រាជធានីភ្នំពេញ៖ លោកប៉ា សុជាតិវង្ស អភិបាលរាជធានីភ្នំពេញបានធ្វើការព្រមានត្រង់ៗទៅមន្ទីរពេទ្យ និងគ្លីនិកឯកជនណាដែលមិនមានច្បាប់អនុញ្ញាត និងមិនបានគោរពតាមការណែនាំរបស់អាជ្ញាធរ និងក្រសួងសុខាភិបាលត្រូវតែបិទអាជីវកម្មតែម្តង។
ការព្រមានរបស់លោកប៉ា សុជាតិវង្ស បែបនេះក្នុងពេលលោកអញ្ជើញជាអធិបតីក្នុងពិធីបិទសន្និបាតបូកសរុបលទ្ធផលការងារសុខាភិបាលឆ្នាំ២០១៤ និងទិសដៅឆ្នាំ២០១៥របស់មន្ទីរសុខាភិបាលរាជធានីភ្នំពេញ កាលពីរសៀលថ្ងៃទី២៨ មករា ២០១៥ នៅមន្ទីរសុខាភិបាលរាជធានីភ្នំពេញ។
លោកប៉ា សុជាតិវង្ស បានលើកឡើងថា «ក្នុងនាមអាជ្ញាធររាជធានីភ្នំពេញចង់ឲ្យវិស័យសុខាភិបាលរបស់រាជធានីភ្នំពេញមានសេវាល្អ ហើយនៅកៀកកិតប្រជាពលរដ្ឋ រាជធានីភ្នំពេញក្នុងរយៈពេលប៉ុន្មានឆ្នាំចុងក្រោយនេះកំណើនប្រជាពលរដ្ឋមានសន្ធុះកើនឡើងខ្លាំង ដែលកំណើនបែបនេះមិនមែនដោយសារប្រជាពលរដ្ឋកើតកូន កើតចៅនោះទេ គឺដោយសាលំហូរចូលប្រជាពលរដ្ឋមកពីបណ្តាលខេត្ត-ក្រុងមួយចំនួនចូលមករាជធានីភ្នំពេញច្រើន ។
ចំពោះកំណើនប្រជាពលរដ្ឋបែបនេះ ធ្វើឲ្យសេវាសាធារណៈត្រូវតែប្រឈមនឹងការខ្វះខាតមិនខានឡើយដែលតម្រូវឲ្យយើងត្រូវរួមគ្នាក្នុងការផ្តល់សេវាជូនពួកគាត់ ហើយដើម្បីបំពេញតម្រូវការលើវិស័យសុខាភិបាលនេះជូនដល់ប្រជាពលរដ្ឋឲ្យបានកាន់តែល្អប្រសើរនោះ គឺយើងបានអនុញ្ញាតឲ្យមានមន្ទីរពេទ្យ និងគ្លីនិកឯកជនជាច្រើននៅក្នុងរាជធានីភ្នំពេញ តែយើងក៏ត្រូវតែទទួលខុសត្រូវខ្ពស់ចំពោះមន្ទីរពេទ្យ និងគ្លីនិកឯកជនទាំងនោះ មិនអាចបណ្តោយឲ្យធ្វើស្រេចតែចិត្តនោះទេ បើមន្ទីរពេទ្យ និងគ្លីនិកឯកជនណាមិនមានច្បាប់អនុញ្ញាត និងមិនគោរពតាមការណែនាំ អាជ្ញាធរនឹងបិទអាជីវកម្មតែម្តង» ។
លោកប៉ា សុជាតិវង្ស បានបញ្ជាក់ថា «គ្រូបង្រៀន បើបង្ហាត់សិស្សខុសអាចមានឱកាសកែប្រែឡើងវិញបាន ប៉ុន្តែបើពេទ្យធ្វើខុស គឺអាចធ្វើឲ្យមនុស្សស្លាប់ ហើយក៏មិនអាចធ្វើឲ្យមនុស្សរស់ឡើងវិញបានដែរ ដូច្នេះយើងត្រូវតែតម្រង់ទិសនៅកន្លែងនេះឡើងវិញ និងត្រូវយកចិត្តទុកដាក់បំផុត » ។
លោកបានធ្វើការណែនាំដល់មន្ទីរសុខាភិបាលរាជធានីភ្នំពេញឲ្យបង្កើតក្រុមគ្រូពេទ្យស្ម័គ្រចិត្តនៅតាមភូមិ ដោយក្នុងភូមិមានគ្នា៣នាក់ដើម្បីចុះអប់រំណែនាំប្រជាពលរដ្ឋឲ្យបានយល់ដឹងអំពីអ្វីដែលជាការបង្ការ និងការពារពួកគាត់ពីជម្ងឺផ្សេងៗ ពិសេសថែមទៀតនោះណែនាំស្ត្រីដែលមានគភ៌ឲ្យចេះវិធីរក្សាឲ្យបានល្អ ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ