ខេត្តឧត្តរមានជ័យ ៖ លោកឆឹម តឿ ប្រធានមន្ទីរធម្មការ និងសាសនាខេត្តឧត្តរមានជ័យ បានយកអំណាចរបស់ខ្លួនចាប់ផ្សឹកភិក្ខុសង្ឃ៣អង្គ និងបន្តដេញព្រះសង្ឃជាង២០អង្គទៀត ដែលកំពុងគង់នៅក្នុងវត្តធម្មសណ្តោសពុទ្ធវិន័យ ឱ្យចាកចេញពីវត្តឱ្យអស់ ហើយត្រូវបានចាក់សោព្រះវិហារចោលកាលពីវេលាព្រឹកថ្ងៃទី២៨ មករា ២០១៥ ។
ព្រះសង្ឃព្រះនាមគូ ចិត្រា គង់ក្នុងវត្តធម្មសណ្តោសពុទ្ធវិន័យជាគ្រូសូត្រស្តាំស្តីទី មានសង្ឃដីកាឱ្យដឹងថា លោកឆឹម តឿ ប្រធានមន្ទីរធម្មការ និងសាសនាខេត្តឧត្តរមានជ័យ បន្ទាប់ពីបានចាប់ព្រះសង្ឃព្រះនាម អ៊ុំ វិចិត្រ ព្រះចៅអធិការស្តីទីវត្តធម្មយុទ្ធ, ព្រះសង្ឃព្រះនាមឃុន ឆេង ព្រះចៅអធិការស្តីទីវត្តខ្នងទួល និងព្រះសង្ឃព្រះនាមឡា ហ៊រ ជាគ្រូសូត្រឆ្វេងស្តីទី គង់ក្នុងវត្តធម្មយុទ្ធ កាលពីព្រឹកថ្ងៃទី២៧ មករា ២០១៥ រួចមក លុះព្រឹកថ្ងៃទី២៨ មករា លោកឆឹម តឿ បានដឹកនាំកម្លាំងមន្ត្រីធម្មការជាច្រើននាក់ទៀត ដោយមានគោលបំណងដេញព្រះសង្ឃឱ្យចាកចេញពីវត្តឱ្យអស់ ហើយនឹងត្រូវចាក់សោទ្វារព្រះវិហារចោល ។ ចំណែកព្រះសង្ឃដែលគង់នៅក្នុងវត្តធម្មយុទ្ធជាង២០អង្គទៀត បានចាកចេញទៅគង់នៅវត្តសំរោងវិញ ។
ព្រះសង្ឃព្រះនាម គូ ចិត្រា ដដែលបន្តថា ព្រះសង្ឃនឹងធ្វើការចាកចេញដែរ តែបានត្រឡប់មកវត្តធម្មយុទ្ធវិញ ព្រោះខ្លាចមាន
ចោរលួចគាស់ទ្វារកុដ្ឋិព្រះសង្ឃ ។ បន្ទាប់មកនៅថ្ងៃទី២៩ មករា ២០១៥ លោកឆឹម តឿ បានបញ្ជូនព្រះសង្ឃចំនួន៦អង្គពីតាមបណ្តាវត្តផ្សេងៗ មកគង់នៅក្នុងវត្តធម្មយុទ្ធ តែបើពិនិត្យទៅលើសង្ឃដែលមកគង់នៅក្នុងវត្តនេះ ដូចជាមានអំណាចខ្ពស់ណាស់ ព្រោះថាសង្ឃទាំង៦អង្គនេះ សង្ឃខ្លះទើបតែបានបួស១ ទៅ២វស្សាប៉ុណ្ណោះ គង់ឆាន់បាយនៅលើសង្ឃដែលបានបួស៨ ទៅ៩ព្រះវស្សា ទៅ
វិញនេះ ដែលខុសពីវិន័យសង្ឃ ។
ព្រះសង្ឃព្រះនាមប៊ុន សាលួត ព្រះគ្រូវត្តរាជាសំរោង និងព្រះមេគណៈខេត្តឧត្តរមានជ័យ មានសង្ឃដីការឱ្យដឹងថា ភិក្ខុសង្ឃ៣អង្គដែលលោកឆឹម តឿ ចាប់ផ្សឹកនោះ គឺលោកពុំមានខុសវិន័យសង្ឃ មិនអាចផ្សឹកលោកបានទេ តែបើលោកមានខុសវិន័យសង្ឃ ត្រូវលាចាកសិក្ខាបទពីសង្ឃ ក្នុងនោះមានការចូលរួមពីមេគណៈខេត្ត អនុគណៈ ទើបផ្សឹកលោកបាន មិនអាចលោកឆឹម តឿ ផ្សឹកលោកបែបនេះបានទេ ។
ពាក់ព័ន្ធករណីនេះ កោះសន្តិភាពមិនអាចសុំការបំភ្លឺពីលោកឆឹម តឿ បានឡើយ ។
ចែករំលែកព័តមាននេះ