មានការវាយប្រហារភេរវកម្ម៣ស្ទើរតែដំណាលគ្នាប្រកាសទទួលខុសត្រូវដោយសាខាក្រុមរដ្ឋអ៊ិស្លាមនៅអេហ្ស៊ីប កាលពីយប់ថ្ងៃទី២៩ មករា សំដៅលើប៉ូលិស និងកងទ័ពអេហ្ស៊ីបនៅភាគខាងជើងតំបន់ស៊ីណៃអីុ
មានការវាយប្រហារភេរវកម្ម៣ស្ទើរតែដំណាលគ្នាប្រកាសទទួលខុសត្រូវដោយសាខាក្រុមរដ្ឋអ៊ិស្លាមនៅអេហ្ស៊ីប កាលពីយប់ថ្ងៃទី២៩ មករា សំដៅលើប៉ូលិស និងកងទ័ពអេហ្ស៊ីបនៅភាគខាងជើងតំបន់ស៊ីណៃអីុ ។ ការផ្ទុះអំពើហិង្សានេះជួនពេលគ្នាជាមួយខួបនៃបដិវត្តន៍ដែលធ្វើកាលពីឆ្នាំ២០១១ ផ្តួលរំលំលោកហូស្នី មូបារ៉ាក់ ។
យោងតាមតុល្យការផ្លូវការ និងបណ្តោះអាសន្នថា សមាជិកកងកម្លាំងសន្តិសុខអេហ្ស៊ីបយ៉ាងតិច២៧នាក់បានត្រូវស្លាប់កាលពីយប់ថ្ងៃទី២៩ មករា ដោយសារការវាយប្រហារនានាដែលធ្វើដំណាលគ្នាប្រឆាំងប៉ូលិស និងទាហាន។ នៅ AL ARICH ការវាយប្រហារទាំងនេះធ្វើឡើងជាមួយការបាញ់គ្រាប់រុ៉ក្កែត និងរថយន្តផ្ទុកគ្រឿងផ្ទុះមួយលើបណ្តាអគាររបស់កងកម្លាំងប៉ូលិស និងកងយោធា ព្រមទាំងតំបន់រស់នៅមួយរបស់ពួកនាយទាហានដោយសម្លាប់ទាហាន២៥នាក់ ។
នៅរ៉ាហ្វាហ៍ ជាចំណុចឆ្លងកាត់មួយជាមួយដែនដីប៉ាឡេស្ទីន គឺមេបញ្ជាការកងទ័ពម្នាក់ជាគោលដៅនៃការវាយប្រហារនៅត្រង់បុ៉ស្តិ៍ត្រួតពិនិត្យមួយ ចំណែកភ្នាក់ងារប៉ូលិសម្នាក់ស្លាប់ដោយសារការផ្ទុះគ្រាប់បែកមួយគ្រាប់តាមចិញ្ចើមថ្នល់នៅស៊ុយអេ ។ យោងតាមទូរទស្សន៍រដ្ឋថា ការិយាល័យរបស់កាសែតរដ្ឋាភិបាល AL AHRAM ក៏រងការបំផ្លាញដោយសារការផ្ទុះដែរ ។
ការវាយប្រហារទាំងនេះដែលកើតមានជួនពេលគ្នាជាមួយខួបនៃបដិវត្តន៍ ដែលនាំទៅដល់ការផ្តួលរំលំលោកមូបារ៉ាក់នាឆ្នាំ២០១១ កាលពីយប់ថ្ងៃទី២៩ មករា ត្រូវបានប្រកាសទទួលខុសត្រូវដោយសាខាក្រុមរដ្ឋអ៊ិស្លាមនៅអេហ្ស៊ីប ។
កាលពីខែតុលាកន្លងមកនេះ ទាហានអេហ្ស៊ីប៣០នាក់បានត្រូវស្លាប់រួចហើយក្នុងការវាយប្រហារភេរវកម្មមួយនៅជិតក្រុង AL-ARICH ទីប្រជុំជនខេត្តស៊ីណៃអីុខាងជើង ។ ការវាយប្រហារនេះបានជំរុញឱ្យអាជ្ញាធរចេញការប្រកាសអាសន្នក្នុងតំបន់មួយលាតសន្ធឹងពីក្រុង AL-ARICH ដល់ក្រុងរ៉ាហ្វាហ៍ ជាប់ព្រំដែនជាមួយជ្រោយហ្គាហ្សាប៉ាឡេស្ទីន ។ ការប្រកាសអាសន្ននេះត្រូវបានពន្យារពេល ហើយរហូតដល់មានបម្រាមគោចរចាប់ពីម៉ោង១៧ ទៅម៉ោង៤ទៀបភ្លឺម៉ោងក្នុងស្រុក ។ ប្រឈមមុខនឹងការកើនឡើងនៃអំពើហិង្សាក្នុងតំបន់នេះ អាជ្ញាធរ ក៏ជំរុញផងដែរបំផ្លាញចោលផ្ទះច្រើនរយខ្នងក្នុងគោលដៅបង្កើតតំបន់ទ្រនាប់មួយនៅតាមបណ្តោយព្រំដែន ហើយកម្ទេចបណ្តាផ្លូវរូងក្រោមដីសម្រាប់រត់ពន្ធរវាងរ៉ាហ្វាហ៍ និងជ្រោយហ្គាហ្សា ។
បន្ទាប់ពីការវាយប្រហារកាលពីយប់ថ្ងៃទី២៩ មករា កងទ័ពអេហ្ស៊ីបបានចេញសេចក្តីប្រកាសមួយចាត់ទុកអំពើហិង្សាទាំងនេះថា ជាការតបតវិញចំពោះបណ្តាប្រតិបត្តិការយោធាប្រកបដោយជោគជ័យប្រឆាំងពួកសកម្មប្រយុទ្ធអ៊ិស្លាមនិយមក្នុងតំបន់នោះ ។ ទោះបីយ៉ាងណា ប្រជាជននៅខេត្តស៊ីណៃអុីខាងជើងក្លាយជាចំណាប់ខ្មាំងនៃការភ័យខ្លាចទាំងពីសំណាក់ពួកជីហាដទាំងភាពកាចសាហាវរបស់កងទ័ពដែរ ៕
ចែករំលែកព័តមាននេះ