ខេត្តក្រចេះ៖ អាជ្ញារធរកំពុងតែស្រាវជ្រាវរកមូលហេតុនៃគ្រោះអគ្គិភ័យដែលបណ្តាលឲ្យឆាបឆេះលំនៅឋានផ្ទះឈើចំនួនពីរខ្នងនៅក្បែរៗគ្នាខូចខាតទ្រព្យសម្បត្តិអស់រាប់ម៉ឺនដុល្លារ ក្នុងឃុំសំបុក ស្រុកចិត្របុរី
ខេត្តក្រចេះ៖ អាជ្ញារធរកំពុងតែស្រាវជ្រាវរកមូលហេតុនៃគ្រោះអគ្គិភ័យដែលបណ្តាលឲ្យឆាបឆេះលំនៅឋានផ្ទះឈើចំនួនពីរខ្នងនៅក្បែរៗគ្នាខូចខាតទ្រព្យសម្បត្តិអស់រាប់ម៉ឺនដុល្លារ ក្នុងឃុំសំបុក ស្រុកចិត្របុរី ស្របពេលដែលម្ចាស់លំនៅឋានលក់គ្រឿងទេសដែលជាលំនៅឋានបង្កហេតុបានដាក់ពាក្យបណ្តឹងមកសមត្ថកិច្ចថា អគ្គិភ័យនេះ គឺមានអ្នកលួចបង្ក។
ប៉ូលិសប៉ុស្តិ៍រដ្ឋបាលសំបុកបានឲ្យដឹងថា គ្រោះអគ្គិភ័យនេះបានកើតឡើង កាលពីវេលាម៉ោងជាង២រំលងអធ្រាត្រឈានចូលថ្ងៃទី៣០ មករា នៅក្នុងឃុំសំបុក ស្រុកចិត្របុរី ក្នុងនោះបណ្តាលឲ្យមានផ្ទះឈើ២ខ្នង ចំនួន៥ដំបូល សង់ជាប់ៗគ្នា ត្រូវបានអគ្គិភ័យឆាបឆេះអស់ទាំងស្រុង ។
នាយប៉ុស្តិ៍រដ្ឋបាលនគរបាលសំបុក លោកអនុសេនីយ៏ទោ អ៊ុន ហយ បានឲ្យដឹងថា អណ្តាតភ្លើងបានផ្តើមចេញពីលំនៅឋានផ្ទះតៀមលក់ចាប់ហួយមានម្ចាស់ឈ្មោះ សេង ម៉ារឌី អាយុ៤៣ឆ្នាំ ជាផ្ទះឈើប្រក់ស័ង្កសី មានទំហំ៥គុណ៩ម៉ែត្រ និងក៏បានឆាបឆេះរាលដាលទៅដល់ផ្ទះឈើប្រក់ក្បឿង១ខ្នង៤ដំបូលទៀត ជាកម្មសិទ្ធិរបស់ជនរងគ្រោះឈ្មោះ តែម ម៉េងគ្រី អាយុ៤៤ឆ្នាំ មានទំហំ៧គុណ១៥ម៉ែត្រ បណ្តាលឲ្យខូចខាតទាំងស្រុង។
យ៉ាងណាក៏ដោយបើទោះបីជានគរបាលបានប្រើប្រាស់រថយន្តពន្លត់អគ្គិភ័យធំៗរបស់ស្នងការដ្ឋានមានចំនួន២គ្រឿង និងប្រើប្រាស់ទឹកអស់២០រថយន្ត ដើម្បីជួយបាញ់ពន្លត់ និងទប់ស្កាត់ការឆាបឆេះរាលដាលក៏មិនអាចជួយទាន់ពេលដែរ ខណៈអណ្តាតភ្លើងកំពុងឆាបឆេះខ្លាំង ដែលផ្តើមចេញពីផ្ទះលក់គ្រឿងទេស ដែលមានស្តុកសាំង ប្រេង និងហ្គាស មួយចំនួនធំទៀតផងនោះ។
បន្ទាប់ពីរងនូវការឆាបឆេះ ម្ចាស់លំនៅឋានរងគ្រោះទាំងពីរ បានធ្វើការប៉ាន់ប្រមាណលើការខាតបង់ដោយសារអគ្គិភ័យនេះថា មានចំនួនជាង៨ម៉ឺនដុល្លារ ។ ចំណែកឯម្ចាស់លំនៅឋានបង្កហេតុជាផ្ទះតៀមលក់គ្រឿងទេស បានរៀបរាប់ប្រាប់សមត្ថកិច្ចថា ដំបូងគឺអណ្តាតភ្លើងឆេះចេញពីជ្រុងម្ខាងនៃផ្ទះតៀមលក់ចាប់ហួយរបស់គាត់ ហើយគាត់ក៏បាញ់ពន្លត់ដោយបំពង់ពន្លត់អគ្គិភ័យ តែមិនអាចទប់ស្កាត់បានដោយសារតែអណ្តាតភ្លើងបានឆាបឆេះមកដល់កន្លែងស្តុងសាំង និងប្រេងភ្លាមៗ។
យ៉ាងណាក៏ដោយម្ចាស់លំនៅឋានបង្កហេតុឈ្មោះសេង ម៉ារឌី បានដាក់ពាក្យបណ្តឹងមកកាន់អាជ្ញាធរមូលដ្ឋាន បន្ទាប់ពីកើតហេតុរួច ដោយគាត់សំអាងថា មូលហេតុបង្កឲ្យមានគ្រោះអគ្គិភ័យនេះ គឺមានអ្នកលួចបង្ក៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ