវករម្នាក់សូមមិនបញ្ចេញឈ្មោះបានប្រាប់ឲ្យដឹងនៅព្រឹកថ្ងៃទី៣០ មករានេះថា នៅពេលរូបគាត់ដឹកបន្លែតាមរថយន្តតូចចេញពីច្រកត្រពាំងផ្លុងបានចំណាយថវិកាចំនួន៤ទៅ៥ម៉ឺនរៀលបង់ឲ្យគយប្រចាំច្រកទ្វារត្រពាំងផ្លុង និង៣ទៅ៤ម៉ឺនរៀលទៀតសំរាប់ក្រុមគយចល័តលើផ្លូវជាតិលេខ៧។
អាជីវករដដែលលើកឡើងថា ប្រសិនណាបើរថយន្តបើកកាត់តាមផ្លូវមិនព្រមចូលបង់លុយឲ្យទៅកន្លែងគយចល័តទេនោះ បន្លែនឹងត្រូវចាប់យកមិនខានឡើយ។ អាជីវករបញ្ជាក់ថា ម្យ៉ាងទៀតនៅពេលដែល
រថយន្តទួរីស១គ្រឿងដឹកបន្លែ ត្រូវចូលទៅបង់ឲ្យថ្លៃចំណតរថយន្តចំនួន២ម៉ឺនរៀល បានតែ៣ថ្ងៃប៉ុណ្ណោះក៏យកតំលៃ៦.០០០រៀលវិញ ។
លោក សុខា ប្រធានក្រុមគយចល័ត ប្រាប់ឲ្យដឹងថា រូបលោកបានណែនាំដល់មន្ត្រីក្រោមឱវាទត្រូវតែចេះប្រើពាក្យសំដីសមរម្យជាមួយប្រជាពលរដ្ឋដែលរកស៊ីដឹកទំនិញតូច-ធំ ។ ហើយការលើកឡើងថាបើមិនបង់លុយដឹកបន្លែតាមរថយន្តតូចៗឲ្យមកមន្ត្រីគយក្នុង១រថយន្តពី៣ទៅ៤ម៉ឺនរៀល សូមបដិសេធមិនពិតទេ ។
លោកថា ប្រជាពលរដ្ឋដឹកបន្លែចេញពីព្រំដែនតាមម៉ូតូជាលក្ខណៈគ្រួសារយកទៅលក់នៅផ្សារជីមាន់ ដើម្បីដោះស្រាយជីវភាពក៏ត្រូវបានគេកៀងឲ្យចូលចំណតរបស់លោកឧកញ៉ាលឹម ប៊ុណ្ណា ហៅខ្មា ឲ្យបង់ថ្លៃចំណតដែរ ។ រូបលោកមានតួនាទីត្រូវត្រួតពិនិត្យមើល ប្រសិនបើឃើញមានរថយន្តធំៗដឹកទំនិញចេញពីព្រំដែនវៀតណាមមិនមានបង្កាន់ដៃបង់ពន្ធនាំចូលទេនោះនឹងត្រូវចាប់ផាកពិន័យតាមច្បាប់ ។
លោកឡុង ធាម អភិបាលស្រុកពញាក្រែក ប្រាប់ឲ្យដឹងថា ចំពោះបាតុភាពមួយចំនួនពិតជាកើតមាននៅចំណតរថយន្តរបស់លោកឧកញ៉ាខ្មា ពិតជាមានមែន តែកិច្ចនេះត្រូវបានធ្វើការសំរបសំរួលដោះស្រាយជាធម្មតាវិញហើយ ។
ភ្នាក់ងារកោះសន្តិភាពបានសុំការបំភ្លឺតាមទូរស័ព្ទពីលោកឧកញ៉ា លឹម ប៊ុណ្ណា ពីបញ្ហាខាងលើ តែទូរស័ព្ទរបស់លោកមិនអាចទាក់ទងបានទេ ។ លោកប្រាជ្ញ ចន្ទ អភិបាលខេត្តត្បូងឃ្មុំមានប្រសាសន៏តាមទូរស័ព្ទឲ្យដឹងថា ចំពោះការលេចឮបាតុភាពខាងលើរូបលោក នឹងពិនិត្យមើលក្នុងសៀវភៅបន្ទុកសិន ៕
ចែករំលែកព័តមាននេះ